М.УРАНЦЭЦЭГ АБУ ДАБИГИЙН ИХ ДУУЛГЫН АВАРГА БОЛЛОО

5bd48522ba90a.jpeg М.УРАНЦЭЦЭГ АБУ ДАБИГИЙН ИХ ДУУЛГЫН АВАРГА БОЛЛОО

Арабын нэгдсэн Эмират улсын “Абу Даби-2018” жүдо бөхийн “Их дуулга”-д Монголын бөхчүүдээс өнөөдөр ганцаараа дэвжээнд гарч /2018.10.27/ барилдсан Дэлхийн аварга М.Уранцэцэг 48 кг-д аваргын төлөө Косовогийн залуу жүдоч Дистра Красникиг цэвэр ялж, алтан медалийн эзэн боллоо. Дистра Красники 22 настай бөгөөд энэ жилийн ДАШТ-ий эхний шатанд Украины залуу од Дария Билодидэд ялагдсан бол өнөөдөр олимп, дэлхийн аварга, Аргентин улсын жүдоч Паула Паретог ялсан юм. М.Уранцэцэгийн хувьд Абу Дабигийн “Их дуулга”-д аварга болсноор Олон улсын жүдо бөхийн холбооны Гран при болон “Их дуулга” гэсэн өндөр ангиллын тэмцээнээс 11 дэх түрүүгээ хүртээд байна.

М.Уранцэцэг өнөөдөр А хэсгийг тэргүүлэн барилдаж эхний тойрогт гоц мөргөж, улмаар Бельги, Португалийн бөхийг ялж, хэсгийн аварга болсон. Харин хагас шигшээ барилдаанд Унгарын жүдоч Ева Черновишкиг цэвэр ялснаар аваргын төлөө хүч үзэх эрхтэй болсон. Дэлхийн аварга шалгаруулах тэмцээний алт, мөнгөн медальт, гавьяат тамирчин М.Уранцэцэг жиндээ дэлхийн чансааны гуравт бичигдэж байгаа билээ.

“Абу Даби-2018” Их дуулга тэмцээнд 62 орны 348 жүдоч өрсөлдөж байгаа бөгөөд манай улсаас М.Уранцэцэг /48 кг/, эрчүүдээс Г.Одбаяр /73 кг/, Н.Дагвасүрэн /81 кг/, Б.Тэмүүлэн /+100/ нар эх орноо төлөөлөн оролцож байна.

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ