Ж.БАТЗАНДАНГ АН-ААС ХӨӨЖ, Д.МУРАТ, Л.БОЛД НАРЫН НЭР ДЭВШИХ ЭРХИЙГ ХАСЛАА

47218718_516697388740437_4416038197826420736_n.jpg Ж.БАТЗАНДАНГ АН-ААС ХӨӨЖ, Д.МУРАТ, Л.БОЛД НАРЫН НЭР ДЭВШИХ ЭРХИЙГ ХАСЛАА

УИХ дахь АН-ын бүлгийн гишүүн Л.Болд, Ж.Батзандан, Д.Мурат нарыг Ардчилсан Намын Үндсэн дүрмийн хорооноос Үндсэн дүрмээ зөрчсөн гэж үзжээ.

Учир нь өнгөрсөн 7 хоногт өрнөсөн Ерөнхий сайд У.Хүрэлсүхийг огцруулах асуудлыг дэмжих чиглэлийг АН-ын улстөрийн зөвлөл гаргасан байдаг. Гэвч  АН-ын бүлгийн Л.Болд, Ж.Батзандан, Д.Мурат  нар тэдний чиглэлийг үл тоон, Ерөнхий сайдыг авч үлдэхээр кноп дарсан юм.

АН-ын хараат бус Үндсэн дүрмийн хорооны хуралдаанд тус хорооны 14 гишүүний 11 нь хуралд оролцож, олонхийн саналаар Л.Болд, Д.Мурат, Ж.Батзандан нарыг Үндсэн дүрмийн 4 дүгээр бүлгийн 4.3.1 дэх заалт, 5 дугаар бүлгийн 5.15.1, 5.15.9.3 дахь заалт 6 дугаар бүлгийн 6.2.4, 6.2.6 дах заалтыг зөрчсөн гэж үзсэн байна. 

Улмаар АН-ын Үндсэн дүрмийн хороо уг шийдвэрээ АН-ын дарга С.Эрдэнэд хүргүүлсэн бөгөөд намын дарга уучлах, сануулах, шийтгэх байдлаар асуудалд хандах эрхтэй байсан юм. 

Тэгвэл дөнгөж сая Ардчилсан Намын бүлгээс мэдээлэл хийж УИХ-ын гишүүн Д.Мурат, Л.Болд нарт 4 жилийн хугацаанд улстөрийн сонгуульт албан тушаалд сонгогдох, томилогдох эрхийг хасах шийтгэл, УИХ-ын гишүүн Ж.Батзанданг 4 жилийн хугацаанд Ардчилсан намын гишүүнээс хасах шийтгэл тус тус оногдуулсан тушаал гаргаснаа АН-ын дарга С.Эрдэнэ мэдэгдлээ.

Дашрамд сануулахад АН-ын Үндсэн дүрмийн хорооноос өмнө нь БЗД-ийн Засаг дарга асан Д.Пүрэвдаваа, УИХ-ын гишүүн, сайд асан С.Баярцогт нарыг намын дүрэм зөрчсөн гэж үзсэний дагуу АН-аас хөөж байжээ.

Харин УИХ дахь АН-ын бүлгийн гишүүн Ж.Батзандан хэвлэлд өгсөн мэдээлэлдээ “Аливаа нам төрийн шийдвэр цаасан дээр бууж байж албаждаг. Гадуур яриад байгаа мэдээллийг гар дээрээ авч байж ийм шийдвэр гарчээ гэдгийг мэдэх байх. Монгол Улсын УИХ-ын гишүүн хүн бол ард түмний элч төлөөлөгч мөн бөгөөд нийт иргэн, улсын ашиг сонирхлыг эрхэмлэн баримтлана гэж байгаа.

Түүнээс намын зөвлөмжийг барих барихгүй, дагах дагахгүй нь УИХ-ын эрхийн асуудал байдаг юм. Тэр нам гэдэг чинь сүүлд тавих асуудал. Яахаараа шударга ёсны төлөө зогссон хүнийг унагах гэж оролддог юм бэ. Эх орончид эх орныхоо төлөө нам харгалзахгүй тэмцэх ёстой. Тэр нам чинь хэнд хамаатай юм бэ. Энэ улстөрийн намуудыг бүгдийг нь татан буулгах хэрэгтэй” гэсэн юм.

А.Төмөр

АРДЧИЛАЛ.МН

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ