МЭРГЭЖЛИЙН БҮЖИГЧДИЙН УРАЛДААНЫГ "СҮЛД" ЧУУЛГЫНХАН ӨНГӨЛЛӨӨ

5be0f8e3b2eae.jpeg МЭРГЭЖЛИЙН БҮЖИГЧДИЙН УРАЛДААНЫГ "СҮЛД" ЧУУЛГЫНХАН ӨНГӨЛЛӨӨ

Баянхонгорчууд улирагч амралтын өдрүүдэд мэргэжлийн бүжигчдийн улсын уралдааныг хоёр хоногийн турш үзэж сонирхлоо. Орон нутгийн үзэгчид тэр бүр үзэх боломжгүй байдаг мэргэжлийн урлагийнхны тус өрсөлдөөнийг Баянхонгор хотноо зохион явуулсан нь орон нутагтаа анхдагч болжээ.

Монголын бүжгийн урлагийн мастер, Төв халхын нэрт бүжиг дэглээч, МУСТА Б.Дэлэгдоржийн нэрэмжит Мэргэжлийн бүжигчдийн анхдугаар уралдаан энэ сарын 3, 4-ний өдрүүдэд болсон юм. Уралдааны нээлтийн арга хэмжээний үеэр аймгийн Хөгжимт драмын театрт олон жил үр бүтээлтэй ажилласан жүжигчин, бүжигчин Д.Дарьсүрэнд Монгол Улсын Ерөнхийлөгчийн зарлигаар Хөдөлмөрийн гавьяаны улаан тугийн одон олгосныг аймгийн Засаг дарга Г.Батжаргал хүндэтгэлтэйгээр гардууллаа. Мөн залуу уран бүтээлч Д.Даваасамбуу, Ж.Содбаяр нар МУСТА цол тэмдгээр энгэрээ мялааж, БСШУСЯ-ны Жуух бичгээр бүжигчин Г.Буяннэмэх, аймгийн Эмэгтэйчүүдийн зөвлөлийн "Тэргүүний залуу эмэгтэй" медалиар бүжигчин Т. Энхтуяа нар шагнууллаа.

Уралдаанд Баянхонгор, Өвөрхангай, Сэлэнгэ аймгийн Мандал сумын мэргэжлийн театр, урлагийн байгууллага, цагдаагийн Сүлд, Үндэсний дуу бүжгийн "Түмэн эх" чуулгын бүжигчид оролцлоо. Тэмцээний шүүгчээр Монгол Улсын Ардын жүжигчин Д.Ухнаа, СУИС-ийн Бүжгийн урлагийн сургуулийн Уран сайхны удирдагч, ахлах багш, СТА М.Мөнгөнцэцэг тэргүүтэй баг ажилласан байна.
Цагдаагийн "Сүлд" чуулгын бүжигчдийн дэглэлт, цогц байдал, "Түмэн эх" чуулгын бүжигчдийн шинэлэг санаа, ур чадвар, Баянхонгорын театрынхны хэмнэл, цог жавхаа, Өвөрхангай, Сэлэнгэ аймгийнхны өөрийн гэсэн онцлогоороо ялгарч байв. Хоёр өдөр үргэлжилсэн тэмцээний нийлбэр дүн гарахад тусгай байрыг Сэлэнгэ аймгийн Мандал сумын "Мөнгөн хараа" дуу, бүжгийн чуулгын эмэгтэй бүжигчид, Өвөрхангай аймгийн ХДТ-ын бүжигчид эзэлж тус бүр 500 мянган төгрөгөөр шагнуулсан бол гутгаар байрыг мөн "Мөнгөн хараа" дуу бүжгийн чуулга эзэлж нэг сая төгрөгөөр шагнуулав. Харин хоёрдугаар байрыг "Түмэн эх" чуулга эзэлж, хоёр сая төгрөг, нэгдүгээр байрыг Баянхонгор аймгийн ХДТ-ын бүжигчид эзэлж гурван сая төгрөгөөр шагнуулсан бол уралдааны Гранприг цагдаагийн "Сүлд" чуулгын бүжигчид хүртэж таван сая төгрөгөөр шагнууллаа.

Балжирын Дэлэгдорж агсан Дундговь аймагт төрж өссөн ч Баянхонгор аймгийн Хөгжимт драмын театртай амьдралынхаа 30 гаруй жилийг салшгүй холбож, олон зуун шавь нар, уран бүтээлийн охь бүхнээ тус театрын тайзнаа мөнхөлж үлдээсэн юм. Тэрээр Төв халхын донж маягийг илтгэж шингээсэн 800 гаруй бүжгийг өөрөө дэглэж, Монголын урлагийн ертөнцөд 1500 гаруй шавь нарыг бэлтгэн өгчээ. Тиймээс ч аймаг орон нутгийн зүгээс бодлого болгож, хонгор нутгаас төрөн гарсан алдар суут эрхмүүдээ алдаршуулах үүднээс улсын чанартай нэрэмжит уралдааныг улсын орон нутагтаа зохион байгуулж байгаа юм байна.

12 сая төгрөгийн шагналын сантай, мэргэжлийн бүжигчдийн анхдугаар уралдаан нь Баянхонгор аймгийн ХДТ-ын бүжигчдийн түвшинг тогтоох, чадварыг нэмэгдүүлэх зорилготой аж. Баянхонгор аймаг 2016 оноос хойш зохион байгуулж буй дөрөв дэх удаагийн улсын чанартай уралдаан нь энэхүү Мэргэжлийн бүжигчдийн анхдугаар уралдаан боллоо.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ