Сурвалжлага: Монголчуудын эко хүнсний боломжийг илтгэсэн “Намрын ногоон өдрүүд”

15373604285ba2422c2a5dd.jpg Сурвалжлага: Монголчуудын эко хүнсний боломжийг илтгэсэн “Намрын ногоон өдрүүд”

Энэ онд 13 дэх жилдээ зохиогдож байгаа “Намрын ногоон өдрүүд-2018” нээлтээ хийгээд буй. “Алтан намар” хэмээх аялгуу сайхан дуугаар нээлтээ эхэлсэн энэ жилийн ногоон өдрүүд “Эрүүл хүнс – Эрүүл Монгол хүн” уриан доор Мишээл экспо төвд болж байна.

Үзэсгэлэн худалдаанд 21 аймаг, нийслэл дүүргийн үйлдвэрлэгчид оролцож байгаа хэмээн зохион байгуулагчдын зүгээс мэдээлж байгаа. Үндсэндээ орон нутгийнхан өөрсдийн бренд бүтээгэдэхүүнээрээ оролцож байгаа нь анзаарагдсан. Тухайлбал, Ховдынхон айрагны тос, хөх тарианы гурил, тарвас зэрэг бүтээгдэхүүнээрээ оролцож байгаа бол Говь-Алтай алдарт чипсэн ааруул, Өмнөговийнхон нутгийн давжаа алим, таана хөмүүлийн сорс, Сэлэнгийнхэн утсан загас, хмелийн талх зэргээ дэлгэн арилжиж байна.

Энэ удаагийн үзэсгэлэн худалдаанд 180 гаруй аж ахуйн нэгж, хүнсний үйлдвэрлэл эрхлэгчид, 250 гаруй тариаланч, ногоочид оролцож байна.

Нийслэлийн Хүнс, хөдөө аж ахуйн газрын Хүнсний үйлдвэрлэлийн хэлтсийн дарга А.Цэцэгээгийн тодотгосноор энэ жилийн “Намрын ногоон өдрүүд” Органик хүнсний бүтээгдэхүүний журам гарсантай холбоотойгоор органикт шилжих боломжтой аж ахуйн нэгж иргэдийн бараа бүтээгдэхүүнийг тусгай лангуугаар борлуулахад нь дэмжлэг үзүүлж байгаа аж. Мөн оролцогч аж ахуйн нэгжүүдээс лангууны хураамж авахгүй, үнэ төлбөргүй барааг нь сурталчилж байгаагаараа онцлогтой байгаа гэв.

Жирийн нэг ногоочноос эхлээд жинхэнэ том үйлдвэрлэгчид энэ үзэсгэлэнд бараа бүтээгдэхүүнээ дэлгэсэн нь уг арга хэмжээний агуулга, ач холбогдлыг ямар нэг хэмжээгээр илэрхийлэх аж. Тухайлбал, үндэсний манлай үйлдвэрлэгч “Мах импекс”, “Талх чихэр”, “Өгөөж чихэр боов”, “Сүү”, “Батбайгаль” зэрэг томоохон аж ахуйн нэгжүүд оролцож байна.

Үзэсгэлэнгийн танхим бүхэлдээ монголчуудад экологийн цэвэр хүнс хэрэглэх боломж бүрэн байгааг илтгэн харууллаа хэмээн тодотгож болмоор.

Монгол газар шороонд ургахгүй ургамал ногоо, жимс гэж үгүй бололтой. Тарваснаас эхлээд давжаа алим, хүнсний бүх төрлийн нарийн ногоо, байгалийн жимс, цагаан, улаан хальстай сармис, даршилсан хөмүүл таана гэхчлэн хэрэгтэй бүхэн тэнд дэлгэгдсэн байна билээ.

Ногоон өдрүүдийн өнгийг чимж байгаа бүтээгдэхүүн гэвэл сүү цагаан идээ байв. Энд Европ технологийн бяслагнаас гадна сүүний уураг, Баянхонгорын ингэний айраг, аарц гэхчлэн газар газрын брендүүд үзэсгэлэнгийн танхимд борлуулалт өндөртэй байх аж.

Манай аж ахуй эрхлэгчид Хунчир зэрэг эмийн ургамлыг тарималжуулж, арвин ургац авч байгаа юм байна. Сүүлийн жилүүдэд Монголын хүн орхоодой гэж нэрлэгддэг Хунчирыг хайр найргүй түүснээс үндсэндээ байгалийн нөөцийг нь шавхах дээрээ тулаад байгаа аж. Тэгвэл “Астрарүүт” ХХК Хан Хэнтийн агаар хөрсөнд Хунчирыг тарималжуулаад байна. Эмийн ургамлын хаан хэмээн нэрлэгддэг энэ ургамал нь олон төрлийн өвчнийг анагаах увьдастай юм байна.

Байгаль дээрээ ихэд ховордсон Хунчирыг “Астрарүүт” ХХК-ынхан 470 орчим га-д тариалжээ. Энэхүү ургамлыг Япон, Солонгос зэрэг орон их сонирхож байгаа бөгөөд удахгүй Монголын экспортын бүтээгдэхүүнийг нэгээр нэмэх магадлал өндөр байна.

Газрынх нь хөрс химийн бордоогоор бохирдоогүй, унаган янзаараа шахуу байгаа манай орны хувьд мах, сүү цагаан идээ гээд жинхэнэ органик бүтээгдэхүүн хэрэглэдэг. Харин одоо үүн дээрээ хүнсний ногооныхоо хэрэгцээг дотооддоо бүрэн дүүрэн хангадаг болчихвол монголчуудын хоол хүнсний экологийн цэвэр, аюулгүй байдал хангагдахад тун ойрхон байна.

Манай улс жилд 130 мянга орчим тонн төмс тариалж дотоодын хэрэгцээг 100 хувь хангаж байна гэсэн судалгаа бий. Харин бусад хүнсний ногооны 60 гаруй хувийг дотооддоо үйлдвэрлэж байгаа гэсэн тооцоо судалгаа бий. Үлдсэн 40 хувийг нь урд хөршөөсөө хангадаг гэсэн үг.

“Намрын ногоон өдрүүд”-ийн хүрээнд ногоочид маань тарьж ургуулсан бүтээгдэхүүнээ ченжийн гар дамжуулалгүй шууд өөрсдөө зарж борлуулж байгаагаараа онцлог. Үндсэндээ анхдагч үнээрээ борлуулагдана гэсэн үг. Гэхдээ тээвэр болон үйл ажиллагааны зардал нэмэгдэж таарна.

Үзэсгэлэн худалдааны үеэр талх, гурилан бүтээгдэхүүний дэвшилтэт технологийн талаарх танилцуулга “Баяжуулсан хүнсний тухай хууль”-ийн сурталчилгаа, хэлэлцүүлэг, "жимс, жимсгэнэ" хөтөлбөрийн хүрээнд “хүнсний ногоо, жимс бидний амьдралд” сэдэвчилсэн урлагийн арга хэмжээ, "хүнсний ногоо" хөтөлбөрийн хүрээнд шинэ сортын ногоогоор хийх хоолны үзүүлбэр, амталгаат худалдаа болох юм.

Мөн 20-нд “Хэрэглэгч танаа” болон "Алтан намар" амтат талх, 21-нд “Ногоон хүнс-Эрүүл амьдрал”, 22-нд “Мах, сүүний анхдугаар аян”,23-нд “Хүүхдэд зориулав” зэрэг өдөрлөгийг тус тус зохион байгуулна.

Ногоон өдрүүд энэ сарын 24-ийг хүртэл үргэлжилнэ.

М.Нэргүй

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ