КОНЦЕССЧИД ХИЙГЭЭД ЖДҮЧ-ДИЙН ХОРСОЛ

0e6skxsn.jpg КОНЦЕССЧИД ХИЙГЭЭД ЖДҮЧ-ДИЙН ХОРСОЛ

Төрөөс өс авагч буюу гомдсон 27

 

Ерөнхий сайд У.Хүрэлсүх Жижиг, дунд үйлдвэрлэлийг хөгжүүлэх сангаас эрх мэдлээ урвуулан, УИХ-ын гишүүний эрэмбээрээ сүрдүүлэн их хэмжээний зээл авсан нөхөдтэй хатуухан хариуцлага тооцоод эхлэнгүүт УИХ-ын гишүүд хөдөлгөөнд орчихлоо. Гэхдээ энэ нь есөн гишүүнтэй АН-ын бүлгээс биш 64 гишүүнтэй МАН-ын бүлгээс хөдөлсөн улстөржилтийн салхи байлаа. Тэд хэн нь хэн бэ гэдгийг харууллаа. Тэдэнд Монгол Улсын хөгжил, Монголын ард түмний амьдрал хамаагүй харин албан тушаал, эрх мэдэл л юу юунаас эрхэм гэдэг нь харагдаж байна. Тэд ингэхэд хэн бэ. Тос дотроосоо өтдөг гэдэгсэн.  Хамгийн итгэсэн хүнээс л хамгийн муухай араншин гардаг гэдгийг улстөрчид, МАН-ын бүлгийн 27 гишүүн тодорхой харууллаа. Тэд өөрсдийгөө ард түмэнд таалагдаж байгаа гэж бодож болох ч ард түмэн харин дургүйцэж байна. Ажил, хөгжил биш сандал, ширээ, эрх мэдэл яриад байхаар дургүйцэхээс аргагүй.

 

 

Хагалан бутаргагч Д.Хаянхярваа

 

Монголын улстөрд “Өс авагч-27” гэсэн шинэ нэршил өнөөдрөөс эхлээд хэлц үг болж түгж байна. Нөгөө “Элсний -13” гэдэг шиг. Иймэрхүү нэр бол сайнаар дурсагдаад байдаггүй юм. УИХ дахь МАН-ын бүлгийн дарга асан Д.Хаянхярваагаар толгойлуулсан 26 гишүүн Ерөнхий сайд У.Хүрэлсүхийн тэргүүлсэн Засгийн газрыг унагахаар гарын үсэг зурж, УИХ-ын дарга М.Энхболдод өргөн барилаа. Үйл явдал бол киноны зураг авалт аятай сүртэй өрнөсөн. Д.Хаянхярвааг УИХ дахь намынхаа бүлгийн 65 гишүүнийг зангидаж чадаагүй, хагалан бутаргасан гэж бүлгийн даргаас огцруулж, хариуцлага тооцсон. Онош зөв байсныг Д.Хаянхярваа Засгийн газрыг огцруулах бичигт гарын үсэг зуруулж, өргөн барьж, өөрийн биеэрээ харууллаа.

 

Ханилж яваад нөхрөө буюу Ц.Цогзолмаа

 

Засгийн газрыг огцруулах 27 гишүүний  нэрс дунд  БСШУ-ны сайд Ц.Цогзолмаа байна. Ямар шалтгаанаар Ерөнхий сайдыгаа огцруулах бичигт гарын үсэг зурсан гэдгийг таашгүй. Нэг танхимд удирдлагад нь ажиллаж байгаад ийм ааш гаргаж байгааг нь улстөртэй холбохоос өөр арга байхгүй. Эсвэл эмэгтэй хүний ааш аяг гээд зөөлрүүлээд орхих уу. Гэхдээ тэр бол сонгогчдын итгэлийг хүлээсэн УИХ-ын гишүүн. Жирийн эмэгтэй биш. Түүний өмнө шийдвэрлэх ёстой энгийн хэрнээ иргэдийн өдөр тутмын амьдралтай холбоотой асуудал өчнөөн бий. Өнөөг хүртэл ерөнхий боловсролын сургуулийн зарим  ангийн сурагчдын сурах бичиг хэвлэгдээгүй байх нь хэтэрхий улстөржсөн сайдад нь өчүүхэн ч хамаагүй бололтой. Энэ мэтээр олон жишээ дурдаж болно.

 

 

Хөшигний цаадах хүн буюу М.Энхболд

 

МАН-ын  даргын албан тушаалаа Ерөнхий сайд У.Хүрэлсүхэд хүлээлгэн өгсөн УИХ-ын даргын албан тушаалтайгаа үлдсэн М.Энхболд энд гол дүрийг бүтээж харагдахгүй цаагуурай жинхэнэ хорыг найруулж суугаа. Бүр гадна талаасаа Ц.Элбэгдорж найзаасаа дотно үгтэй халуун дулаан “зөвлөгөө” авч байх нигууртай. Түүний гэм хоргүй мэд төрхийн цаана жинхэнэ уур, бухимдал нуугдаж байгаа болов уу. Ямартаа ч УИХ-ын 27 гишүүний өргөх бичгийг Д.Хаянхярваа найзаасаа хүлээж авсан. Огцруулах бичигт гарын үсэг нь бий л дээ. Цааш үйл явдлыг хэрхэн үргэлжлүүлэхийг хөшигний ард хийх үү эсвэл... Одоо бол албан тушаалдаа үлдэхийг эрмэлзэж яваа нь тодорхой.  Монголын ард түмний аж амьдрал, улстөрийн байдал ямар байвал сайн болохыг мэдэж байгаа. Гэвч түүнд эрх мэдэл албан тушаал эрхэмд л  тооцогсон болов уу.

 

 

Концессоос болж огцорсон Засгийн газрын хорссон САЙД АСНУУД

 

Ерөнхий сайд У.Хүрэлсүхийн  танхимд багтаж Зам, тээврийн хөгжлийн сайдаар ажиллаж байсан Ж.Бат-Эрдэнэ   гарын үсэг зурж танихгүй болтлоо өөрчлөгдсөн байна. Түүний  удирдаж байсан яамны түшмэдүүд архидан согтуурч нэгнийхээ амийг хохироосон нь үнэн. Тэгээд хариуцлага тооцсон. Өөрөө өргөдлөө өгсөн. Ингэхээс өөр гарц, гаргалгаа  байгаагүй. Тэр сайн мэдэж буй: Үүнийхээ гол буруутныг Ерөнхий сайд У.Хүрэлсүх гэж бодсон уу ямартаа ч удирдлагад ажиллаж байсан хүнээ огцруулахаар сэтгэл шулуудаж. Энэ мэтээр тоочвол багагүй жагсаалт болох шинжтэй. Ж.Эрдэнэбатын танхимд ажиллаж байсан Н.Номтойбаяр, Д.Оюунхорол, Б.Чойжилсүрэн, Ц.Мөнх-Оргил нар гарын үсгээ зурсаныг тааж ядах юмгүй. Концессоос болж огцорсон өс хорсол нь буцалж, гомдол нь горойсоор яваа. Бас У.Хүрэлсүхийн Засгийн газрыг огрцуулахад оролцоод орхивол дараагийн танхимд сайдын сэнтийд  заларна гэсэн сэрүүн  зүүдэндээ итгэсэн нь гарцаагүй. Энэ 27 гишүүнийг харахад ЖДҮХС болон Концесс гэсэн хоёр үгс л тодроод байгаа. Энэ хоёр  нүдэнд үзэгдэж, гарт баригддаггүй  ард түмнийг сөгдүүлж, сөхрүүлсэн хий үзэгдэлтэй хэн тэмцээд байгаа билээ. Ерөнхий сайд У.Хүрэлсүх. Тиймээс тэд уурлаж, бухимдаад байгаа юм. Эх орон, ард түмэндээ хайртайдаа биш эрх ямба, албан тушаалд дуртайдаа ийм үйлдэлд сэтгэл шулууджээ.

 

Эх Сурвалж Factnew.mn http://factnews.mn/mwg

А.Эрдэнэ

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ