ИСПАНИЙН БИЛБАО ХОТОД БОЛСОН ХУРАЛДААНД ЦАХИМ ХУВЬСЛЫН ШИЙДЛҮҮДИЙГ ХЭЛЭЛЦЖЭЭ

11-10TA.png ИСПАНИЙН БИЛБАО ХОТОД БОЛСОН ХУРАЛДААНД ЦАХИМ ХУВЬСЛЫН ШИЙДЛҮҮДИЙГ ХЭЛЭЛЦЖЭЭ

Испанийн Вант Улсын Билбао хотноо энэ сарын 3-5-ны өдрүүдэд бичил санхүүгийн энэ жилийн хуралдаан боллоо. Хуралдаанд Санхүүгийн зохицуулах хорооны Дэд дарга Д.Баярсайхан тэргүүтэй Монгол Улсын банк бус санхүүгийн салбарын төлөөлөгчид оролцоод ирлээ.

СЗХ-ноос мэдээллэснээр “Хүмүүс ба цахим хувьсгал” сэдэвт энэ жилийн хуралдаанд баруун, зүүн Европ, дундад болон төв Ази, Кавказын орнуудын нийт 600 орчим төлөөлөгч оролцож, санхүүгийн бүтээгдэхүүн, үйлчилгээний цахим шийдлүүд, мөн санхүүгийн болон нийгмийн хариуцлагын хүртээмжийг нэмэгдүүлэх боломжуудын талаар хэлэлцжээ.

Тус хуралдааныг Бичил санхүүгийн төв (Microfinance Centre, MFC) болон Европын Бичил санхүүгийн сүлжээ (European Microfinance Network, EMN)-нээс хамтран зохион байгуулсан байна.

Хуралдааны зорилго нь санхүүгийн хүртээмжийг нэмэгдүүлэх асуудал байлаа. Тодруулбал, бичил санхүүгийн хүртээмжийг шинэ санхүүгийн технологи ашиглан хэрхэн яаж өөрчлөх, нэмэгдүүлэх тухай асуудалд чиглэгджээ. Хуралдаанд оролцогчид санхүүгийн хүртээмжийг нэмэгдүүлэхийн тулд их хэмжээний өгөгдөл (big data) дээр ажиллах, эрсдлийг удирдах, хамтын санхүүжилт (crowdfunding), финтекийн хэрэглээ, нийгмийн хариуцлагын менежментийг технологитой хослуулах, ББСБ-уудыг санхүүжүүлэх шинэ арга, хэрэгслүүд зэрэг өргөн хүрээний сэдвээр хэлэлцүүлэг өрнүүлсэн байна.

Хуралдааны үеэр гарсан үзэсгэлэнд Монгол Улсын зарим банк бус санхүүгийн үйлчилгээ эрхлэгч болон финтек хөгжүүлэгч аж ахуйн нэгж оролцож, өөрийн бүтээгдэхүүн, үйлчилгээ, технологийн шинэлэг шийдлийг танилцуулжээ. Мөн энэ үеэр Монголын талын СЗХ-ын төлөөлөгчид Европ, Кавказ болон дундад Азийн бизнес эрхлэгчидтэй ажил хэргийн харилцаа тогтоосон байна.

Б.БАЯРМАА

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ