СЭЛЭНГЭ АЙМГААС УЛСЫН АВАРГА ФЕРМЕР АНХ УДАА ТӨРЛӨӨ

p1c602aetub8f11m81d5u1uod120c3.jpg СЭЛЭНГЭ АЙМГААС УЛСЫН АВАРГА ФЕРМЕР АНХ УДАА ТӨРЛӨӨ

Өнөөдөр УИХ-ын гишүүн Ж.Эрдэнэбат аймагтаа ажиллаж Монгол Улсын аварга фермер Мандал сумын Хэрх тосгоны иргэн Д.Отгонбаяр, Улсын аварга малчин Баянгол сумын иргэн Б.Балжинням, Ерөө сумын Б.Пүрэвжав захиралтай Улсын аварга тариаланч хамт олны шагналыг гардуулан өглөө. Эрхэм гишүүнийг аймгийн Засаг даргын орлогч Б.Нарантуяа, аймгийн ХХААГ-ын мэргэжилтэн Н.Хурц нар дагалдан явлаа.
Монгол Улсын газар тариалангийн үйлдвэрлэлийн элит аймаг Сэлэнгээс энэ жил Монгол Улсын аварга фермер анх удаа төрлөө. Тус аймгийн Мандал сумын малчин Д.Отгонбаяр сүүний чиглэлийн үхэр сонгон үржүүлж, сүү үйлдвэрлэлийн хэмжээг жилээс жилд өсгөн сүүлийн гурван жилд 200-гаад мянган литр сүү үйлдвэрлэж, нэг үнээнээс 5000 гаруй литр сүү ашиглан, жилд 50 гаруй сая төгрөгийн орлого олж, 7 сая төгрөгийн цэвэр ашигтай ажиллажээ. Мөн сумандаа 6 сая төгрөгийн хөрөнгө оруулалт хийж, сум орон нутагтаа ажлын байр нэмэгдүүлэх, ажилгүй иргэдийг ажилтай болгох зорилго тавьж, хоёр хүнийг байнгын ажлын байраар ханган сар бүр 300 мянган төгрөгийн цалин олгож байгаа юм байна. Улсын аварга фермерийн эзэн Д.Отгонбаярын ажлын бас нэг онцлог бол малын хашаа байр, ойр орчмын бэлчээрээ мэргэжлийн байгууллагаар ариутгал халдваргүйжүүлэлт хийлгэж, хэвшсэн нь экологийн цэвэр бүтээгдэхүүн үйлдвэрлэх нөхцөлийг бүрдүүлж өгсөн байна. Түүнчлэн тэжээлийн бүтэц, чанарыг сайжруулах зорилгоор 20 га талбайг хашиж, хамгаалан тэжээлийн ургамал тариалж, жилд 4400 цн ургац хураан ашиглаж байгаа аж. Мөн сүүний үхрийн технологийн шаардлагад нийцсэн 200м2 талбай бүхий битүү дулаан байр барьж, ашиглахын зэрэгцээ үхрийнхээ чанарыг сайжруулах зорилго тавьж жил бүр 21-30 үнээнд зохиомол хээлтүүлэг хийдэг байна. Улсын аварга фермер Отгонбаяр мэргэжлийн байгууллагатай гэрээ байгуулан ажиллаж, мал эмнэлэг, үржлийн арга хэмжээнд мал сүргээ бүрэн хамруулж ажилласнаар таваарлаг сүрэгтэй болж чаджээ.
Ч.Отгонцэцэг

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ