КАТРИНЕ КАРДАВА ИЛТГЭЛДЭЭ “ГҮРЖ УЛС НЬ 180 УЛСААС АВИЛГАД ХАМГИЙН БАГА ӨРТСӨН УЛС ЮМ...” ГЭЖ ТОДОТГОЛОО

10-16ta.png КАТРИНЕ КАРДАВА ИЛТГЭЛДЭЭ “ГҮРЖ УЛС НЬ 180 УЛСААС АВИЛГАД ХАМГИЙН БАГА ӨРТСӨН УЛС ЮМ...” ГЭЖ ТОДОТГОЛОО

 “Төрийн байгууллагын хүний нөөц – Бизнесийн таатай орчныг бүрдүүлэх нь” сэдэвт олон улсын хурал 10 дугаар сарын 10-ны өдөр Novotel зочид буудлын хурлын танхимд болж байна. 

Олон улсын хурал нь бүтэн өдрийн турш үргэлжлэх юм байна. Тус хуралд МУИС-ийн ОУХ, Нийтийн удирдлагын сургуулийн Нийтийн удирдлагын тэнхимийн эрхлэгч, доктор Н.Бурмаа, ХБНГУ-ын Шпайерийн төрийн захиргаа судлалын институтийн захирал, МУИС-ийн хүндэт доктор, профессор Ян Цыков, Гүрж улсын Төрийн албаны зөвлөлийн дарга, доктор, профессор Катарине Кардава, Япон улсын Чуо Их сургуулийн Хуулийн сургуулийн доктор Хироко Кудо, АНУ-ын Анкорэж дахь Аляскийн Их сургуулийн Бизнес, Нийтийн бодлогын сургуулийн доктор Жон Даффи нар оролцож, сонирхолтой илтгэлүүдээ тавьсан юм.

Гүрж улсын Төрийн албаны зөвлөлийн дарга, доктор Катарине Кардава “Гүрж улсын төрийн албаны шинэчлэлийн явцад хуримтлуулсан сургамж, улсын болон орон нутгийн эдийн засгийн хөгжил, туршлага, сорилт” сэдвээр Монгол улсын төрийн албыг үндсээр нь шинэчилж, өөрчлөхөд хэрэг болохуйц чухал туршлагуудаас ярьж, илтгэлээ.

Түүний илтгэлээс товчлон чухал хэсгээс нь сонирхуулъя.

Тэрээр илтгэлдээ ”...2004 оны “Сарнайн хувьсгал”-ын дараа Гүржийн Засгийн газар нь үр ашиг, үр дүнтэй байдлыг сайжруулах зорилгоор захиргааны салбарт өөрчлөлт зохион байгуулалт хийсэн. Тус Засгийн газар нь бүтцийн өөрчлөлт, шинэчлэлийг хийхдээ эдийн засгийн өсөлт, авлигатай тэмцэхэд онцгойлон анхаарсан байдаг....Тус улсад төрийн үйлчилгээг сайжруулах зорилгоор Засгийн газар нь хоёр томоохон шинэчлэлийг санаачилсан. Тухайлбал, иргэний болон нийтийн бүртгэлийн системийг шинэчлэх ажлаас эхэлсэн. Энэ нь магадгүй төрийн захиргаа болон иргэд хоорондын харилцааны соёл, мөн чанарыг өөрчилсөн гэж хэлж болно.

...Системийн шинэчлэлийг амжилттай, үр дүнтэй хэрэгжүүлсэн нь манай улсын байр суурийг нэр хүнд бүхий олон улсын рейтингүүдэд нэлээдгүй сайжруулах нөхцөлийг бүрдүүлсэн юм. Энэ нь Гүрж улс нь 2018 оны Эдийн засгийн эрх чөлөөний индексээр 186 орноос 16-р байранд орсон нь Европын бүс нутгийн 44 орноос 9-рт жагссаны илрэл. Гүрж улс нь 180 улсаас авилгад хамгийн бага өртсөн улс юм... Мөн Гүрж улс нь бизнес эхлүүлэхэд хамгийн хялбар улс орнуудын нэг гэж дэлхийн түвшинд тооцогддог. ...” хэмээн тайлбарлан илтгэв.

 Б.БАЯРМАА

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ