Б.Индра: Зам засварыг зун хийсэнгүй гэж шүүмжилж байна. Графикийн дагуу л хийгдэж байгаа

15373495515ba217af5b684.jpg Б.Индра: Зам засварыг зун хийсэнгүй гэж шүүмжилж байна. Графикийн дагуу л хийгдэж байгаа

Зам засварын ажил хэрхэн үргэлжилж байгаа болон хэзээ дуусах талаар Нийслэлийн Авто замын хөгжлийн газрын орлогч дарга  Б.Индрагаас тодрууллаа.

-Зам засварын ажлын явц ямар байна вэ. Засвар хэзээ дуусах бол?

-Амралтын өдрүүдэд Баянзүрхийн товчоо орчимд автомашинууд бөөгнөрч, ачаалал үүсгэдэг. Товчооны нарийн зам орчимд 4-5 км урт түгжрэл үүсдэг байсан. Тиймээс бид Баянзүрхийг товчоог буулгаад, Богд-Уулын арын замын уулзвар буюу товчоо орчмын замыг дөрвөн эгнээ болгоод өргөтгөсөн. Энэ ажлыг 3-4 хоногийн дотор хийгээд дуусгасан. Далан шорооны ажлаа хийхдээ хэсэгчилж хааж, хөдөлгөөнөө нэвтрүүлсэн. Харин хучилтын ажлаа хийхдээ гурван хоног хаасан байгаа. Мөн Гачууртын уулзвараас Баянзүрхийн гүүр хүртэлх 3.6 км замын нүхэн эвдрэлүүдийг засч, дахин хучих ажлыг хийж байна. Энэ ажлын хүрээнд, Баянзүрхийн товчоо хүртэлх замыг энэ сарын 11-нээс эхлэн түр хаасан. Зам засварын ажлыг 10 хоногийн дотор хийгээд дуусна. Тус чиглэлийн автомашинууд доорх зураглалд заасны дагуу Богд уулын замаар зорчиж байгаа.

-Энэ засварын ажил дуусч, зам ашиглалтад орохоор Баянзүрхийн товчоо орчмын түгжрэл хэдэн хувь буурах боломжтой вэ?

-Зүүн аймгаас ирж байгаа болон явж байгаа автомашинуудын хөдөлгөөний эрчим мэдэгдэхүйц сайжрах учраас зам засварын ажил дуусахаар, тухайн орчны замын ачаалал 40-50 хувь буурна.

-Яармагийн гүүрний ажил ямар шатандаа явж байгаа вэ?

-Яармагийн гүүрний дам нуруунуудаа тавих ажлаа хийж байгаа. Энэ ажлын хүрээнд замыг хэсэгчилж хааж байна. Өөрөөр хэлбэл, урд талын хэсгээ засаж дуусгаад, урд тал дээрээ хөдөлгөөнөө аваад хойд талын хэсгээ хаахаар төлөвлөсөн.

-Хичээлийн шинэ жилтэй давхцаад зам хаалаа гээд иргэд шүүмжлэлтэй хандаж байна. Зун хийх боломжгүй байсан юм уу?

-Манай ажлууд бүгд график төлөвлөгөөний дагуу явагддаг. Энэ ажлууд ч гэсэн графикийнхаа дагуу хийгдэж байгаа.

-Засвартай байгаа замуудаа төлөвлөсөн хугацаандаа өгч чадах болов уу?

-Бид яг төлөвлөсөн хугацаандаа дуусгаж амжина. 9, 10- дугаар сард цочир хүйтрэхгүй бол Яармагийн гүүрийг 11 сарын 1 гэхэд 100 хувь ашиглалтад оруулна.

-Замын цагдаагийн гүүрэн гарцын ажил ямар шатандаа явж байгаа вэ?

-Замын цагдаагийн гүүрэн гарц, Сонсголонгийн гүүр, Баянзүрх дүүргийн Туулын гүүрийн ажлууд бүгд нийтдээ 45 хувьтай явж байгаа. Төлөвлөгөөний дагуу 40 хувьтай байх ёстой ч одоогийн байдлаар таван хувийн илүүтэй ажиллаж байна. Тэгэхээр хугацаандаа ашиглалтад орох бүрэн боломжтой.

-Ойрын хугацаанд хийгдэхээр төлөлвлөж байгаа зам засварын ажлууд бий юу?

-Ойрын хугацаанд бол бид нар өвөлжилтийн бэлтгэл ажилдаа түлхүү анхаарна. Өвөлжилтийн бэлтгэл ажлын хүрээнд үер, усны улмаас эвдэрч, хагарсан өндөр насжилттай автозамуудыг нөхсөн. Нийтдээ 12000Мкв нүхэн хагарал, эвдрэлүүдийг зассан. Одоо орон сууц хорооллуудын доторх томоохон хэмжээний нүхэн эвдрэлүүдийг засч дуусгахаар бригадууд гарчихсан шөнийн 23.00 цагаас өглөөний 07.00 цагийн хооронд хөрөө тавих ажил болон хучирлтын ажлууд хийгдээд явж байна.

-Гэр хороолол руу зам тавих ажлын тухайд?

-Улаанбаатар хотын А, Б бүсэд автозам хангалттай бий болчихсон. Тиймээс 2016 оноос хойш гэр хороолол руугаа түлхүү зам тавьж байна. Гэхдээ гэр хороолол руу зам тавих гэхээр гардаг хамгийн том бэрхшээл нь газар чөлөөлөлтийн ажлууд байдаг. Яагаад гэхээр иргэд зөвшөөрөлгүй газар болон замын транс дээр буучихдаг. Энэ нь зарим хэсгийн замыг ажлыг удаашруулаад байна.

-Зам засахаараа хотын төвийн замаа засчихаад захын хорооллуудаа үлдээчихдэг гээд захын хороололын иргэд шүүмжлэлтэй ханддаг. Энэ талаар тайлбар өгөхгүй юу?

-Иргэд үерийн зам дагуу, замын ус зайлуулах жалгыг шороо асгаж тэгшлээд, гэрээ барьж, хашаа хатгачихдаг. Үүнээс болоод автозам дээгүүрээ ус нь орж ирээд автозамуудыг эвдлээд байдаг. Ийм замыг мөнгө зарлагдаад янзлахаар дараагийн борооноор дахиад л эвдэрчихдэг. Бид янзлахгүй гэж байгаа юм биш. Мэдээж засварлана. Гэхдээ иргэд маань эхлээд иймэрхүү зөрчлөө арилгамаар байна. Автозамын бүтээн байгуулалт нэлээд өндөг өртгөөр бүтдэг. Энэ бол та бүхний халааснаас гарч байгаа мөнгө буюу татвар төлөгчдийн төлсөн мөнгө. Тиймээс үерийн ус зайлуулах жалгыг битүүлж буумааргүй байна. Мөн тийм зөрчил гаргаж байгаа иргэн аж ахуй нэгжүүдэд ойр орчмынхон хүмүүс шаардлага тавьдаг байгаасай гэж хүсч байна. Хэрэв тэгж чавдал, замын эвдрэлээс болж эд хөрөнгөөрөө хохирох асуудал үүсэхгүй шүү дээ.

эх сурвалж: http://www.zaluu.com/read/2992dad8g

Т.Гэрэл

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ