ЗУРААЧ Ж.ГҮРСЭНГИЙН “БОДЛЫН ЕРТӨНЦ”-ӨӨР ТЭНЭХҮЙЕЭ..

9-21t6a.png ЗУРААЧ Ж.ГҮРСЭНГИЙН “БОДЛЫН ЕРТӨНЦ”-ӨӨР ТЭНЭХҮЙЕЭ..

Залуу уран бүтээлч, зураач Ж.Гүрсэнгийн “Бодлын ертөнц”-өөр тэнэлээ. Тэрээр бие даасан үзэсгэлэнгээ Norphei Art Gallery-д 10 сарын 08-ны орой нээлтээ хийв.

Сүүлийн гурван жил гаруйн хугацаанд орчин үеийн чиглэлээр зурсан уран бүтээлийн 20 гаруй түүвэр бүтээлээ энд дэлгэжээ. “Үзэсгэлэнгийн бүтээлүүд нь өөр хоорондоо өөр боловч түүний байгаль, хүмүүсийн харилцан шүтэлцээний тухай бодол эргэцүүлэлд хязгааргүй гүн утга учир орших шиг...” гэж мэргэжил нэгт нөхдүүд нь тодотгон тайлбарлаж байна.

Ж.Гүрсэнгэ нь 2009 онд “ХЯЗГААРГҮЙ ЕРТӨНЦ” бие даасан үзэсгэлэнгээ 2011 онд “ПРОМЕТЕЙ” хамтарсан үзэсгэлэн гаргаж байв. Монголын болон олон улсын үзэсгэлэнд оролцож байсан. Түүний бүтээлүүдээс “Дээд ертөнц”, “Эх”,  “Дорнын салхи”, “Огторгуйн чанадад”, “Чулуутын хавцал” зэрэг бүтээлүүд нь олонд таашаагддаг. Уран зургуудаас нь гадна, гадаад дотоодын уран зураг цуглуулагчид болон музейд хадгалагддаг байна.

“Үзэсгэлэнд тавьсан бүтээлүүдээс “Хязгааргүй огторгуйн чанадаас” хэмээх зураг миний онцлох бүтээл. Хүн төрөлхтөнөөс өмнө байгаль үүсч, байгалиас хүн бий болсон. Хүний оюун санаа бол хязгааргүй ертөнц гэдгийг энэ бүтээлдээ илэрхийлсэн. Ер нь уран бүтээлч хүн бодож явдаг санаа, сэдэв гэх мэт зүйлээ уран бүтээлдээ илэрхийлдэг. Миний хувьд төрсөн нутаг, Монгол эх орныхоо байгаль, байгаль-хүн хоёрын шүтэлцээний утга учрыг зургандаа тусгадаг юм.” гэж Ж.Гүрсэнгэ ярьсан юм.

Мөн түүний өв соёлоо дээдэлж хийсэн нэг том ажил нь Хүннүгийн үеийг илэрхийлсэн хамгийн том язгууртан дээл төслийг 2016 онд санаачилж, бүтээсэн явдал байдаг. Дэлхийн хамгийн том дээл бүтээсэн тухайгаа Ж.Гүрсэнгэ “Энэхүү дээлийн захнаас хормойн үзүүр хүртэл 14 метр өндөр, нэг ханцуйн үзүүрээс нөгөө ханцуйн үзүүр хүртэл 18 метр өргөнтэй. Өвөрмонголчууд бараг дээлийг 7-8 метр өндөртэй оёсон байдаг.

Язгууртан дээлийг Бат-Зүү ХХК ивээн тэтгэж, 500-аад метр даавуугаар 50-иад хүн оёж бүтээсэн. Манай гэргий Дуламсүрэн энэ компанийн дизайнераар ажиллахдаа язгууртан дээлний загварыг гаргасан юм. Одоо тус компанид хадгалагдаж байгаа.”  гэж тайлбарлав.

Мэргэжлийн уран бүтээлчид түүний бүтээлийг “Зохиомж өнгө зохицол арга ажиллагааны хувьд эрч хүчтэй өнгийн тоглолтууд фактур, пятно, бичилтээр шийдсэн байна. Мөн түүний холимог ашиглан бүтээсэн бүтээлүүд нь нэгийг бодогдуулам болжээ.” гэж үнэлжээ.

Тэрээр дүрслэх урлагийн ямар урсгал, чиглэлээр голдуу зурдаг талаараа ярихдаа “Уран бүтээлчид бүтээлээ тодорхойлоод байдаггүй. Бидний уран бүтээлийг урлаг судлаачид шинжин, судалж, тодорхойлно. Би голдуу орчин үеийн урлаг бүтээдэг дээ.” гэв.

Харин түүнээс уран бүтээлчдийн бүтээлүүд соёл, боловсролын болон төр засгийн бодлогод, мөн хүмүүсийн оюун санаанд хэр нөлөө үзүүлж байна вэ хэмээн тодруулахад “Урлаг бол улс эх орны нүүр царай байдаг. Тэр дотроо дүрслэх урлаг бол нэн эртнийх. Бараг л урлагийн анхдагч төрөл гэж хэлж болно гэж би боддог. Тиймээс залуу үе гэлтгүй монголчууд үндэсний дээл, соёл, заншлаа дээдлэж байгаасай. Агуу их түүхээ, байгалиа үргэлж хайрлаж яваарай гэж хэлье. Хүмүүс ингэж чадаж байвал оюун санаанд урлаг нөлөөлсний нэг шинж юм.” гэж хариуллаа.

Ийнхүү залуу зураач Ж.Гүрсэнгийн “Бодлын ертөнц”-ийг сонирхохыг хүсвэл 10 сарын 15-ны өдрийг хүртэл нээлттэй байх нь.

 

www.ardchilal.mn Сурвалжилсан Б.БАЯРМАА

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ