“Эмэгтэйчүүдийн эрх”-ийг хамгаалдаггүй Монгол эрчүүд

330108b28f11ccdebig.jpg “Эмэгтэйчүүдийн эрх”-ийг хамгаалдаггүй Монгол эрчүүд

Герман эмэгтэй талаар хэдэн өдөр л шуугилаа. Мэдээж манайхан чинь элдэв шуугиант асуудалд олон талт байдлаар ханддаг учраас аялагч эмэгтэйг, 13-тай жаалыг, нутгийн залуусыг, бүүр 60 гарсан хөгшин өвгөнийг ч буруутгаж л байна. Учир нь энэ тохиолдолд өмөөрөх, сайчлах зүйл ховор учраас тэр. Бодит байдал ийм биш байлаа ч бидний тухай нэг ийм сөрөг ойлголт ямартаа ч Европ тивд хүрчихлээ. Үүнийгээ дагаад Монгол аялахад тааламжгүй орны жагсаалтад байр ахиж ч мэдэхээр байна.

Харин бодит байдал ямар байгаа вэ гэж өнөөдөр хэн нь эрэгцүүлэн бодож байгаа вэ? Бид аялал жуулчлалыг хөгжүүлэх тухай ярихдаа том, том төслүүд л ярьдагаас биш нийгмийн сэтгэл зүйг ярьдаг билүү. Үүнээс гадна хамгийн чухал нь эл нийтлэлтэй холбоотойгоор эмэгтэйчүүдийн хүчирхийлэлийн асуудлыг хаа сайгүй ярьж эхэлж байна. Энэ нь маш сайн талтай учраас Герман эмэгтэйн үйлдлийг толгой дохин сайшааж ч болно. Эмэгтэйчүүдийн хүчирхийлэл гээд ярихаар бидний чих дүлий, нүд сохор байсаар өдийг хүрсэн. Буудлын өрөөнд архиар цутгуулж, хүчирхийлүүлж нас барсан жаахан охины асуудал өнөөдөр бараг л мартагдаж байна. “Эмэгтэйчүүдийн эрхийг хамгаалах өдөр” гэж өдрийг тэмдэглэн өнгөрүүлдэггүй нийгмийг бүтээж чадвал л эмэгтэйчүүдийн хүчирхийлэлийн тухай мартаж болмоор санагдана. Цаг үе, нийгмээ дагаад ч тэр юмуу, эсхүл энэ төрлийн хэргүүд арай түлхүү илэрдэг болсондоо ч тэр юм уу, гуравхан настай төрсөн үрээ хүчиндсэн, 5 настай охиныг бузарласан зэрэг олон жигшүүрт хэрэг ар араасаа гарсаар байна. Гэсэн ч гэмт хэрэгтнүүд хууль гуйвуулж, ял завшсаар л байна. Тэр ч бүү хэл ард түмнээ төлөөлөн төрд суугаа нь хүртэл хүчингийн хэрэгт холбогдож, яллагдагчаар татагдчихаад байж байх жишээтэй. 

Бүх монгол эрчүүд ийм биш гэдэг амны уншлага болсон үгс нь үнэн байх л даа. Тэгвэл яагаад насанд хүрсэн эр хүний зориг зүрх гаргаад хүчирхийлэлийг таслан зогсоож, өөрөө ч хүчирхийлэл үйлдэхгүй байж болохгүй байна вэ? Ямартаа ч Герман эмэгтэйгийн бичсэн үнэн ч бай, худлаа ч бай өнөөгийн монголд энэ мэт эмэгтэйчүүд охидуудыг хүчирхийлдэг, бузарладаг, үг хэлээр доромжилдог, гарынхаа хүчийг шалгадаг байдал газар авсаар байгаа нь л үнэн юм. Тиймээс тэднийг, биднийг өмгөөлөх өчүүхэн ч учир алга.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ