АН-ЫН БҮЛЭГ 2019 ОНЫ ТӨСӨВТ ХОРИГ ТАВИХЫГ УРИАЛАВ

5bdfc99f08dc4_(1).jpeg АН-ЫН БҮЛЭГ 2019 ОНЫ ТӨСӨВТ ХОРИГ ТАВИХЫГ УРИАЛАВ

УИХ-ын АН-ын бүлгийн өнөөдрийн хуралдаанаар Монгол Улсын 2019 оны төсвийн асуурдлыг хэлэлцсэн байна. Энэ талаар тус бүлгийн удирдлагууд мэдээлэл хийлээ.

УИХ-ын чуулганы энэ сарын 02-ны хуралдаанаар Монгол Улсын 2019 оны төсвийг баталсан. Тус бүлгийн зүгээс УИХ 2019 оны төсвийг хэт өндөр зарлагатай, өндөр эрсдэлтэй хэмээн үзэж байгаа юм. Тиймээс Ерөнхийлөгчид хандан ирэх оны төсөвт хориг тавихыг уриалж байна хэмээн АН-ын бүлгийн дарга Д.Эрдэнэбат хэвлэлийн хурлын үеэр онцлов.

Мөн З.Нарантуяа гишүүн, “Ирэх оны төсөв 1.9 их наяд төгрөгийн алдагдалтай бөгөөд үүний дийлэнхийг гадаад зээлийн эх үүсвэрээр санхүүжүүлэхээр төлөвлөж байгаа. Монгол төр ийм өндөр эрсдэлтэй төсөв баталж болохгүй. Тиймээс төсөвт тусгасан 370 гаруй барилга байгууламжийн хөрөнгө оруулалт, Засгийн газрын дотоод хэрэглээний 270 тэрбум төгрөгийг хэмнэх ёстой. Ирэх жил 700 гаруй тэрбум төгрөгөөр төрийн албан хаагчдын цалингийн нэмэгдэлд зарцуулна. Гэхдээ шинээр ажлын байр бий болгоход чиглэсэн хөрөнгө оруулалт тусгаагүй байна” хэмээв.

Засгийн газраас шатахууны үнийг тогтворжуулах арга хэмжээ авахгүй байгааг Ж.Батзандан гишүүн мөн шүүмжиллээ. Тэрбээр ОХУ, БНСУ, Польш, Унгарын Засгийн газраас шатахууны үнийг тогтворжуулах чиглэлээр хатуу арга хэмжээ авахаа мэдэгдэж байхад Монголын төр зах зээлийн зарчмаар нь явуулна гэсэн мэдэгдэл хийж байгаа нь туйлын хариуцлагагүй үйлдэл хэмээсэн юм. Түүнчлэн, “Шатахуун импортлогч цөөн хэдэн компанийн монопол байдлыг хүлээн зөвшөөрч болохгүй. Үүнээс үүдэлтэйгээр ард түмэн хохирч, өргөн хэрэглээний бараа бүтээгдэхүүний үнэ өсч байна. Иргэдийнхээ эрхийг хамгаалах үүрэгтэй Засгийн газар ийм шийдвэр гаргаж болохгүй” гэлээ.

Мэдээллийн дараа сэтгүүлчид сонирхсон асуултад хариулт авлаа.

-Ирэх онд төсвөөс хэдэн төгрөгийн хөрөнгө оруулалтаар бүтээн байгуулалт хийх вэ?

-Ирэх онд төсвөөс 1.2 их наяд төгрөгөөр төсөл арга хэмжээ авч хэрэгжүүлэхээр төлөвлөсөн. Үүнээс 800 тэрбум нь өнгөрсөн онд эхэлсэн төсөл арга хэмжээг үргэлжлүүлэх, 600 тэрбум нь шинээр барилга байшин барихад зарцуулах юм. Өнгөрсөн онд эхэлсэн барилга байгууламжийн ажлыг үргэлжлүүлэх хөрөнгө оруулалтыг төсвөөс гаргаж болно. Харин шинээр барилга байгууламж барих шаардлагагүй хэмээн манай бүлэг үзэж байгаа.

-ЖДҮХС-гаас зээл авсан төрийн өндөр албан тушаалтнуудын тоо нэмэгдсээр байна. Эдгээр хүмүүст хариуцлага тооцох чиглэлээр АН-ын бүлэг ямар ажил хийх вэ?

-ЖДҮХС төдийгүй бусад сангаас зээл авсан төрийн албан хаагчдын мэдээлэл ил болж байна. Засгийн газрын гишүүд ч үүнд оролцсон байна. Тиймээс Засгийн газрыг огцруулах шаардлагатай. Манай бүлэг саяхан Хөгжлийн банкны үйл ажиллагааны тайлангийн мэдлээллийг авсан. Тус банк 2017 онд 34 төсөл хөтөлбөрт 341.9 тэрбум төгрөг, 2018 онд 42 төсөл хөтөлбөрт506.6 тэрбум төгрөгийн зээл олгосон байна. Энэ бүхнийг нягтлах хэрэгтэй. Мөн Засгийн газрын 29 тусгай сангийн үйл ажиллагааг зогсоож, хөндлөнгийн шалгалт хийх шаардлагатай.

-Шатахууны үнийг бууруулах ямар шийдэл байна вэ?

-Шатахууны үнэ дэлхийн зах зээл дээр буурч байхад манай улсад огт буудаггүй. Энэ бол шударга бус тогтолцоо. Засгийн газраас шатахууны үнийг хууль бусаар нэмсэн, зохиомол хомсдол үүсгэсэн компанийн тусгай зөвшөөрлийг цуцлах хүртэл арга хэмжээ авч болно.

Гэрэл зургийг Т.Чимгээ

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ