АМРАЛТЫН ӨДРҮҮДЭЭР СОГТУУГААР ЖОЛОО БАРЬСАН 86 ЗӨРЧИЛ ИЛРҮҮЛЭВ

5bcd3ca8e8b3e.jpeg АМРАЛТЫН ӨДРҮҮДЭЭР СОГТУУГААР ЖОЛОО БАРЬСАН 86 ЗӨРЧИЛ ИЛРҮҮЛЭВ

Тээврийн цагдаагийн алба /ТЦА/-нд өнгөрсөн амралтын өдөр буюу энэ сарын 20,21-нд нийт 552 дуудлага ирснээс зам тээврийн ослын шинжтэй 375-ыг хүлээн авч шалгав.

Ослын улмаас орон нутагт 1, нийслэлд 1 хүний амь нас хохирч, 18 хүн гэмтэж бэртжээ. Хоногийн нөхцөл байдлын мэдээллээс үзэхэд нийт бүртгэгдсэн зам тээврийн ослын 11 нь явган зорчигч мөргөж гэмтээсэн, 7 нь мөргөлдөх хэлбэрээр гарсан осол байх бөгөөд явган зорчигч согтууруулах ундаа хэрэглэсэн үедээ замын хөдөлгөөнд оролцож өртсөн 5 тохиолдол бүртгэгджээ.

Цагдаагийн байгууллагаас гудамж замд хийсэн хяналт шалгалтаар согтууруулах ундаа хэрэглэсэн үедээ тээврийн хэрэгсэл жолоодсон 86 зөрчлийг илрүүлэн саатуулж хуулийн дагуу хариуцлага тооцон ажилласан ба эрэн сурвалжилж байсан 10 этгээдийг олж тогтоон харъяа цагдаагийн байгууллагуудад хүлээлгэн өгсөн байна.

Бүртгэгдсэн ноцтой зам тээврийн осол, хэргээс дурьдвал:

1. Бямба гараг буюу 20-ний өдөр 10.00 цагийн орчим Төв аймгийн Баян сумын 2 дугаар баг “Шуургат” гэх газар асфальтан замд "Kia Bongo Frontier" автомашин "Hyundai Sonata-7" маркийн автомашинтай мөргөлдөж, жолооч 54 настай эрэгтэй Э-н амь нас хохирч, 1 хүн гэмтсэн хэргийг Төв аймгийн Цагдаагийн газарт,

2. Мөн БЗД-ийн Доржийн гудамж, “Цайз” захын уулзварт "Howo CLY5257" миксерийн жолооч нь, явган зорчигч А, Б нарыг мөргөж гэмтээсэн хэргийг тус тус шалгаж байгаа аж.

Замын хөдөлгөөний дүрмийг биелүүлэх, хэрэгжүүлэх ажил бүх нийтэд хамаарах нь ойлгомжтой. Гэвч замын хөдөлгөөний дүрмийг биелүүлэх сонирхол хүн болгонд байдаггүй, явган зорчигч болж өгвөл зам товчилж дуртай газраараа явах, явган зорчигч автомашины урдуур гэнэт гүйх, зорчих хэсгээр согтуу явах, жолооч тээврийн хэрэгслийг гэмтэлтэй гэдгийг мэдсэн хэрнээ хөдөлгөөнд орох, хурд хэтрүүлэх зэрэг зөрчил нь зам тээврийн осол гарах, амь нас, эрүүл мэндээрээ хохирох нөхцлийг бий болгож байгааг ТЦА-наас анхааруулав.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ