А.Ганбат: Хүмүүн заяаны хорвоод алдаж, оносон хүмүүсийн зөв, буруугийн ялгааг илрүүлж, гэгээтэй талаас нь хардаг

17-16.jpg А.Ганбат: Хүмүүн заяаны хорвоод алдаж, оносон хүмүүсийн зөв, буруугийн ялгааг илрүүлж, гэгээтэй талаас нь хардаг

Монгол Улсад Өмгөөлөгчдийн холбоо үүсч хөгжсөний 90 жилийн ой 9 дүгээр сарын 16-18-ны өдрүүдэд тохиож байна.

Монголын өмгөөлөгчид 90 жилийн ойн баяраа 9 дүгээр сарын 17-ны үдийн өмнө УБЭТ-т баярын тоглолтоор сайхан тэмдэглэлээ. Баярын тоглолтонд хүрэлцэн ирсэн олон зуун өмгөөлөгчид үндэсний дээл, гоёлын хувцсаа өмсч, одон медалиаа энгэртээ зүүж, баяр хөөртэй, цоглог, сүр бадрангуй харагдаж байлаа.

Тоглолтонд сонгодог дуурийн нэрт дуучин ардын жүжигчин А.Долгор, гавьяат жүжигчин Г.Эрдэнэбат,  Чингис хаан одонт, Гавьяат жүжигчин, дуучин Г.Ариунбаатар нар дуулсан бол МУ-ын Ардын Жүжигчин, Төрийн шагналт, XX зууны манлай бүжиг дэглэгч Ц.Сэвжидийн “Жалам хар” бүжгээр өмгөөлөгчдийн хийморийг бадраав.

Мөн Монголын өмгөөлөгчдийн дунд урлагийн авъяастай хүмүүс ч байдаг аж. Тэдний нэг нь өмгөөлөгч, хурандаа, хууль зүйн ухааны магистр А.Ганбат юм. Тэрээр сонгодог урлагийн тайзнаа өмгөөлөгчдийн сүлд дууг маш сайхан дуулсан. 

Энэ үеэр А.Ганбаттай уулзаж, баярын мэнд хүргээд, Та Сонгодог урлагийн тайзнаа өмгөөлөгчдийн сүлд дууг сайхан дууллаа. Өмгөөлөгчдийн тухай дуу нь ямар утга санааг илэрхийлж, өмгөөлөгчдөд юуг ухааруулдаг юм бэ? гэж асуулаа.

Тэрээр ”Би хуулийн байгууллагад 35 жил ажилласнаас 10 жилд нь өмгөөлөгч хийж байна. Цагдаагийн байгуулагад 25 жил ажилласан. Харин би Өмгөөлөгчдийн 90 жилийн ойн баяраар сонгодог урлагийн тайзан дээр гарч, сүлд дуугаа дууллаа. Энэ бол миний хайртай дуу.

Өмгөөлөгчдийн сүлд дуунд сүүгээр амиласан хүмүүн заяаны алдаж, оносон амьдралыг гэгээтэй талаас нь харж, гэмшил нь хойноо ирдэг хорвоо байдаг юм байна. Тиймээс хүний алдаа, оноотой амьдралыг нь өмгөөлөгч бид зөв горимд нь оруулж, ард түмнийхээ итгэлийг дааж явдаг юм гэсэн утгыг агуулсан үгтэй тул надад маш их таалагддаг.

Би хүүхэд байхаасаа энэ дууг дуулсан. Ээж маань хуучир хөгжим тоглодог урлагийн хүн, аав маань бөх хүн юм. Тиймээс урлагийн жоохон ч гэсэн авъяас надад өвлөгдсөн юмуу гэж боддог шүү дээ.

Хүмүүн заяаны хорвоод алдаж, оносон хүмүүсийн зөв, буруугийн ялгааг илрүүлж, гэгээтэй талаас нь хардаг. Тэрхүү алдааг үнэн зөв шийдүүлэхийн тулд өмгөөлөгчийн үүргээ биелүүлж яваа нэгэн өмгөөлөгч би юм.” гэж бахдалтай ярьсан юм.

www.ardchilal.mn Б.Баярмаа

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ