"Балдорж" шагналын 2018 оны шилдэг тодорлоо

20-3.jpeg "Балдорж" шагналын 2018 оны шилдэг тодорлоо

Монголын сэтгүүл зүйн шилдэг бүтээлийг шалгаруулдаг  "Балдорж" шагнал гардуулах ёслол  10 дахь жилдээ "Улаанбаатар" зочид буудалд 9 дүгээр сарын 19-ны орой боллоо.

Энэхүү хүндтэй шагналыг “Өнөөдөр” сонины сэтгүүлч Т.Энхбат, Ж.Сувдмаа нар хүртлээ. Тэд “Уул уурхайтай “ханилсан” орчин цагийн малчин”  цуврал сурвалжлагаараа 2018 оны "Балдорж" шагналын эзнээр тодорч  цом, өргөмжлөл, 5000 ам.долларын эзэн болов.

Монгол Улсын хоёр дахь Ерөнхийлөгч Н.Багабанди, “Балдорж” сангийн тэргүүн, “Өнөөдөр” сонины нэгдүгээр орлогч эрхлэгч Б.Номинтүшиг нар тэргүүн шагналыг гардуулсан юм.  

Мөн 2018 оны "Балдорж" шагналын дэд байрт МҮОНР-гийн сэтгүүлч Г.Батзаяа, Ж.Золзаяа, найруулагч Б.Лхагвасүрэн нарын хүний эрхийн цуврал нэвтрүүлэг шалгарсан бол шилдэг 10-ын нэгд "Өнөөдөр" сонины сэтгүүлч Х.Уянга “Амьдрал сайн уу”, “Бөөн цагаан нуурын бөөн эмгэнэл”  нийтлэлээр, хоёрдугаар байрт ТВ-9 телевизийн сэтгүүлч Д.Ганзориг “Алт дагасан харуусал буюу гэрийн буйрны эрх мэдэл” бүтээлээр, гуравдугаар байрт “Үндэсний шуудан” сонины сэтгүүлч Б.Энхмарт “Бид болон Монголын тал нутаг” нийтлэлээр /2017 оны “Балдорж” шагналтан/ тус бүр шагналаа. 

"Балдорж" сан нь эхний шилдэг 10 байрт шалгарсан сэтгүүлчдийг шалгаруулсан юм. Монголын сэтгүүл зүйн салбарын уг шагналыг хүртэхийн төлөө сэтгүүлчид бүтэн жилийн турш бэлтгэж, мэргэжлийн ур чадвараараа өрсөлддөг байна. 

Ёслолын ажиллагаанд Монгол Улсын Ерөнхийлөгч асан Ц.Элбэгдорж болон УИХ-ын гишүүн Л.Оюун-Эрдэнэ, Б.Ундармаа, Д.Оюунхорол, Ц.Оюунчимэг, НИТХ-ын дарга С.Амарсайхан, НЗД бөгөөд Улаанбаатар хотын захирагч С.Батболд, МСНЭ-ийн Ерөнхийлөгч Х.Мандахбаяр зэрэг улс төр, нийгэм, эдийн засаг, соёлын салбарын зүтгэлтнүүд, хэвлэл мэдээллийн байгууллагуудын удирдлага, сэтгүүлчид хүрэлцэн ирж, оролцлоо.

“Балдорж” сангийн тэргүүнээр есөн жил ажилласан Ц.Балдорж агсны гэргий Н.Шүр энэхүү үйл ажиллагаагаа 2017 оны БАЛДОРЖ шагнал гардуулах ёслолын үеэр отгон охин Б.Номинтүшигтээ шилжүүлжээ. Иймээс охин Б.Номинтүшиг аавынхаа нэрэмжит шагналыг гардуулах ёслолыг ийнхүү удирдан зохион байгуулсан юм.

Б.Баярмаа

 

 
Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ