Б.ЭНХБАЯР: ГАДААД УЛСЫН ИРГЭН МОНГОЛ УЛСАД ШАШНЫ БАЙГУУЛЛАГА БАЙГУУЛАХЫГ ХОРИГЛОХ ГЭЖ БАЙНА

26-8T.png Б.ЭНХБАЯР: ГАДААД УЛСЫН ИРГЭН МОНГОЛ УЛСАД ШАШНЫ БАЙГУУЛЛАГА БАЙГУУЛАХЫГ ХОРИГЛОХ ГЭЖ БАЙНА

Шашин шүтэх, эс шүтэхтэй холбоотой асуудал ард түмний хамгийн эмзэг, онц чухал асуудал юм байна.

ХЗДХЯ-наас "Шашин шүтэх, эс шүтэх эрх чөлөөний тухай" хуулийн төслийн нээлттэй хэлэлцүүлгийг “Пума Империал” зочид буудалд 10 дугаар сарын 26-ны өдөр зохион байгууллаа.

Хэлэлцүүлэгт тус яамны дэд сайд Б.Энхбаяр “Шашин шүтэх эс шүтэх, эрх чөлөөний тухай хуулийн төслийн үзэл баримтлал, хуулийн төслийг танилцуулж, Хууль зүйн бодлогын газрын дарга П.Сайнзориг хэлэлцүүлгийг чиглүүлэв. Хэлэлцүүлэгт буддын шашин, төр, ТББ-ууд, бөө, евангал, христ, мүүн болон сонирхсон иргэд, сэтгүүлчид зэрэг маш олон хүмүүс хүрэлцэн ирж, дэвшилттэй, шинэлэг, монголын бодит амьдралд нийцсэн, мөн хатуухан үг, саналаа хэлж байлаа.

Дэд сайд Б.Энхбаяраас тус хуулийн төслийн хэлэлцүүлэгт онцлон хөндөж байгаа асуудлын талаар тодрууллаа.

Тэрээр “Шашин шүтэх эрх чөлөө бол Монгол улсын иргэний салшгүй хэсэг. Энэ эрхийг баталгаатай, ямар нэгэн алагчлалгүй эдлүүлэх нэгдүгээр шаардлага манай улсад байна. Хоёрт, Монгол улсын төр ёс, үндэсний эв нэгдэл, соёлын үнэт өвүүдийг нандигнан үр хойч үедээ өвлүүлэх ёстой.

Гуравт, шашны байгууллагуудын үйл ажиллагаанд хуульд заагдсан үндэслэлээр төр оролцоно. Хуульд заагдаагүй үндэслэлээр төр оролцохгүй байх зарчмыг нутагшуулна гэж хэлэлцэж байгаа юм. Өнөөдрийн манай улсын хууль тогтоомжоор шашны үйл ажиллагаанд тодорхой хязгаарлалт байдаггүй. Гэтэл өнөөдрийн хэлэлцүүлгээс анзаарвал маш олон тодорхой хязгаарлалтуудыг тавьж эхэлж байна. Жишээ нь, санхүү, үйл ажиллагааны тайлан, мэдээ авах тухай ч оролцогчид ярьж байна.

Мөн гадаадын шашны байгууллагаас Монгол улсад үйл ажиллагаа явуулж байгаа шашны байгууллагууд хандив, тусламж, санхүү авахгүй гэдгийг ч хэллээ. Гадаад улсын иргэн Монгол улсад шашны байгууллага байгуулахыг хориглох гэж байна. Энэ олон асуудлаас гадна Монголын үндэсний нэгдсэн тодорхой нэршлийг 50 жилээс дээш жил шашны үйл ажиллагаа явуулсан байгууллагад олгоно гэдгийг ярилаа.Түүнчлэн хүүхдүүдийг шашны байгууллагын номлолд сургах тодорхой заалтуудыг хэллээ. Жишээ нь, гэрээр шашны боловсрол авч байгаа 2500 гаруй хүүхдийн 90 хувь нь буддын шашных ч биш, христынх ч биш, исламынх ч биш байна. Шашны ямар чиглэлээр хүүхдүүд гэрээр сурч байгаа нь асуултын тэмдэг байгаа юм.” гэж ярьсан юм.

www.ardchilal.mn Б.БАЯРМАА

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ