АТГ-аас дөнгөж сая /2022.12.13/ нүүрсний "хулгайч" гэх 17 нэрсийг зарлалаа. Эдгээр нэрс дотор экс Ерөнхийлөгч болон МАН-ын гишүүд хүртэл сүргээрээ багтсан байгаа нь анхаарал татав. Харин хэвлэл мэдээллийнхэн, олон нийтийн дунд цаад гол эзэд, акулууд нь зарлагдахгүй нуугдаад үлдэх вий гэсэн хардлага байгаа нь үнэн. Энэ талаар сэтгүүлчид ч асуув. Гэвч олигтой хариулт олж сонсож чадсангүй.
Авлигатай тэмцэх газрынхан мэдээлэл хийх үеэрээ "ОДООГООР" гэдэг үгийг маш ихээр ашигласан нь анхаарал татав. Ингэхдээ "Одоогоор асуудлыг дөнгөж энэ хүрээнд шалгаж эхэллээ. Асуудлууд цаашид ч хөвөрнө" гэх утгатай үгс хэлж, хариулахаас зайлхийх, сул орон зай үлдээгээд байв.
Тэгэхээр өнгөн давхаргын зарлагдсан хэдээс цааш ухвал ямар хүмүүст хүрэх бол гэдэг асуудал. Бидний анхаарал татаж буй дараах хоёр тохиолдлыг нь хөндвөл.
НЭГДҮГЭЭРТ, А.Ариунболд БА Ж.Мөнхбат
Тэд биенээ албан тушаалд хүргэсэн дарга, цэрэг хоёр гэж хэлж болно. Тодруулбал, А.Ариунболдыг ЭТТ ХК-ийн дарга болох үед ЗГХЭГ-ын дарга байсан Ж.Мөнхбат томилгоонд нь нөлөөлсөн гэгддэг билээ. 2016-2018 оны хооронд "Эрдэнэс Тавантолгой" ХК-ийн Гүйцэтгэх захирлаар ажиллаж байсан А.Ариунболд нь нүүрсний асуудлаар шалгагдаад удаж буй. Хуулийн байгууллагынхан "Тавантолгой"-н ордоос алдагдсан нүүрсний хэрэгтэй холбож тайлбарладаг. Хамгийн сүүлд гэхэд л 2020 оны тавдугаар сарын 4-ний өдөр АТГ-аас саатуулж байв. Гүйцэтгэх захирал байх үес хуулийн байгууллагад баригдаж, пижигнэж байхад ЗГХЭГ-ын дарга байсан Ж.Мөнхбат ам.доллароор хаах лоббиг нь хийж байсан гэх мэдээлэл улстөрийн хөшигний ард яригдаж байсан билээ.
ХОЁРДУГААРТ: Х.Мандахбаяр БА Д.Амарбаясгалан
МСНЭ-ийн дарга байсан Х.Мандахбаярыг уул уурхайн магнат гэсэн автор дагадаг болоод удаж буй. Өмнөговь аймагт нүүрсний бүхэл бүтэн сүлжээ үүсгэсэн ч гэж яригддаг болсон аж. Харин Х.Мандахбаярын ард ЗГХЭГ-ийн Д.Амарбаясгаланг байгаа хэмээн улстөрийн хөшигний ард, ил далдаар яригддаг болсон нь нууц биш. Нарийвчилбал, тэд энэ салбарт хэд хэдэн компаниар халаас холбогдсон хэмээгддэг. Ямар сайндаа Х.Мандахбаярыг МСНЭ-ийн Ерөнхийлөгч болоход нь МАН-ын генсек байсан Д.Амарбаясгалан гол үүрэг гүйцэтгэж байсан сэтгүүлчид рүү “Х.Мандахбаярыг дэмжээрэй” гэж утас цохисон тухай шуум хөврөх вэ дээ.
Тэмдэглэл: Тэгэхээр өнөөдөр зарлагдсан 17 хүн шууд болон шууд бусаар нүүрсний хулгайн асуудалд холбогдсон хүмүүс гэгдэж байгаа юм. Шууд бусаар холбогдсон гэх сэжмүүдийг ухаж үзвэл дээрх мэтчлэн жишээ хэчнээн гарах бол гэсэн тоо ч анхаарал татаж байна. АТГ болон бусад хуулийн байгууллага шалгалтаа чин шударгаар хийж чадвал шууд бус холбоосууд руу нь чиглүүлж чадах эсэх нь цаг хугацааны асуудал. Тухайлахад, А.Ариунболдоор Ж.Мөнхбат руу, Х.Мандахбаяраар Д.Амарбаясгалан руу чиглэж чадах уу.
Эх сурвалж: Eguur.mn
