ДӨРВӨН ХҮНИЙ АМЬ АВАРСАН ЗАЛУУ 20 МЯНГАН ДОЛЛАРЫН ШАГНАЛААС ТАТГАЛЗЖЭЭ

3169.jpg ДӨРВӨН ХҮНИЙ АМЬ АВАРСАН ЗАЛУУ 20 МЯНГАН ДОЛЛАРЫН ШАГНАЛААС ТАТГАЛЗЖЭЭ

Хятадын Хэнань мужийн Шиньяан хотын оршин суугч Жан Хаофенг нь зоригтой, сайхан сэтгэлтэй, эгэл даруу нэгэн гэдгээрээ сошиал хэрэглэгчдийн талархлыг хүлээгээд байна. Тэрээр энэ сарын 5-нд Тайландын өмнөд хэсэгт орших Пукет аралд жуулчдын аялж явсан хоёр завь салхинд шидэгдэн доош хөмрөгдөхөд үхэлтэй тэмцэлдэж байсан дөрвөн хүний амийг аварчээ.

Түүний аварсан дөрвөн хүний нэг нь сүйт бүсгүй нь бөгөөд хосууд хуримаа хийхийн өмнө далайн аялалд гарсан нь энэ ажээ. Гэрчүүдийн хэлж буйгаар Жан Хаофенг нь усанд сайн сэлдэг нэгэн бөгөөд эргийн хамгаалалтад хамгийн түрүүнд мэдээ хүргэсэн гэнэ. Дараа нь хүмүүс живж эхэлмэгц серфингийн самбараа хамт явсан ахимаг насны эхнэр, нөхөр хоёрт өгөөд аврах завинд хүргэхийн тулд хамаг хүчээрээ түлхсэн гэнэ. Удалгүй аврах завь ч дүүрсэн тул өөрөө сууж чадалгүй үлджээ. Түүнийг живж байхад өөр нэгэн залуу хөвөгч бөмбөлөг дээр гарган хоёул 12 цагийн турш үхэлтэй тэмцэлдэж байж арайхийн арал дээр ирж аврагдсан байна.

Жан эмнэлэгт хэвтэн эмчлүүлж буй нь

Жан Хаофенгийн сайхан сэтгэлийг үнэлэн компаниас нь 100 мянган юань буюу 20400 доллараар шагнасан боловч авахаас татгалзсан юм. Зоригт залуу энэ тухайгаа “Би өөрийгөө ерөөсөө мундаг гэж бодохгүй байна. Тийм аюултай нөхцөл байдалд хэн ч ийм алхам хийнэ шүү дээ” хэмээн тайлбарлажээ. Харин сүйт бүсгүй нь түүнийг энгийн үед ч хүмүүст байнга тусалдаг энэрэнгүй нэгэн гэдгийг онцолсон ажээ. Хятадын ард түмэн ч түүнийг баатар хэмээн магтаж буй юм.

Энэ осолд зорчигч тээврийн “Phoenix”, “Serenata” хэмээх хоёр завь өртжээ. “Serenata” завин дээр зорчиж явсан 42 жуулчин бүгд эсэн мэнд бол “Phoenix”-ийн 89 зорчигчийн 42 нь аврагдаж, 47 нь амиа алдсан харамсалтай мэдээлэл хэвлэлүүдэд цацагдаж байна.

Б.Мөнхтуяа

Эх сурвалж: Ardchilal.mn

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ