Флорентин Бланк: Бүтээгдэхүүний үнэлгээнд үндэслэж, хяналт, шалгалт хийх үү гэдгийг шийдэх нь чухал

2018-09-11_17.08.03.jpg Флорентин Бланк: Бүтээгдэхүүний үнэлгээнд үндэслэж, хяналт, шалгалт хийх үү гэдгийг шийдэх нь чухал

 “Гадаад худалдааг хөнгөвчлөх: Гааль болон мэргэжлийн хяналтын байгууллагын үүрэг, оролцоо” сэдэвт олон улсын бага хурал өнөөдөр нийслэл хотноо амжилттай зохион байгуулагдлаа.

Монгол Улс  Дэлхийн худалдааны байгууллагын “Худалдааг хөнгөвчлөх хэлэлцээр”-т нэгдэн орсон. Тус хэлэлцээрийг хэрэгжүүлэх хүрээнд Мэргэжлийн хяналтын байгууллага худалдааны саад тотгорыг багасгаж, аюулгүй байдлыг хангах чиглэлээр дунд хугацааны төлөвлөгөө боловсруулан Монгол Улсын Шадар сайдын 2018 оны 17 дугаар тушаалаар батлуулан хэрэгжүүлж байна.

Бага хурлын нэг чухал хэлэлцүүлэг нь мэргэжлийн хяналтын байгууллагын салбар хуралдаан байлаа. Уг хуралдаанаар “Гадаад худалдааг хөнгөвчлөх, аюулгүй байдлыг хангахад мэргэжлийн хяналтын байгууллагын чиг үүрэг, цаашдын зорилт” сэдвээр хэлэлцэв.

Хэлэлцүүлэгт Их Британийн Бүтээгдэхүүний аюулгүй байдал, стандартын агентлагийн Бизнес, эрчим хүч, аж үйлдвэрийн стратегийн газрын гүйцэтгэх захирал Грахам Рассэл, ДБГ-ийн Макро эдийн засаг, худалдаа, хөрөнгө оруулалтын газрын Хувийн хэвшлийн хөгжлийн асуудал хариуцсан ахлах мэргэжилтэн Роберто Галанг, ДБГ, ОУСК-ийн Худалдааг хөнгөвчлөх, хөдөө аж ахуйн экспортын өрсөлдөх чадавхи төслийн зөвлөх Флорентин Бланк нар оролцсон юм.

Энэ үеэр Флорентин Бланкаас тодруулга авлаа.

-Та худалдааг хөнгөвчлөх, экспортын өрсөлдөх чадавхийн хүрээнд ямар зөвлөмж өгсөн бэ?

-Гаалиар орж, гарч байгаа бүх бараа, бүтээгдэхүүнд нэг бүрчлэн хяналт, шалгалт хийгээд ажиллах боломж бололцоо байхгүй.Тийм учраас Мэргэжлийн болон гаалийн байцаагчид ямар төрлийн бүтээгдэхүүн гаалиар илүү их гарч, орж байгаа талаар урьдчилсан мэдээлэл авч байх хэрэгтэй. Тэр бүтээгдэхүүнүүдэд үнэлгээ өгсөн байх шаардлагатай.

Иймээс бүтээгдэхүүний үнэлгээнд үндэслэж, хяналт, шалгалт хийх үү гэдгийг шийдэх нь чухал. Ер нь хяналт, шалгалтыг зорилтот бүлгүүд рүү чиглүүлэх ажлыг хийх шаардлагатай байгаа юм. Ингэснээр бараа бүтээгдэхүүний эргэлтийг сайжруулж, худалдааны урсгал чөлөөтэй явагдана.

-Дэлхийн улс орнуудаас худалдааг хөнгөвчлөх үйл ажиллагаагаар шилдэг, тэргүүлэх зэргийн ямар орнуудын туршлага байдаг вэ?

-Худалдааг хөнгөвчлөх үйл ажиллагаагаар хамгийн өндөр үзүүлэлттэй улс орнуудын тухай Бизнес эрхлэгчдийн тайланд гардаг.Тэр тайланд худалдааг хөнгөвчлөх арга замын тухай болон ихэнх нь Европын холбооны улс орнуудыг тэргүүлэх зэрэгт тэмдэглэсэн байдаг. Жишээ нь, Австрали, Сингапур юм.

Монгол Улсын хувьд олон улсын судалгааны индекст багтаж байгаа. Миний бодлоор Монгол Улс Европын холбооны улс орнуудын гадаад худалдааг хөнгөвчлөх үйл ажиллагааны стандартаас судалж, хэрэгжүүлвэл сайн байх гэж бодож байна.

www.ardchilal.mn Б.Баярмаа

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ