ОХУ-Д СУРАЛЦАГЧ ОЮУТНУУДЫН “MOSCHESS 2018” ШАТРЫН ШИЛДГҮҮД ТОДРОВ

p1cde0e80gffa1ioor85qdrhl73.jpg ОХУ-Д СУРАЛЦАГЧ ОЮУТНУУДЫН “MOSCHESS 2018” ШАТРЫН ШИЛДГҮҮД ТОДРОВ
ОХУ-д суралцаж буй оюутан залуусын дунд шатрын аварга шалгаруулах “Moschess 2018” тэмцээн амжилттай болов. Оюунлаг хөгжлийг дэмжигч “Ле Мон” клубээс хоёр дахь жилдээ зохион байгуулж буй энэхүү тэмцээнд шатрын спортоор хичээллэдэг 20 гаруй шатарчин оюун ухаанаа сорин өрсөлдөв.

Дэлхийн сонирхогчдын шатрын 2017, 2018 оны хошой аварга, 2014 оны эмэгтэйчүүдийн насанд хүрэгчдийн шатрын улсын аварга Г.В.Плехановын нэрэмжит Оросын эдийн засгийн их сургуулийн 4 дүгээр курсын оюутан Б.Баярмаа “Moschess 2018” тэмцээнийг нээн, оролцогчдод амжилт хүссэн юм.

Тус тэмцээний тэргүүн байрт  Москвагийн Нийгмийн их сургуулийн хэлний бэлтгэлийн оюутан, 2016 оны “Азийн аварга” фиде мастер Э.Болдоо, дэд байрт Москвагийн Нийгмийн их сургуулийн хэлний бэлтгэлийн оюутан, 2016 оны “Азийн аварга”-ын шагналт  А.Дөлгөөн, гутгаар байрт Москвагийн Холбооны аюулгүй байдлын Албаны их сургуулийн оюутан Д.Батгэрэл нар шалгарч, медаль, өргөмжлөл, мөнгөн шагнал гардав.

Тэргүүн байрын шагналтан Э.Болдоо "Шатрын спортоор хичээллээд 10 гаруй жил болж байна. Москвад оюутан болж ирснээс хойших анхны тэмцээн, их таалагдлаа. Таван өрөг тоглоход тав хожиж тэргүүн байр эзэллээ.Цаашдаа энэ тэмцээнийг алгасахгүй оролцож байх болно” гэв. 

“Ле Мон” клубын тэргүүн Ж.Отгонгэрэл “Манай клубын 5 жилийн ой тохиож буйтай холбогдуулан ОХУ-д суралцдаг нийт оюутан залуусын дунд спортын 3 төрөлт тэмцээн зохион байгуулах зорилт тавьсан. Өмнө бид даам, гарбөмбөгийн төрлөөр тэмцээн зохион байгуулсан. Энэ удаад “Moschess” шатрын тэмцээнийг амжилттай зохион байгуулж зорилтдоо хүрлээ. Шатрын тэмцээнд спортын мастер, дэд мастерууд оролцсон нь тэмцээнийг улам ч  сонирхолтой, өрсөлдөөнтэй болголоо. Оюуны спорт шатраар хичээллэдэг оюутнууд олон бий. Тиймээс тэдний сонирхлыг дэмжихээр манай клуб уг тэмцээнийг анх санаачилсан. Клубын маань энэ жилийн хэрэгжүүлэх ажлын төлөвлөгөөний дагуу үйл ажиллагаа өрнөж байна. "Ухаанаа уралдуулъя”, “Акустик үдэш”, “Нөхөрлөлийн аян”, “Би Монголын төлөө” зэрэг оюутан залуус руу чиглэсэн олон ажил зохион байгуулна"гэв.
Түүнчлэн энэ зун “Ле Мон” клуб, Оросын шинжлэх ухаан, соёлын төв /РЦНК/-тай хамтран ОХУ-д суралцахаар бэлтгэлээ базааж буй оюутнуудад мэдээлэл, зааварчилга өгч, тэднийг чиглүүлэх зорилготой “Би Монголын төлөө” арга хэмжээг зохион байгуулахаар төлөвлөж буйгаа ч дуулгав.
 
Л.Нандиа
Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ