Х.БАХЫТХУМАР: ОЛОН ЖИЛ АШИГЛААГҮЙ ГАЗРУУДЫГ ЧӨЛӨӨЛӨХ АЖЛЫГ ЭХЛҮҮЛНЭ

p1ccggut9518g51tf515llsh71jd43.jpg Х.БАХЫТХУМАР: ОЛОН ЖИЛ АШИГЛААГҮЙ ГАЗРУУДЫГ ЧӨЛӨӨЛӨХ АЖЛЫГ ЭХЛҮҮЛНЭ

Урин цаг ирж газар шороо, барилгын ажил эхэлж байгаатай холбогдуулан Өлгий сумын Засаг дарга бөгөөд хотын захирагч Х.Бахытхумараас 2018 онд хийхээр төлөвлөсөн төсөл, арга хэмжээнүүдийг хэрэгжилт болон газар олголтын талаар тодрууллаа.

- Энэ жилд Орон нутгийн хөгжлийн сангийн хөрөнгөөр ямар ажлууд хийхээр төлөвлөв?

-Сумын Орон нутгийн хөгжлийн санд 303 сая төгрөг хуваарилагдсан. Уг мөнгөөр 17 төрлийн ажил хийхээр төлөвлөж байгаа. Иргэдээс гарсан саналын дагуу аймгийн төвийн 1, 2, 3, 4, 8, 10 дугаар багуудын нутаг дэвсгэрт гэрэлтүүлэг тавина. Мөн 8, 11, 12 дугаар багуудад хүүхэд залуучууд, ахмадуудад зориулсан амралтын парк байгуулах юм. Бугат сумын төвийн наад талд байгаа хуучин оршуулгын газрыг хашиж хамгаалах, Хот тохижуулах албанд хог ачих машин, гэрэл цахилгаан засаг өргөгч кран авах зэрэг ажлууд хийгдэнэ.

-Дээрх ажлуудын тендер зарлагдсан уу?

-Хот тохижуулах албаны хоёр машин болон аймгийн Хүүхэд, залуучуудын паркийн дотор гэрэлтүүлэг, чимэглэл, хөгжмийн тоног төхөөрөмж авах ажлуудын тендэрийг холбогдох хуулийн дагуу зохион байгуулсан. Багуудад гэрэлтүүлэг тавих ажлын тендэрийн сонгон шалгаруулалт өнөө маргааш зарлаh dkl dусдынхыг нь энэ сард багтаан дуусгахаар ажиллаж байна.

-Улсын төсвийн хөрөнгө оруулалт болон аймгийн Орон нутгийн хөгжлийн сангийн хөрөнгөөр ямар ажлууд хийгдэх гэж байна?

-Орон нутгийн хөгжлийн сангийн хөрөнгөөр Өлгий сумын 1, 4, 9 дүгээр багуудад хүүхдийн цэцэрлэг, улсын төсвийн хөрөнгө оруулалтаар гуравдугаар багийн нутаг дэвсгэрт цогцолбор сургууль барих юм. Түүнчлэн арваад гүний худаг гаргана. Цэцэрлэгийн тендэр хараахан зарлагдаагүй, харин худгийн зарлаж дуусч байгаа.

-Энэ жил үерийн уснаас хамгаалах далан барихаар болсон гэж сонссон. Энэ ажил юу болж байна?

-Даланг хотын хойд талд барихаар болсон. Техник, эдийн засгийн үндэслэлийг нь өнгөрсөн жил Улаанбаатараас хүмүүс ирүүлж хийлгэсэн байгаа. Төсөвт өртөг нь 24 тэрбум төгрөг гарсан. Санхүүжилт нь салбарын сайдын багцаас шийдэгдэнэ гэсэн. Тодорхой шийдвэр хараахан гараагүй байна.

-Сүүлийн жилүүдэд аймгийн төвийн хүн ам эрчимтэй  өсөж, хөдөө сумдаас ч хүмүүс олноор ирж суурьшиж байна. Одоогийн байдлаар хэдэн иргэн эзэмшил газартай болох өргөдөл гаргав?

-Газар эзэмших хүсэлтэй иргэд маш олон байна. Нийтдээ хоёр мянга орчим өргөдөл хүлээн аваад байгаа. Энэ жил 340 айлд газар олгохоор төлөвлөгөөнд оруулсан ч үерийн далан баригдах газартай давхацсан 80 айлын газрыг түр түдгэлзүүлсэн. Одоо 260 айлд газар эзэмшүүлэхээр ажиллаж байна.

-Шинээр олгох газрыг аль аль багийн нутаг дэвсгэрээс өгөх вэ?

-Одоогоор бол зөвхөн 6 болон 10 дугаар багаас л олгох боломжтой. Иргэдийн хэлж заншсанаар бол Хогийн толгой, Цагааннуур явах зам дагуу гэсэн үг л дээ.

-Дээр хэлсэн хоёр мянган хүнээс 260 иргэнийг яаж сонгож авах вэ?

-Газар өмчлөх хугацаа тавдугаар сарын нэгнээс дуусгавар болно гэснээс болж газартай болох гэсэн иргэдийн тоо өсчихсөн. Нэг айлаас 3-4 хүн өргөдөл өгсөн тохиолдол олон байгаа. Тийм учраас багийн Засаг дарга нарт үүрэг өгч, эхний ээлжид айлын хашаа хөлсөлж амьдарч байгаа, шинээр гэр бүл болж байгаа залуу гэр бүлүүдээс баг тус бүрээс дунджаар 20-иод өрхийн судалгааг гаргаад ир гэсэн. Жагсаалт бэлэн болсон, одоо Газрын албанд өгнө. Захирамж гаргана.

-Үлдсэн хүмүүсийн өргөдлийг яах вэ?

-Хагас жилд Иргэдийн Төлөөлөгчдийн Хурлын хуралдаанд асуудал оруулж, газар олгох төлөвлөгөөнд тодотгол хийхээр төлөвлөж байна. Мөн урьд жилүүдэд эзэмшүүлсэн газруудын дотор олон жил ашиглаагүй газрууд байгаа. Энэ тэнд "газар зарна" гэж зар тавьчихсан байдаг. Тийм газруудын судалгааг гаргана. Эздэд нь мэдэгдэл хүргүүлж газрыг чөлөөлнө. Дэд бүтэц очсон газруудыг эхэлж чөлөөлөхөөр төлөвлөж байна. Уг ажил зуны турш үргэлжлэх бөгөөд чөлөөлөгдсөн газрыг дахиад төлөвлөгөөнд оруулж өргөдөл гаргасан дараагийн иргэдэд эзэмшүүлнэ.

Ө.Нурболат

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ