Ц.Цогзолмаа сайд аа, Монгол хэлний шалгалт авахгүй байгаагаа хэрхэн тайлбарлах вэ?

527-1508401669p1bsprg48h114h12h61r0q1vbn1v7s1-(1).jpg Ц.Цогзолмаа сайд аа, Монгол хэлний шалгалт авахгүй байгаагаа хэрхэн тайлбарлах вэ?

Бага сургуулийн анги дэвших шалгалтаас Монгол хэлний хичээлийн шалгалтыг хасчихсан байна, Боловсролын сайд аа. Чухам яагаад гэдгээ та ард түмэндээ тайлбарлана уу? Уг нь бид чинь хүүхдээрээ хүн хийж авая, “Зөв Монгол хүүхэд”-тэй болоё гэсэн том зорилт дэвшүүлээд явж байгаа бус уу? эсвэл ахиад л хэн нэгэн дарга гарч ирээд өмнөхөө үгүйсгэдэг байдлаар та асуудалд хандав уу? үгүйсгэхдээ хэт улайраад монгол хэлээ хүртэл хэрэглээнээс хасчихаж байгаа юм уу?

Та ард түмний, эцэг эхчүүдийн асууж буй эдгээр асуултад цэгцтэй хариулт өгөх байх гэж найдаж байна. Охин минь энэ жил бага сургуулийн 4-р анги төгсөж, анги дэвших шалгалтаа өгнө. Тэгэхдээ монгол хэлний шалгалт өгөхгүй. Харин түүний оронд хүн байгаль гэсэн билүү? нэг тийм хичээлээр шалгалт өгч байна. Тэгэхдээ “Яавал утааг бууруулах вэ?”, “Байгалиа хэрхэн хамгаалах вэ?” гэсэн сэдвүүдээр зохион бичлэг бичүүлжээ. Эрх барьж буй МАН-ынхан утааг үлдэн хөөж, эх дэлхийгээ хайрлан энэрэхийн тулд хүүхдүүдийн санаа оноог авахаар шийдсэн бололтой юм. Учир нь тэд сүүлийн 30-аад жил эдгээр асуудалд тархиа гашилгаад одоо шинэ сэргэг санаа гарахаасаа өнгөрсөн бололтой. Мэдээж энэ мэт хичээлээр шалгалт шүүлэг авахыг эсэргүүцээд байгаа юм биш. Хамгийн гол нь хажуугаар нь эх сайхан монгол хэлнийхээ түвшин тогтоох шалгалтыг яагаад авсангүй вэ гээд л гаслаад байгаа юм. Энэ мэтээр төрөлх хэлийг нь гадуурхаад хоёр хөршийнхөө, дэлхийн хэлүүдийг нэгдүгээр ангиас нь эхлээд заагаад байх юм бол 10-аадхан жилийн дараагаас Монгол улсаас монгол хэлээрээ цэвэр ярьж, зөв бичдэг хүүхэд залуусыг олохгүй болно. Одоо ч гэсэн дээ тийм залуусыг олоход тун хүндрэлтэй байгааг элсэлтийн шалгалтын дүн мэдээ харуулсаар байгаа билээ. Тухайн улс үндэстний оршин тогтнох, тусгаар тогтнолын гол баталгаа нь тухайн орны хэл байдаг. Хэл нь мөхсөн ард түмэн өөрсдөө харийнханд уусдагийг өнгөрсөн түүхүүд бидэнд хангалттай нотолно.

Монгол хэлний шалгалт авахаа байчихсан юм чинь ирэх жилүүдэд монгол хэлний хичээлийг огт заахаа больсон гэвэл гайхах зүйл үнэндээ алга. Тийм ч учраас энэхүү бодлого тань Монгол улсын бодлого уу, эсхүл өөр аль нэг улсын бодлого уу гэдгийг эрхэм хатагтай, Монгол улсын Засгийн газрын гишүүн Боловсрол, соёл, шинжлэх ухаан, спортын сайд Ц.Цогзолмаа та ард түмэндээ тайлбарлаж өгнө биз ээ.

Чихний чимэг болсон аялгуу сайхан монгол хэлээ ад үзсэн цөвүүн цагийн ард билээ л.  

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ