Улсын мэргэн Б.ОРХОН: Шагай харвахад санхүүгийн ямар нэгэн шалтгаан шаардлагагүй

39200721_440300596464167_9155650538719674368_n.jpg Улсын мэргэн Б.ОРХОН: Шагай харвахад санхүүгийн ямар нэгэн шалтгаан шаардлагагүй

-Юуны өмнө цол нэмж, улсын цолтны эгнээнд багтсанд баяр хүргэе.

-Баярлалаа. Энэ жилийн хувьд манай баг амжилт арвинтай байгаа. Булган аймгийнхаа түүхт 80 жилийн ойд багаараа түрүүлсэн. Миний хувьд энэ амжилтаар аймгийн Гоц мэргэн цолны болзол биелүүлээд байсан юм. Харин сая Монгол Улсын мэргэн цол хүртсэндээ баяртай байна.

-Сар хүрэхгүй хугацаанд аймаг, улсын цолыг дараалан хүртэнэ гэдэг мэдээж ховор амжилт байх. Энэ жилийн хувьд хэдэн наадамд цэц сорив?

-Таван наадамд оролцсон юм уу даа. Манай сумын наадам тодорхой шалтгааны улмаас хойшилж, энэ сарын эхээр болсон. Сумандаа багаараа гуравдугаар байр эзэлж, цуваа харваанд түрүүлсэн. Сумынхаа баяр наадмын ганцаарчилсан төрөлд анх удаа түрүүлээд сэтгэл их хөдөлсөн шүү. Багийн хувьд сүүлийн тэмцээнүүдэд гурван наадамд түрүүлж, нэг айрагдаад байна. Ер нь манай багийнхан сэтгэл нэгдэж чаддаг учир сүүлийн үед чамлахааргүй амжилт үзүүлж байна гэж хувьдаа дүгнэдэг.

-Аймгийн дээд цолыг хүртээд сумынхаа наадамд өрсөлдөхөд ямар байв. “Хожигдчихвол яана даа” гэсэн айдас ч юм уу, тийм зүйл төрж байв уу?

-Айдас ч гэмээр юм уу тийм зүйл төрдөг юм билээ. Сумын наадмын эхний өдөр аймгийн шагайн товчооны шийдвэрээр цолыг маань гардуулсан. Найз нөхөд, ах дүүс баяр хүргээд л байсан. Гэтэл би шагайн тэмцээндээ оролцож байгаа юм. Цол зэрэг нэмлээ гээд л наадмын талбайд зарлаад байсан нөхөр нь байр эзлэж ч чадаагүй хожигдчихвол мэдээж онцгүй. Гэхдээ шагайн тэмцээний үр дүн цол зэргийн давуу талаас шалтгаалах бараг л боломжгүй. Тухайн өдөр хэн сайн төвлөрч, аль багийн бие сэтггэл жигдэрсэн байна тэр нь л амжилт гаргаад байгаа юм шиг ажиглагддаг. Улсын үлэмж дархан мэргэнээс бүрдсэн баг сумын наадамд байр эзлэхгүй тохиолдол байж болно. Хэдий ингэж бодсон ч сумын наадмаараа сайн харвах юмсан гэж бодсон.

-Шагайчид наадмын бэлтгэлээ базаахын тулд гал болж гардаг гэсэн. Та бэлтгэлээ хаана хэрхэн базаав.

-Харваачид гал болж наадмын бэлтгэлд гардаг тухай сонсч байсан. Миний хувьд сумынхаа тоглодог залуучуудтай нийлж сум тавихаас гадна ажлынхаа зав чөлөөгөөр ихэвчлэн орой харваж байсан. Энэ байдлыг бэлтгэл хийсэн гэхэд ч бас хэцүү л байх. Гэхдээ бас зүгээр байсангүй.

-Ер нь бэлтгэл ханасан, онохоор байгаа зэрэг өөрт мэдрэгдэнэ биз?

-Мэдэгдэлгүй яах вэ.

-Яг яаж мэдрэгддэг юм бэ

-Юу ч гэмээр юм дээ. Үгээр илэрхийлэх боломжгүй “юм” шиг хэрнээ зөвхөн өөрөө

л мэдэрдэг зүйл хүн бүрт байдаг, тийм үү. Яг л тийм мэдрэмж төрдөг. Хуруу гар хүртэл хөнгөн болчихсон ч юм шиг... нэг л сайхан.

-Тэгвэл тэр сайхан мэдрэмжээ зүүдэлдэг үү?

-За яг онохоор байгаа, үгүй бол бэлтгэл сайн байгаа зэргээ зүүдэндээ мэдэрч үзээгүй. Харин шагай харваж байна гэж эхний жилүүдэд олон удаа зүүдэлж байсан шүү. Одоо ч хаа нэгтэй шагай тоглож байна гэж зүүдэлдэг.

-Ингэхэд та хэдэн жил шагай харваж байж энэ эрхэм цолыг хүртэж байна вэ?

-Анх 2015 онд сумынхаа шагай харвадаг Б.Хуягаа гэдэг залууг дагаж, харваж эхэлсэн. Мөн манай сумаас төрөн гарсан шагайн харвааны томоохон төлөөлөгч Үлэмж дархан мэргэн Л.Түвшинжаргал ах багийнхаа бүрэлдэхүүнд намайг багтааж, зааж зөвлөж дэмжиж байсан.

-Нэг хэсэг шагайн харвааг үндэсний спортын бусад төрлөөс бай шагнал багатай гэж шүүмжилдэг байсан. Одоо бай шагналын хэмжээ өссөн үү?

-Би энэ спортоор хичээллээд төдийлөн удаагүй байна. Харваачдын ярьж байгааг сонсоход нэг үеэ бодвол бай шагнал өссөн гэх юм билээ. Магадгүй сүүлийн жилүүдэд шагай тоглох залуусын тоо өссөнтэй холбоотой энэ спортын үнэлэмж  нэмэгдсэн байж ч болох юм. Үнэндээ энэ тухай сайн мэдэхгүй байна.

-Яг одооны бай шагнал амьдралд нэмэр болж чадаж байна уу?  Уучлаарай хэтэрхий халаас руу тань “өнгийсөн” асуулт асууж байгаад...

-Зарим найз нөхөр, танилын зүгээс иймэрхүү утгатай зүйл асуудаг. Мэдээж шагай харваж орлого олоод амьдралдаа нэмэрлэнэ гэдэг одоогийн байдлаар боломжгүй. Гэхдээ хувь хүний сонирхол гэдэг тэс өөр зүйл биз дээ. Сэтгэл, оюун ухаан, амьдралаасаа тодорхой хэмжээний цаг хугацааг зарцуулсан зүйл бүрээ мөнгө, бай шагналаар хэмжээд байвал юу болох юм бэ. Зүгээр л элдэв зүйл бодолгүй шагай харвах сайхан шүү дээ.

-Ярилцсанд баярлалаа. Амжилт хүсэе танд...

-Баярлалаа. Үүгээр дамжуулаад багийнхандаа болон гэр бүлийнхэн, тусалж дэмжиж явдаг хүн бүрт баярлаж явдгаа илэрхийлье.

 

Ярилцсан Д.ГАНБААТАР

Мэдээ таалагдсан бол лайк дарна уу:

СЭТГЭГДЭЛ (1)

by 2018-10-30

миний ах сайхан ярилцлага өгсөн байна шүү

ШИНЭ МЭДЭЭ