АНУ-Хойд Солонгосын уулзалт болох өдөр, газрыг шийдсэнээ Трамп мэдэгдлээ

0759d6a0af9d7292f9f3b3fd2cb913ad.jpg АНУ-Хойд Солонгосын уулзалт болох өдөр, газрыг шийдсэнээ Трамп мэдэгдлээ

Тэрээр “Өмнөд Солонгосын ерөнхийлөгч Мүүнтэй удаан, маш сайхан ярилцлаа. Ажил хэрэг тун бүтэмжтэй болж Хойд Солонгостой хийх уулзалтын өдөр, газрыг тогтлоо. Бас Японы ерөнхий сайд Абэтай холбогдож, яриа хэлэлцээрийн үр дүнг мэдээллээ” гэж бичсэн байна.

Трамп үүнээс өмнө уулзах газраар хоёр хувилбар шалгарч үлдээд байгааг Цагаан ордонд болсон хэвлэлийн хурлын үеэр мэдэгдэж байв.

Тэгвэл Баасан гарагт Панмунжомд болсон хоёр Солонгосын уулзалтын үеэр дараагийн дээд хэмжээний уулзалтын товыг эцэслэн шийдсэн бололтой.

Харин өчигдөр орой Трампын мэдэгдлийн дараа АНУ-ын CBS News сувгийн сэтгүүлч Мэжор Гаррет шалгарч үлдээд байгаа хоёр газар нь Монгол, Сингапур улсууд болохыг Вашингтоны засаг захиргааны хоёр эх сурвалжаас тодруулснаа мэдээлжээ.

Өчигдөр бас ASEAN-ий орнуудын 32 дахь дээд хэмжээний уулзалтад оролцож байгаа Сингапурын ерөнхий сайд Ли Хсиен Лүүнээс сэтгүүлчид АНУ-Хойд Солонгосын уулзалтыг зохион байгуулах ямар нэг яриа хэлэлцээр болж байгаа эсэхийг асууж хариулт авсан тухай Strait Times сонин мэдээлсэн байна.

Тэр уг асуултад “Бидэнд ямар нэг албан ёсны хүсэлт аль ч талаас ирээгүй байна. Энэ бол Хойд Солонгос, АНУ-ын хоорондоо тохиролцох асуудал. Тэд тохиролцоонд хүрсэн гэдэгт би эргэлзэж байна” гэж хариулжээ.

Дональд Трамп, Ким Жон Ун нарын түүхэн уулзалт хэзээ, хаана болохыг зарлах цаг ойртож байгааг дээрх мэдээллүүд харуулж байна.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ