Ч.Гантулга: 100 айлын ил задгай худалдааг зогсоож,замыг 4-5 эгнээ болгоно

gantulga.jpeg Ч.Гантулга: 100 айлын ил задгай худалдааг зогсоож,замыг 4-5 эгнээ болгоно

100 айлын барилгын материалын захыг нүүлгэх шилжүүлэх талаар судлах ажлын хэсгийн ахлагч, НИТХ-ын төлөөлөгч Ч.Гантулгаас зарим зүйлийг тодрууллаа.

-100 айлын барилгын материалын захыг нүүлгэх нь гэсэн мэдээлэлд нэг хэсэг нь баярлаж,нөгөө хэсэг нь эмзэглэж байна. Нүүлгэх юмуу,шинэчлэх юмуу?

-Иргэдийн бухимдал үүсгэдэг байдлыг бага багаар, шат дараатай шийдчихээр бизнес эрхлэгчдийн таатай нөхцөл бий болж, орлого ч нэмэгдэнэ.  Тэгэхээр энэ бол эмзэглэх асуудал биш. Харин хотод хийх ёстой шат дараатай авч хэрэгжүүлэх ажил.

Бид Налайхад үйлдвэрийн парк байгуулах тухай ярьж байгаа. Энэ ажил 2-3 жилд хугацаанд хийгдээд, зам тээвэр нь сайжрахаар бүх агуулах, үйлдвэрийг тэнд нэгтгэнэ.  Энэ талаар төлөвлөгөө гаргаж байна.

-Тэгэхээр нүүлгэх гэхээсээ илүү шинэчлэх тал руу ажлууд хийгдэнэ гэсэн үг үү?

-Шинэчлэл тал руу явна. Нүүлгэх гэдгийг хүмүүс буруу ойлгоод байна. НИТХ-аас “нүүлгэх” гэдэг томъёололтой ажлын хэсэг байгуулагдсан боловч уг асуудлаар судалгаа хийж, хэрхэн шинэчлэн зохион байгуулах талаар ажлын төлөвлөгөө гаргаж ажиллаж байгаа юм. Ийм л ойлголттой ажиллаж байна.

-Нүүлгэхгүйгээр 100 айлын түгжрэлийг бууруулах бололцоо хэр байна вэ?

-Яг энэ асуудал ажлын төлөвлөгөөнд орсон. Эхлээд ил задгай худалдааг зогсоогоод зам, талбайгаа чөлөөлөөд авчихна.

Тэгэхээр одоо байгаа 2-3 урсгалыг 4-5 урсгал болгож өргөтгөх боломжтой болно.  Тус зам 1970-аад онд баригдаад түүнээс хойш нэг ч удаа завсар орж байгаагүй юм билээ.

Тиймээс нэгмөсөн шинэчилье, сайжруулъя, явган хүн явах  цэвэр таатай орчныг бүрдүүлье гэж байгаа юм. Замбараагүй зогсоолыг цэгцэлж, эмх цэгцтэй  амьдаръя. Нийслэлийн сая 500 мянган иргэний ая тухай байдлыг хангах томоохон ажлын нэг хэсэг гэж ойлгох хэрэгтэй. Одоо шийдэхгүй бол бид дахиад л олон жил ярина.


Ц.Жаргал

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ