Ц.Даваасүрэн сайд, Д.Сугарын бүрэн эрх дуусмагц АТГ-т шалгуулна

sugarshalgana.jpg Ц.Даваасүрэн сайд, Д.Сугарын бүрэн эрх дуусмагц АТГ-т шалгуулна

Өчигдөр УИХ дахь МАН-ын бүлгээс Цэцийн гишүүнд томилуулахаар Ерөнхийлөгчөөс санал болгосон Ц.Нанзаддорж, Г.Туулхүү, Б.Буяндэлгэр нарыг дэмжинэ хэмээн санал нэгдсэн хэмээн мэдэгдсэн. Тэд Үндсэн хуулийн цэцийн гишүүний бүрэн эрх нь дууссан Д.Наранчимэг, Н.Жанцан Т.Лхагва нарын оронд нэр дэвшиж буй юм.

Мөн МАН-ын бүлэг дээр ҮХЦ-ийн гишүүний бүрэн эрх нь дууссан Д.Сугарын оронд УИХ-аас Үндсэн хуулийн Цэцэд нэр дэвшүүлэхээр Ш.Солонгын нэрийг ярьсан тухай мэдээлсэн.

Эдгээр нэр дэвшигчид нэгэнт олонхийн бүлгийн дэмжлэгийг хүлээгээд явах нь тодорхой. Харин бүрэн эрх нь дуусч байгаа Д.Сугар АТГ-т шалгагдах нь ойлгомжтой болж байна.

Өнгөрсөн хавар УИХ-ын гишүүн, Эрчим хүчний сайд Ц.Даваасүрэн “Үндсэн хуулийн Цэцийн гишүүн Д.Сугарын бүрэн эрхийн хугацаа ирэх тавдугаар сард дуусах бөгөөд хугацаа нь дуусмагц АТГ-т өгч шалгуулна” хэмээн мэдэгдсэн юм.

Тэрбээр тухайн үед “Д.Сугар намайг өөрийнх нь нэр төрд халдлаа гэж Сүхбаатар дүүргийн шүүхэд хандсан байна билээ. Анх 2014 оноос МИАТ-ийн хэргээр ЦЕГ-аар шалгагдаж байгаад АТГ руу шилжээд, АТГ-аас Цэц, УИХ-д энэ хүний бүрэн эрхийн асуудлыг шийдэж өгөөч гэсэн хүсэлт тавьж байсан.

Гэтэл ийм хүн Үндсэн хуулийн Цэцэд суугаад байж болохгүй шүү дээ. Яагаад энэ хүн ийм олон хэрэгт холбогдон, шалгагдаж байсан хэрнээ санаа зовохгүй байгааг гайхаж байна. Санаа зовохгүй байна гэдэг нь энэ хүний мөн чанарыг харуулж байна.

Д.Сугар шиг хүмүүс төрийн чухал албан тушаал дээр очиж байгаа нь төрийн нэр хүндийг унагаж байна. Ирэх тавдугаар сард энэ хүний бүрэн эрхийн хугацаа дуусна. Бүрэн эрхийн хугацаа нь дуусахаар АТГ-т хандаж шалгуулна. Прокурор энэ хүний хэргийг хаасан юм юм билээ. Тиймээс энэ асуудлаар Ерөнхийлөгчид хандана” гэж мэдэгдсэн билээ.

Тэгэхээр Ш.Солонго УИХ-аас ҮХЦ-ийн гишүүнээр сонгогдмогц Д.Сугарын бүрэн эрх дуусгавар болж тэрбээр Ц.Даваасүрэн сайдын өргөдлийн дагуу АТГ-т шалгагдаж эхэлнэ гэсэн үг. Д.Сугар нь ТӨХ-ны дарга байх үед олон ч асуудалд холбогдож байсан.

“Жаст”-ын Ш.Батхүүгийн Эрдэнэтийг Стандарт банкинд тавьсан хэргээс эхлээд түүний холбогдсон гэх хэргүүд цөөнгүй. Мөн Өмнөд Солонгос, Японд үл хөдлөх хөрөнгө буюу орон сууцтай гэх асуудал ч яригддаг. Тэр бүхнийг АТГ шалгах байх хэмээх хүн олон байна.

И.Болд

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ