Д.Дулмаа: Цусаа өгөх хүн ерөнхийдөө шингэн зүйлс ахиухан уусан байх хэрэгтэй

2018-05-07_11.19.42.jpg Д.Дулмаа: Цусаа өгөх хүн ерөнхийдөө шингэн зүйлс ахиухан уусан байх хэрэгтэй

Цус сэлбэх үндэсний төвийн нийгмийн ажилтан Д.Дулмаатай цусаа өгөх гэж байгаа хүн өөрийгөө хэрхэн бэлтгэх талаар ярилцлаа.

-Цус авах үйл ажиллагаа ямар хэлбэрээр явагдаж байна вэ?

-Цусаа бэлэглэх үйл ажиллагааг манайх суурин болон явуулын хэлбэрээр зохион байгуулдаг. Явуулын хэлбэрээр зохион байгуулахдаа албан байгууллагад төлөвлөгөө тавьсны дагуу очиж, цуглуулалтаа хийдэг.

-Суурин цэгүүд хаана ажиллаж байна вэ?

-Улаанбаатар хотын хэмжээнд гурван том суурин цэг ажиллаж байна. Баянзүрх дүүргийн Улсын хоёрдугаар төв эмнэлгийн зүүн хойд талд Цус сэлбэх судлалын үндэсний төв Баянзүрх цус цуглуулах төв, нөгөөдөх нь нэгдүгээр эмнэлгийн залгаа Сүхбаатар цус цуглуулах төв, гурав дахь нь Дүнжингарав нэг цэгийн үйлчилгээний төвд тавдугаар сарын 3-ны өдөр нээлтээ хийсэн шинэ төв цус цуглуулах үйл ажиллагааг зохион байгуулж байна.

-Иргэд цусаа өгөхөөр очвол энэ төвүүд хэдэн цаг хүртэл үйлчлэх юм  бэ?

-Өглөө 8 цаг 30 минутаас 13 цаг 30 минтуын хооронд цус авч, үнэ төлбөргүй үйлчилдэг юм. Үдээс хойш шинжилгээ, үйлдвэрлэлтээ хийх, бусад ажлаа зохицуулдаг.

-Цусаа бэлэглэж, олон түмэнд буян үйлдэх талаар мэдэхгүй, сайн ойлгоогүй байгаа иргэдэд хандаж, зөвлөмж өгнө үү. Ямар шалгуур байдаг вэ?

-17-60 насны өөрийгөө эрүүл гэж бодож байгаа ямар ч хүн донор болох боломжтой. Мөн цусаа бэлэглэхдээ тодорхой шалгуур үзүүлэлтүүдэд тэнцэх эсэхээ шалгуулна. Энэ шалгуур нь Эрүүл мэндийн сайдын тушаалаар батлагдсан байдаг. Жишээ нь, ямар нэгэн том мэс ажилбар хийлгэсэн бол нэг жил, жижиг мэс ажилбар шивээс, хөмсөг, биенд гоёлын шивээс хийлгэсэн бол 6 сарын , ямар нэгэн төрлийн эм тариа хэрэглэж, антибеток ууж байгаа бол 14 хоногийн дараа цусаа өгөх олон шалгуур байдаг.

-Цусаа өгч байгаа хүн эхлээд юуг анхаарч, өөрийгөө бэлтгэсэн байх ёстой юм бэ?

-Хамгийн наад зах нь цусаа бэлэглэх гэж буй хүн зургаан цаг тайван унтаж, амарсан, өөх тос, махан хоол, өнгөтэй ундаа жүүс, сүү сүүн бүтээгдэхүүн хэрэглээгүй байх ёстой. Дээрээс нь согтууруулах ундааны зүйлс хэрэглэсэн бол гурав хоногийн дараа цусаа өгч байх юм.

-Тухайлбал, цусаа бэлэглэхийн өмнө ямар хоол хүнс идсэн байх ёстой юм бэ. Сүү сүүн бүтээгдэхүүн яагаад хориотой байдаг юм бол?

-Ер нь монголчууд хүнд буюу махан хоол байнга иддэг. Тиймээс цусаа өгөхөөс өмнө хоол унд идээгүй байна гэсэн үг. Хэрэв ямар нэгэн юм идэхээр болвол хөнгөн маягийн хоол хүнс, хар талх идэх, чихэртэй цай уусан байж болно. Цусаа өгөх хүн ерөнхийдөө шингэн зүйлс ахиухан уусан байх хэрэгтэй.

Б.Баярмаа

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ