Э.САРАНТОГОС: БНАСАУ-ЫН УДИРДАГЧ КИМ ИР СЕНИЙ 1988 ОНД МАНАЙ УЛСАД ХИЙСЭН АЙЛЧЛАЛ Ч ЧУХАЛ АЧ ХОЛБОГДОЛТОЙ БОЛСОН

22-7ta.png Э.САРАНТОГОС: БНАСАУ-ЫН УДИРДАГЧ КИМ ИР СЕНИЙ 1988 ОНД МАНАЙ УЛСАД ХИЙСЭН АЙЛЧЛАЛ Ч ЧУХАЛ АЧ ХОЛБОГДОЛТОЙ БОЛСОН
 
Монгол улс, БНАСАУ-ын хооронд дипломат харилцаа тогтоосны 70 жилийн ойд зориулсан уулзалт, соёлын өдрийн нээлт ГХЯ-нд 10 дугаар сарын 15-ны өдөр болсон юм. Хоёр орны дипломат харилцааны түүхэн ойтой холбогдуулж, ГХЯ-ны Ази Номхон далайн орнуудын газрын захирал Э.Сарантогосоос тодруулга авлаа.
 
 
-Монгол улс, БНАСАУ-ын хооронд дипломат харилцаа тогтоосны 70 жилийн ой энэ онд тохиож байна. Хоёр орны түүхэн харилцааны ямар онцлог үйл явдал хамтын ажиллагаанд том байр суурь эзэлдэг вэ?
 
-Дипломат харилцааны 70 жилийн түүхтэй манай хоёр улсын хувьд онцлог үйл явдал олон тохиож байсан. Аливаа хоёр улсын харилцаанд ард түмэн хоорондын нөхөрлөл, хэлхээ холбоо чухал байр суурь эзэлдэг. Манай хоёр улсын хувьд бат бэх найрамдалт харилцаа олон жилийн түүхтэй. БНАСАУ-ын дипломатууд тус улсад суусан манай анхны Элчин сайд Ж.Самбууг байнга дурсаж, маш их хүндэлдэг.
 
Манай ЭСЯ байгуулагдаж байсан нь 1951 он. Мөн 1956 онд хоёр улсын тухайн үеийн дээд удирдлага болох Ю.Цэдэнбал, Ким Ир Сен нар харилцан айлчилсан нь харилцаанд онцгой байр суурь эзэлдэг. БНАСАУ-ын удирдагч Ким Ир Сений 1988 онд манай улсад хийсэн айлчлал ч чухал ач холбогдолтой болсон.  Энэхүү айлчлалын 30 жилийн ой 2018 онд тохиож байна. Хоёр орны найрсаг харилцаанд онцолмоор гэх мэт үйл явдал, олон агшин байдаг. 
 
-БНАСАУ, Монгол хоёр орны дипломат харилцаа, хамтын ажиллагааны хүрээнд аль салбарт хөгжил, дэвшилтэй харилцаатай вэ?
 
-Соёл, боловсрол, хүмүүнлэг, олон нийтийн харилцаа, хамтын ажиллагааг онцолж хэлмээр байна. Жил бүрийн 4 дүгээр сард Пёньян хотноо зохиогддог Хаврын баярт манай соёл, урлагийн төлөөлөгчид тогтмол амжилттай оролцож ирсэн. Энэ онд Улаанбаатар хотноо болсон Жюдо бөхийн Ази тивийн аварга шалгаруулах тэмцээнд БНАСАУ-ын тамирчид оролцлоо.  Манай тамирчид спортын хамтарсан бэлтгэл сургууль бас хийдэг.
 
Түүнчлэн Солонгос хүмүүс монгол хэлийг гарамгай сайн сурдаг. Цаашид монгол, солонгос судлалыг харилцан дэмжиж ажиллана. Сүүлийн жилд Солонгосын хойгийн нөхцөл байдал сайжирч, бүс нутгийн хамтын ажиллагаа идэвхжвэл бид эдийн засгийн салбарт харилцан ашигтай хамтын ажиллагааг хөгжүүлэх нөөц боломж нэмэгдэнэ. Хоёр орны харилцаа, хамтын ажиллагаа улам идэвхжээсэй гэж боддог. 
 
www.ardchilal.mn Б.БАЯРМАА
 
 
 
Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ