Сэтгүүлчдээ орон сууцанд хамруулахдаа шударга, үнэн бодит сонголт хийгээрэй

setguulchta.jpg Сэтгүүлчдээ орон сууцанд хамруулахдаа шударга, үнэн бодит сонголт хийгээрэй

Монголын сэтгүүлчдийн нэгдсэн эвлэл /МСНЭ/-ийн ерөнхийлөгч Х.Мандахбаярын мөрийн хөтөлбөрт тусгасан "Сэтгүүлчдийн ордон" барих, 1000 сэтгүүлчийн орон сууцны шав тавих ёслол өчигдөр болсон.

Энэхүү баярт үйл явдлын гэрч болж оролцсон сэтгүүлчид орон сууцтай, хэвлэл мэдээллийн салбар ордонтой болох шаваа тавьсанд магнай тэнийж, баяр, хөөртэй угтлаа.

Монголын сэтгүүл зүйн салбарт ажилладаг хүмүүсийн дунд хувиараа бизнес эрхэлдэггүй, зөвхөн сэтгүүлчийн ажлаа гэрээтээр хийж, бага үнэлгээтэй цалин авч амьдардаг сэтгүүлчид нэлээд олон байдаг байх. Мэдээж хэрэг, бүгдээрээ л хямд төсөр үнэтэй байр сууцтай болж, тайван амгалан амьдрахыг мөрөөдөж байгаа. Тиймээс МСНЭ нийгмийн хамгааллын асуудлаа шийдээгүй сэтгүүлчдэд зориулсан "Шинэ Гүрэн" төслийн бүтээн байгуулалтын хүрээнд нэг метр квадратыг нь 1.099.000 төгрөгөөр тооцож, байртай болгох юм байна.

Гэхдээ сэтгүүлчдийн хамгийн их анхаарч, хүлээж байгаа зүйл бол орон сууцыг ямар шалгуураар, хэдэн хувийн хүүтэй, хэдэн хувийн урьдчилгаатай олгогдох тухай асуудал юм. Шалгуураар олгогдох ёстой байранд ар хударгаар нь заль мэх, танил садан, арын хаалганы хүмүүс битгий шургаж ороосой. Харин сэтгүүлчийн ажилдаа шударга, хариуцлагатай, уйгагүй, үнэнчээр хандаж, хөдөлмөрлөж явсан болон одоо ч ажиллаж яваа орон байргүй сэтгүүлчдээ сонгож, байртай болгох нь  хамгийн чухал. Энэ талаар хэлэх нэг нь хэлж ч байна. Бодох нь бодож, бичих нь бичиж байгаа.

Энэ асуудалтай холбогдуулж, сэтгүүлчдийг орон сууцтай болгохдоо ямар шалгуураар сонгон шалгаруулах вэ. Бага цалинтай, өглөө, оройгүй ажиллаад, нэмэлт торлого олох боломжгүй сэтгүүлчид урьдчилгаа 30 хувийг яаж өгөх вэ. Энэ асуудалд судалгаа хийгдсэн үү? гэж МСНЭ-ийн Ерөнхийлөгч Х.Мандахбаяр, Шинэ гарц” ХХК-ийн ерөнхий захирал Б.Бадамрагчаа нараас тодруулсан юм. 

Энэ асуултанд Х.Мандахбаяр хариулахдаа “Ирэх 7 хоногт бүх сэтгүүлчдэд орон сууцжуулах хөтөлбөрийн журмыг танилцуулна. Эхний ээлжинд 100 сэтгүүлчийг байранд оруулъя гэж ярилцаж байгаа. 2019 онд 100 сэтгүүлч байр авахын тулд өрсөлдөх байх. “Шинэ гарц” компанитай байгуулсан гэрээний эхлэл нь энэ юм.

Гэхдээ одоо хоёр компанитай идэвхтэй хэлэлцэл явагдаж байна. Энэ хэлэлцэл хэрэгжвэл 2020 онд сэтгүүлчид дахиад байранд орох боломжтой болно. Сэтгүүлчид чанартай орон сууцанд амьдарснаар ажлын бүтээмж, чанар дээшилнэ.

Ер нь МСНЭ-ээс 4700 гишүүн сэтгүүлчийн нийгмийн асуудал ярьж байгаа. Сэтгүүлчдийг орон сууцанд хамруулахад ерөнхий шаардлага тавигдана. Нэгд, нийгмийн даатгал төлсөн байх ёстой. Хоёрт, Мэргэжлийн сэтгүүлч байж, олон жил сэтгүүл зүйн салбартаа ажилласан байх ёстой. Гуравт, нийгмийн асуудал нь маш их тулгамдсан байх гэх мэт шалгуур байгаа. Мэдээж, 30 хувиа төлөөд байранд хамрагдана. Зээлэнд хамрагдах явцад МСНЭ дэмжиж ажиллана. Энэхүү 30 хувь нь зах зээлийн шаардлагаас хамаагүй бага юм” гэж хэлсэн.

Харин Б.Базаррагчаа “Манай “Шинэ Гарц" ХХК “1000 сэтгүүлчийг орон сууцжуулах” хөтөлбөрийн хамтран хэрэгжүүлэгч, 14 дэх жилдээ барилга, угсралтын чиглэлийн үйл ажиллагаа явуулж байна. Төслийн хэрэгжилт зах зээлийн ханшаар компанийн хөрөнгө оруулалтаар санхүүжигдэнэ.

МСНЭ сэтгүүлчдээ орон сууцжуулах журмаа дотооддоо хэлэлцээд шалгаруулах байх гэж бодож байна. Байранд оруулахын тулд тодорхой хэмжээний сонгон шалгаруулалт, квот байх нь ойлгомжтой. Бид хамтдаа сэтгүүлчдээ дэмжиж, амьдрал ахуйн чанарыг сайжруулах зорилгоор хоёр тал гэрээнд гарын үсэг зурлаа. Хамтын ажиллагааны гэрээний дагуу сэтгүүлч орон сууц авахаар болвол урьдчилгаа 30 хувийг төлөх байх гэж үзэж байгаа.” гэж ярив.

МСНЭ 1000 сэтгүүлчээ орон сууцжуулахдаа шударга сонгон шалгаруулалт явуулж, орон сууцанд зайлшгүй хамрагдах шаардлагатай сэтгүүлчдээ зөв сонгож, хамруулаарай гэж хүсье.

www.ardchilal.mn Б.Баярмаа

 

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ