СОЁЛЫН ӨВИЙН ДАРХЛААНЫ АСУУДЛЫГ МЭРГЭЖЛИЙН ТҮВШИНД ЗӨВЛӨЛДӨЖ, ДҮГНЭХ ШААРДЛАГАТАЙ

5bc6c75d055f8.jpeg СОЁЛЫН ӨВИЙН ДАРХЛААНЫ АСУУДЛЫГ МЭРГЭЖЛИЙН ТҮВШИНД ЗӨВЛӨЛДӨЖ, ДҮГНЭХ ШААРДЛАГАТАЙ

Үндэстэн оршин тогтнох эсэхийг тодорхойлдог соёлын өвийг хамгаалах нь чухал гэдэгт өнөөдөр эхэлсэн “Даяаршлын түрлэг дэх Монгол соёлын өвийн дархлаа” анхдугаар зөвлөгөөнд оролцогчид санал нэгдэв.

БСШУСЯ-ны дэмжлэгээр Соёл, урлагийн газраас санаачлан зохион байгуулж буй энэхүү зөвлөгөөний зорилго нь Монгол соёлын өвийн дархлааны өнөөгийн байдал, тулгамдсан асуудлыг илтгэж, цаашид бодлого, хэрэгжилтэд анхаарах асуудлыг тодруулахад оршино. Мөн тус зөвлөгөөн нь Монгол соёлын өвийг цогц байдлаар анх авч үзэж буйгаараа урьд өмнө хэрэгжүүлж байсан арга хэмжээнүүдээс онцлогтой юм.

Соёл, урлагийн газрын дарга Г.Эрдэнэбат хэлэхдээ, “Монгол нутагт 800 мянган жилийн тэртээгээс эдүгээ хүртэл хүн нутагшин амьдарч, хөгжиж ирсэн. Энэ хугацаанд бидний өвөг дээдэс түүх соёлын асар их өвийг бүтээж, нүдний цөцгий мэт хайрлан хамгаалж өвлүүлэн үлдээжээ. Эдгээр соёлын хосгүй нандин өв нь Монгол хүний оюуны сэтгэлгээ, үзэл бодол, гүн ухаан, урлаг, уран сайхны сэтгэлгээ, шүтлэг бишрэл, хэл, соёл, ёс заншил нэвт шингэсэн амьд архив, мэдлэг оюуны эх ундарга, эх орон, соёлоороо бахархах омогшил болж байдаг. Нөгөө талаар өвөг дээдсийн бүтээн бий болгосон соёлын өвийг хадгалж хамгаалах, хойч үедээ өвлүүлэн үлдээх явдал улс үндэстэн бүрийн хөгжлийн онцгой зорилт болж тавигдсаар байна. Техник, технологийн үсрэнгүй хөгжлийн нөлөөнд дэлхий ертөнц даяаршин буй өнөө цагт Монгол угсаатан оршин байхын үндэс “Соёлын өвийн дархлаа”-ны асуудлыг төрийн захиргаа, мэргэжлийн байгууллага, мэргэжилтэн судлаачдын түвшинд анхааран зөвлөлдөж, дүгнэх шаардлага бий болж байна. Тиймээс түүхийн гэрч, бидний, үндэстний дархлаа, хойч үеийнхний бахархал болсон өв соёлоо хадгалан хамгаалах хэрэгтэй хэмээн анх удаа энэхүү зөвлөгөөнийг зохион байгуулж байна” гэв.

Зөвлөгөөнд Соёлын асуудал эрхэлсэн төрийн захиргааны төв байгууллага, 21 аймгийн соёл, урлаг хариуцсан мэргэжилтэн, музей, номын сангийн захирал, эрдэмтэн, судлаач, мэргэжилтэн, соёлын өв хамгааллын чиглэлээр үйл ажиллагаа явуулж буй Төрийн бус байгууллага, аж ахуйн нэгжийн төлөөллөөс бүрдсэн 250 гаруй хүн оролцож байна.

Монголын Түүхийн музейн захирал Д.Сүхбаатар: Монголын музей олон улсын хэмжээнд хуульгүй байгаа. Үүнийг энэ удаагийн зөвлөгөөнөөр хэлэлцэж намрын чуулганд батлуулах нь музейчид бидний хувьд чухал. Хамгийн гол нь 1950-1970 онд баригдсан, үйл ажиллагаа явуулж буй музейн барилгуудыг шинээр барихаасаа илүү засварын ажил гүйцэтгэх шаардлагатай байна. Тиймээс энэ зөвлөгөөнд тулгамдаж буй бэрхшээлээ илэн далангүй ярьж, тэгснээр асуудал шийдэгдэнэ. Удахгүй олон шинэ музей хувийн хэвшилд түшиглэн хөгжих нь дамжиггүй. Түүнчлэн иргэдийн гарт байгаа үнэ цэнэтэй соёлын өвүүдийг бүртгэж баримтжуулах, цаашлаад улсын нэгдсэн санд оруулах хэрэгтэй.

Соёлын биет бус өвийг өндөр түвшинд өвлөсөн билиг авьяастан Э.Баатаржав: Монгол Улс гүрэн байсны хамгийн том баталгаа бол өв соёл юм. Зарим оронд өв тээгчид нь устаж үгүй болсон байдаг. Миний хувьд 5,6 наснаасаа өвлийн шөнийн уртад, өөхөн дэнгийн гэрэлд туульс хайлах эрдмийг Ховдын Дуут суманд амьдарч байсан туульчдаас анх сурсан. Түүнээс хойш 5 тивийн ард түмэнд 30 гаруй жил соёлын өвийг өөрийн биеэр хүргэлээ. Өнгөрсөн жил Өмнөд Америк тивд Амазон мөрний эрэг дагуу болсон олон улсын хуралд очиж өв соёлоо сурталчилсан. Тэгэхэд Чингисийн өлгий нутагт очиж өв соёлыг нь харах юмсан гэдэг хандлага их ажиглагдсан. Тэгэхээр соёлын өв тээгчид болон туулиар дамжуулж аялал жуулчлалыг хөгжүүлэх боломжтой. Би цуур, хөөмийн нэлээн олон шавьтай. Туульсын шавь бэлтгэхийг хичээж байгаа. Гэхдээ туульч төрнө гэдэг амаргүй.

Энэ үеэр “Монгол соёлын өв” гэрэл зургийн үзэсгэлэн дэлгэснээс гадна “Нүүдэлчин Монгол 2018 наадам” баримтат киног толилуулах аж. Энэхүү зөвлөгөөнд оролцогчдын хэлсэн санал, дэвшүүлсэн санааг үндэслэн соёлын өвийг хадгалж хамгаалах, ашиглах, хөгжүүлэх талаар зөвлөмж гарган, холбогдох байгууллагуудад хүргүүлэх аж.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ