ОЛОН НИЙТИЙН ЦАГДААГИЙН ЦАЛИН, УРАМШУУЛАЛД 2 ТЭРБУМ ТӨГРӨГ ТӨСӨВЛӨХ САНАЛЫГ ДЭМЖЛЭЭ

p1cdh19gbl1r9r1htt1m2cg1l1osc1.jpg ОЛОН НИЙТИЙН ЦАГДААГИЙН ЦАЛИН, УРАМШУУЛАЛД 2 ТЭРБУМ ТӨГРӨГ ТӨСӨВЛӨХ САНАЛЫГ ДЭМЖЛЭЭ
 УИХ-ын Хууль зүйн байнгын хорооны өнөөдрийн хуралдаанаад Засгийн газраас өргөн мэдүүлсэн “Монгол Улсын эдийн засаг, нийгмийг 2019 онд хөгжүүлэх үндсэн чиглэл” батлах тухай тогтоолын төслийн анхны хэлэлцүүлгийг хийлээ.

Татварын шинэчлэлийг хөгжүүлэх, бизнесийн орчныг сайжруулах, иргэдийн худалдан авах чадварыг нэмэгдүүлэх, уул уурхай, дэд бүтцийн томоохон төслүүдийг эрчимжүүлэх, бодит салбарын өсөлтийг дэмжих зорилтот арга хэмжээг авч хэрэгжүүлэхээр тогтоолд тусгажээ. Тухайлбал, эдийн засгийн бодит өсөлт 8 хувь, инфляцийн түвшин 8 хувиас ихгүй, төсвийн алдагдлын ДНБ-д эзлэх хувь 6.1, Засгийн газрын өрийн түвшин 2019 онд 55.3 хувь, ажилгүйдлийн түвшинг 7.5 хувиас хэтрүүлэхгүй байхаар тооцоолсныг Сангийн сайд Ч.Хүрэлбаатар танилцуулав.

Тэрбээр, “Тогтоолын төсөлд “Мах, сүүний анхдугаар аян”, “Үйлдвэржилт 20:100”, “Ноолуур” хөтөлбөрийг хэрэгжүүлж, хүнд, хөнгөн болон жижиг дунд үйлдвэрлэлийг бодлогоор дэмжих зэрэг 20 зорилт, 123 арга хэмжээний хүрээнд 8.6 их наяд төгрөгийг улсын төсөв, гадаад, хувийн хөрөнгө оруулалт болон бусад эх үүсвэрээр санхүүжүүлэхээр төлөвлөсөн” гэлээ.

Гэмт хэргийн гаралтыг бууруулах чиглэлээр бүх гудамж талбай, тэр дундаа гэр хороолыг камержуулахад анхаарах, хар тамхи, мансууруулах бодисоос иргэдийг хамгаалах, түүний хэрэглээнээс урьдчилан сэргийлэхэд анхаарах зайлшгүй шаардлага тулгарч байгааг Ж.Батзандан гишүүн тогтоолын төслийн хэлэлцүүлгийн үеэр хэллээ.

Улсын хэмжээнд гэмт хэргээс урьдчилан сэргийлэх чиглэлээр 2557 камер ажиллаж байгааг ЦЕГ-ын дарга, тэргүүн комиссар С.Баатаржав хэллээ. Тэрбээр, “Нийслэлийн газар нутгийн 33.1 хувийг  камерын хяналтад авсан. Энэ онд нийслэлд 3243, орон нутагт 1011 камер суурилуулахаар төсөв батлагдсан” гэлээ. Таван жилийн өмнө Монгол Улсын хэмжээнд хар тамхи хэрэглэгч 1500 иргэн байсан бол одоо 5000 болсон гэдгийг мөн дурьлаа. Үндэсний аюулгүй байдлын зөвлөлөөс хар тамхитай тэмцэх чиглэлд 11 заалт бүхий зөвлөмж ирүүлснийг хэрэгжүүлэхээр ажиллаж байгааг хэлсэн юм.

Мөн үеэр УИХ-ын гишүүдийн зүгээс хил дамнасан гэмт хэрэгтэй тэмцэх, сургууль, цэцэрлэгийн орчимд камержуулалтыг түлхүү хийж, бага насны хүүхэд осолд орох, алга болохоос сэргийлэх, хил, гаалийн байгууллагуудын ажилтан, албан хаагчдын нийгмийн хамгаалал, цалин хөлсний асуудалд анхаарч ажиллахыг санууллаа. Мөн С.Бямбацогт нарын гишүүд Улсын бүртгэлийн цогцолбор төв барих, Олон нийтийн цагдаагийн цалин, урамшуулалд 2 тэрбум төгрөг төсөвлөх зэрэг санал гаргасныг хуралдаанд оролцогчдын олонх дэмжлээ. Ийнхүү байнгын хорооноос анхны хэлэлцүүлэг хийсэн тухай санал, дүгнэлтээ Эдийн засгийн байнгын хороонд хүргүүлэхээр тогтов.

Ч.Ариунболд
Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ