Клинтон сул тал ихтэй, Трамп шоконд амархан ордог

bx1c51z15b.jpg Клинтон сул тал ихтэй, Трамп шоконд амархан ордог

АНУ-ын Ерөнхийлөгчийн сонгуульд нэр дэвшигчдийн дунд болох гурван цуврал халз мэтгэлцээний эхнийх уржигдар болсон. Мэтгэлцээний үеэр Ардчилсан намаас нэр дэвшигч Хиллари Клинтон болон Дональд Трамп нар хэрхэн биеэ авч явж, ямар асуултад ямархуу байдалтай хариулсныг та бүхэн хэвлэлүүдээс харсан байх. Тэгвэл үүнийг дахин нуршилгүйгээр Ардчилсан намын нэр дэвшигч илт давуу байлаа гэж үзсэн халз мэтгэлцээний дараа Америкийн олон нийт болон нийгмийн идэвхтнүүдийн дундах нэр дэвшигчдийн талаарх үзэл бодол хэрхэн өөрчлөгдөж байгааг сонирхуулж байна.
Мэтгэл­цээнийг ажиглагчид Хиллари Клинтонд 62 хувь нь, Трамп илүү байсан хэмээн 27 хувь нь санал өгсөн билээ. Энэ тухай Нью-Йоркийн экс мэр, Бүгд найрамдах намын нөлөө бүхий улстөрч бас л Трамп шиг шулуухан, задгай шүүмжлэлүүдээрээ алдартай Руди Жулиани хэлэхдээ “Трамп илүү байна, гэхдээ ийм байдлаар өрсөлдөгч рүүгээ довтолсон довтолгоогоо эргүүлж өөр дээрээ алдаад байвал би лав дараагийн мэтгэлцээнийг үзэхгүй. 
Харин Хиллари Клинтоны хувьд сонгуульд ялж чадвал бас л тэнэг Ерөнхийлөгч болох нь дээ” хэмээн үзэл бодлоо илэрхийлсэн нь хэвлэлүүдийн анхааралд ороод байна. Руди Жулиани Ерөнхийлөгч Обамагийн засаглалыг хурцаар шүүмжилдэг бөгөөд намын удирдлагуудаа ч заримдаа хатуухан үгээр гөвшдөг нэгэн. CNN агентлагийн санал асуулгын албаны захирал Жэнифер Агьеста “Санал асуулга Хилларигийн талд эрс өндөр гарлаа. Энэ нь ойрын Ерөнхийлөгчийн сонгуулийн халз мэтгэлцээнд ажиглагдаж байгаагүй эрс тэс үзүүлэлт л дээ. Гэхдээ нэг юм ажиглагдаж байгаа нь Бүгд найрамдах намын нэр дэвшигч энэ мэтгэлцээнд ялалт байгуулна гэдэгтээ тун итгэлтэй, бардам эхлүүлсэн, мэтгэлцээний туршид өрсөлдөгч рүүгээ довтолж байсан ч эргээд энэ тал нь хүмүүст таагүй сэтгэгдэл төрүүлсэн байх. Санал хураалтад оролцсон хүмүүс яах аргагүй улс төрийн үзэл бодол биш сэтгэлзүйн, хүмүүнлэгийн талаа баримталж оролцсоноо өөрсдөө ч анзаараагүй байх талтай” хэмээжээ. Мөн хэвлэлүүдэд дурдагдсанаас үзвэл Хиллари Клинтон сонгогчдын мэдэж байснаас ч илүү сул талтай, ихээхэн эмзэг хүн болох нь илт байна, тэр хэдийгээр олон эвгүй асуултыг өрсөлдөгчдөө таагүй байдлаар эргүүлчихэж дөнгөж байсан ч энэ нь сэтгэлзүйн хувьд маш өндөр бэлтгэлтэй байсны илрэл, тэрбээр сэтгэлийн хөдлөлөө илэрхий хүчтэй дарж, ухаалаг хандахаар маш их чармайж байсан нь илт байна хэмээн бичиж байна. Мэтгэлцээнийг шууд үзсэний дараах хүмүүсийн сэтгэгдэл санал хураалтад нөлөөлж байгаа, харин шинжээчид ялангуяа сэтгэлзүйчид тэдний яриаг нарийн шинжилж, дэнсэлдэг болохыг энд онцолжээ. Ингээд Хиллари Клинтон маш эмзэг боловч сэтгэлзүйгээ асар их хүчээр барьж байснаас болж лав л мэтгэлцээний дараа гүн ядаргаанд өртөх нь лавтай, гэхдээ түүнд эхний мэтгэлцээнд ялж 1:0 болголоо гэсэн үзүүлэлт л чухал байгаа байх хэмээн “Би Би Си” агентлагт бичжээ.
Трампын хувьд Клинтоныг бодвол хэтэрхий задгай, хөнгөн стильтэй хүн учир яг мэтгэлцээний үеэр хувийн шинж чанартай, хурц дайралтын шинжтэй асуултуудаа алдчихаад байсан нь ажиглагджээ. Ялангуяа Америкийн нийгэмд маш эмзэг асуудлууд болох арьс өнгөөр ялгаварлах байдал, гадаад харилцаа зэрэг хүнд сэдвүүд дээр Трамп сэтгэлийн хөдлөл хурдантайгаар илт ялгарч, цохилтыг өөр дээрээ буулгаж байсныг NBC телевизийн хөтлөгч боксчинтой зүйрлэн бичжээ. Түүнийхээр бол Трамп хүчтэй тоглогч, илт илүүрхэх мөртлөө сэтгэлзүйн шоконд амархан өртөж, оноогоо хурдан алдаж, улмаар ялагдаж байгаа боксчинтой адил гэнэ.
АНУ-ын сүүлийн найман удаагийн Ерөнхийлөгчийн сонгуулийн үр дүнг зөв хэлсэн АНУ-ын Америкийн их сургуулийн профессор, улс төр судлаач Аллан Литман энэ удаагийн сонгуульд одоогийн эрх баригч намаас нэр дэвшигч буюу Дональд Трампыг ялах болно хэмээн таамаг дэвшүүлээд буй. Түүний хувьд энэ мэтгэлцээнийг хараад Хилларийг дэмжигчид баярлах болоогүй, Трамп алдаан дээрээ гайхалтай ажилладаг хүн, дараагийн мэтгэлцээнийг сайн харах хэрэгтэй. Хэрвээ Трамп нэг л давамгайлаад эхэлбэл бүхнийг өөртөө ашигтайгаар эргүүлж чадах хүн шүү хэмээн сэтгэгдлээ илэрхийлсэн байна.
 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ