УУЛЫН ОРГИЛД МӨРӨӨ ҮЛДЭЭГЧ Г.ЕВГЕНИЙ ДҮҮГЭЭ ДУРСАХДАА “БОЛОМЖ ҮРГЭЛЖ БАЙДАГ” ГЭВ

uulserta.png УУЛЫН ОРГИЛД МӨРӨӨ ҮЛДЭЭГЧ Г.ЕВГЕНИЙ ДҮҮГЭЭ ДУРСАХДАА “БОЛОМЖ ҮРГЭЛЖ БАЙДАГ” ГЭВ

“Боломж үргэлж байдаг” нэртэй гэрэл зургийн үзэсгэлэнгийн нээлт 10 дугаар сарын 5-ны өдөр Монголын үндэсний музейд боллоо.

Энэхүү үзэсгэлэнг ОХУ-ын спортын мастер, ОХУ-ын уулын авиралтын аварга Сергей Глазуновын дурсгалд зориулжээ. Хоёр өдөр үргэлжлэх үзэсгэлэнгийн нээлтийн ажиллагаанд ОХУ-ын Эрхүү хотын “Горы Байкала” клубээс Г.Сергейн ах, ОХУ-ын хошой аварга уулчин, спортын мастер Евгений Глазунов тэргүүтэй уулчид хүрэлцэн ирж оролцлоо.

Гэрэл зургийн үзэсгэлэнг Монголын Уулчдын Үндэсний Холбоо, ”Монгол хайкинг” клуб хамтран зохион байгуулж байна.Үзэсгэлэнгийн явцад спортын мастер Евгений Глазунов дүү Г.Сергейгээ дурсан ярьсан юм. Түүний дүү Г.Сергей нь Пакистан улсын “Латок1” уулын оргилд хүрэхээр авирагч залуугийн хамт авирч байгаад энэ оны долоодугаар сарын сүүлээр харамсалтайгаар амь эрсджээ.

Евгений Глазунов “Миний дүү Сергей надтай хамт уулын оргил руу авирч явахдаа ч, мөн хэцүү үед ч гэрэл зургаа авсаар байлаа. ОХУ-ын нутаг дэвсгэрт болон дэлхийн улс орнуудад онгон дагшин, хүний мөр хүрээгүй газар олон байдаг. Тэдгээр газраас сонгож хүрэхийг зорьж, уулын оргил руу авирдаг юм. Уулын оргил руу хамгийн хүнд бэрх гарц, ирмэгээр авирахад хүч тэвчээр, оюун ухаан шаардаж их сайхан санагддаг. Жил бүр Крымийн ууланд бид авирдаг. Би 2015 онд ууланд авиралтын зааварлагч болсон. Манай клубт янз бүрийн насны хүмүүс биднээс суралцаж байна.

Би Сергей дүүтэйгээ 4866 метрийн өндөр оргилд гарсан. Тэнд хүний мөр өмнө 1971 онд гарсан ганц бичээс байсныг олж харсан. Мөн бид Эрхүү хотын ойролцоо оршдог Зүүн Саяаны болон Хан Тэнгэр уулын оргилд авирч үзсэн. Крона уулын оргилд бид хоёр дөрвөн цаг авирч, “Алтан медаль” хүртсэн. Бид хоёр ууланд авираад, бууж ирэх болгондоо Новосибирск хотод амьдардаг ээж рүүгээ хамт очдог байсан. Ээж маань бид хоёрыг ууланд авирахад хэзээ ч хориглож байгаагүй.

Дүү Сергейнхээ гэгээн дурсгалд зориулж 80 гэрэл зургийг авчирч, сонирхуулж байна. Оросын маш олон хот, мужуудад дүүгийнхээ гэгээн дурсгалд зориулсан үзэсгэлэнгээ нээсэн. Мөн Польш улсад үзэсгэлэнгээ гаргаж, сонирхуулсан. Одоо өөр хот, мужуудад үзэсгэлэнгээ гаргахаар төлөвлөж байна. Сергей дүү маань уул руу авирч байгаа үеийнхээ видео бичлэг хийж, эвлүүлсэн бичлэг нь надад байгаа. Та бүхэнд үүнийг сонирхуулъя. Ер нь хүнд боломж үргэлж байдаг.” гэж тайлбарлан ярилаа.

Монголын Уулчдын холбооны фээсбүүкт Евгений Глазуновын дүү Г.Сергейн тухай бичснийг сонирхуулъя.

"7 сарын 26 ны өдөр Каракорамын нурууны Латок ууланд харамсалтай явдал болж ослын дуудлага ирсэн билээ. Латок 1 оргилын хойд ханаар хүн авирч гараагүй бөгөөд, энэ асуудал уулчдын сонирхлыг ихээр татдаг байжээ. Тэр тусмаа Piolet d'Or-д хүч үздэг өндөр ур чадвартай уулчдын хувьд К2-с илүү их сэтгэлийг нь татдаг байсан нь гарцаагүй юм. Алегсандар Гуков, Сергей Глазунов нар яг л энэ хүсэл тэмүүллээрээ, хүндээс хүндийг авирч дуусгахаар зориглон хөдөлжээ. Харамсалтай нь 7 сарын 26-ны өдөр Сергей Глазунов 6100м орчим өндрөөс унаж, 26 насандаа ертөнцийн мөнх бусыг үзүүлсэн юм. Хамтрагч Алегсандр Гуков (42 настай) 7 хоног тэссэний эцэст аврагдлаа.

Сергей Глазунов нь ОХУ-н спортын мастер, ОХУ-ын аварга, уулын инструктор, Эрхүү хотын "Горы Байкала" уулын клубийн үүсгэн байгуулагч, "Уулын аврагч" медальтай, Оросын "Алтан ледоруб" шагналын эзэн гайхалтай нэгэн байжээ. Түүний томоохон амжилтуудаас цөөн хэдийг дурдвал: Хан тэнгэр ууланд 6Б ангиллын "Свириденко" замаар авирсан, Ленин, Корженевской, Коммунизм, Хан тэнгэр гэсэн долоо мянган метрээс өндөр 4 оргилд нэг улиралд багтаан авирсан, 20 жилийн турш хүн авираагүй орхигдсон аляскын Саюк Жайлау ууланд шинэ замаар авирч гарсан гэх мэтээр өндөр ур чадвар үзүүлдэг гайхалтай уулчин байжээ." хэмээн түүний ур чадвар, хүсэл зоригийн талаар онлоцн тэмдэглэжээ.

Монголын Уулчдын Үндэсний Холбоо болон Говь-Алтай аймаг, Тонхил сум, Уулын спортын ууган мастер Я.Жанцангийн нэрэмжит “Сутайн бор” клубын Удирдах зөвлөлийн гишүүн, доктор А.Батсүхээс энэхүү фотозургийн үзэсгэлэнгийн нээлтэд зориулж “Горы Байкала видны отовсюду” гэсэн нийтлэл бичжээ. Гэрэл зургийн үзэсгэлэн нь “Орос-Монголын найрамдал, хамтын ажиллагааны өдрүүд-2018”-ийн хөтөлбөрт тусгагдсан юм.

WWW.ARDCHILAL.MN СУРВАЛЖИЛСАН Б.БАЯРМАА

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ