ХБНГУ-д Батлан хамгаалахын сайд Н.Энхболд айлчилж байна

20-8.jpg ХБНГУ-д Батлан хамгаалахын сайд Н.Энхболд айлчилж байна

ХБНГУ-ын Холбооны Батлан хамгаалахын сайд доктор Урсула фон дер Лайений урилгаар Монгол Улсын Их Хурал, Засгийн газрын гишүүн Батлан хамгаалахын сайд Н.Энхболд Берлин хотноо албан ёсны айлчлал хийж байна.

Герман УлсынБатлан хамгаалахын сайд хатагтай Урсула фон дер Лайен  9 дүгээр сарын 19-ний өдөр Батлан хамгаалахын сайд Н.Энхболдыг Холбооны Зэвсэгт хүчний хүндэт харуулын өмнө хүлээн авч мэндчиллээ. Дараа нь Батлан хамгаалахын сайд Н.Энхболд Холбооны Зэвсэгт хүчний хүндэтгэлийн хөшөөнд цэцэг өргөв. 

Ёслолын дараа Батлан хамгаалах сайд нарын албан ёсны уулзалт хэлэлцээ эхэлж, хоёр улсын харилцаа, батлан хамгаалах салбар дахь хамтын ажиллагааны асуудлаар  харилцан санал солилцсон байна.

Батлан хамгаалахын сайд нар хоёр орны батлан хамгаалах салбарын харилцаа нь талуудын нийтлэг эрх ашиг сонирхол, хоёр орны ард түмний найрсаг харилцааг гүнзгийрүүлэх, бүс нутагт болон дэлхий дахинд цэргийн итгэлцлийг бэхжүүлэхийн төлөө юм. Ийнхүү энх тайван, тогтвортой байдлыг сахин хамгаалах үндсэн зарчимд тулгуурлан шинэ агуулга хэлбэрээр баяжин өргөжиж, эрчимтэй урагшлан хөгжиж байгаад сэтгэл хангалуун байдгаа харилцан илэрхийлэв.

1993 оноос хойш хоёр орны батлан хамгаалах салбарын харилцаа бүх түвшний харилцан айлчлал, Батлан хамгаалах яамд хоорондын зөвлөлдөх уулзалт, цэргийн боловсон хүчний сургалт зэрэг хэлбэрүүдээр амжилттай хөгжиж байгаа аж. 2009 оноос хоёр улсын Зэвсэгт хүчний цэргийн алба хаагчид олон улсын аюулгүй байдал энх тайвны төлөө Исламын Бүгд Найрамдах Афганистанд Улс дахь энхийг дэмжих ажиллагаанд мөр зэрэгцэн үүрэг гүйцэтгэж байгаа юм.

Мөн өдөр Батлан хамгаалахын сайд Н.Энхболд ХБНГУ-ын Холбооны парламентын гишүүн, Төв Ази, Герман-Монголын парламентын бүлгийн дарга ноён Манфред Грундтэй уулзаж, хоёр орны харилцаа, хамтын ажиллагааны талаар санал солилцжээ. 

Ийнхүү Батлан хамгаалахын сайд Н.Энхболдын ХБНГУ-д хийж буй албан ёсны айлчлал амжилттай үргэлжилж байна.

Б.Баярмаа

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ