С.ЭРДЭНЭ АН-ЫГ ЭМХЛЭХ ҮҮ, ХАГЛАХ УУ?

17(151)(1).jpg С.ЭРДЭНЭ АН-ЫГ ЭМХЛЭХ ҮҮ, ХАГЛАХ УУ?

С.Эрдэнэ дарга болоод АН-ын жирийн гишүүд жилдээ намдаа 1200 төгрөгний татвар төлдөг байсныг өөрчилж 12 000 төгрөг болгож өсгөсөн нь гишүүдийн дургүйцлийг ихээхэн хүргэсэн юм. Түүнчлэн сумын намын дарга, аймгийн намын хороо, аймгийн намын дарга, ҮБХ-ны гишүүд, намын дэргэдэх төрийн бус байгууллагуудын тэргүүнүүд гэх мэтчилэн бүхий л сонгуульт албан тушаалууддаа алба гувчуур, дэнчин, татварыг тогтоон авснаас цаашилсангүй.

Ийнхүү намаасаа мөнгө босгох ажлаа амжилттай хэрэгжүүлсэн С.Эрдэнэ дарга улмаар ноёрхолоо гүйцэд тогтоох ажлаа хэрэгжүүлж эхлээд буй. Мэдээж хэрэг түүний дураар аашилахыг зүгээр хараад суух тэнэгүүд АН-д байхгүй тул түүний санасан бүхэн хүслээр нь болохгүй нь лавтай байсан биз. Гэвч тэрбээр бүх шатанд өөрийн хүнээ тавих гэж улам л дөргүй бух шиг айшилсаар байх тул жирийн гишүүд нь эсэргүүцлээ илэрхийлэх нь эрс нэмэгджээ.

Гэтэл гишүүдийнхээ эсэргүүцлийг үл тоосон С.Эрдэнэ замд нь саад болсон хэн бүхнийг намаасаа хөөх мэргэн арга сэджээ. Уг нь улстөрийн нам гишүүн элсүүлэх гэж зовдог бол 180 000 гишүүнтэй гэгдэх АН-ын дарга  гишүүдээ хөөх гэж зовдог бололтой. Энэ үйлдэл нь түүнийхээр бол зөв намаа цэвэрлэсэн баатарлаг үйл хэрэг гэлтэй. Ингэж гэмээнэ бид парзитуудаасаа салах учиртай гэж тэр хэлэх дуртай. Саяхан гэхэд С.Эрдэнэ дарга Баянзүрх дүүргийн АН-ыг өнгөтэй өөдтэй авч яваа Ерөнхийлөгчийн зөвлөх Д.Пүрэвдавааг намаасаа хөөчихжээ. Учир юунд байсан талаар тодруулахад үгэнд ороогүй, намын гишүүний үүргээ удаа дараалан зөрчсөн, намаа муухай харагдуулсан гэх юм.Үнэн хэрэгтэй хэн нь намаа муухай харагдуулаад байгааг С.Эрдэнэ дарга мэддэггүй бололтой. Өчнөөн зуун намын гишүүдийн татвар төлөгдсөн байтал намынхаа дотоод сонгуульд санал өгөх эрхийг нь хязгаарлачихаар ямар ч намын гишүүн дургүйцлээ илэрхийлэх тодорхой байх. Гэтэл мань С.Эрдэнэ дарга дургүйцлээ гээд намаасаа хөөчих жишээтэй.

Ийм л шинэчлэл гээч нэртэй дарангуйлал Ардчилсан нам дотор тогтож байгааг жирийн гишүүд нь ам уралдан ярьж байна. Өөрт нь бөхийгөөгүй намын гишүүдээ зайлуулж чадаж байгаа намын дарга үнэхээр намаа шинэчилж дараагийн сонгуульд амжилт гаргахыг зорьж яваа хүн мөн үү гэдэг эргэлзээ төрдөг гэнэ. Намын шинэчлэл, эв нэгдэл ярьж гар ч ирсэн С.Эрдэнэ намаа хэрхэн эмхлэх биш хэрхэн бутаргах ажлыг л сайн хийгээд байх шиг.

А.ТАМИР

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ