Д.ТРАМП ЦЭРГИЙН ПАРАД ЗОХИОН БАЙГУУЛАХЫГ ПЕНТАГОНООС ХҮССЭН БАЙНА

p1c5q76phmo7611es1soi1qddq911.jpg Д.ТРАМП ЦЭРГИЙН ПАРАД ЗОХИОН БАЙГУУЛАХЫГ ПЕНТАГОНООС ХҮССЭН БАЙНА

АНУ-ын Ерөнхийлөгч Дональд Трамп цэргийн парад зохион байгуулахыг Пентагон буюу БХЯ-наасаа хүссэн тухай “Ассошиэтед Пресс” агентлаг мэдээлжээ.

Д.Трамп өнгөрсөн сарын 18-нд Цагаан ордонд генералуудыг хүлээн авч уулзах үеэрээ энэ онд нийслэл Вашингтон хотдоо томоохон цэргийн парад зохион байгуулахыг хүсэж буйгаа илэрхийлсэн гэж “Вашингтон Пост” сонин энэ долоо хоногийн эхээр анх мэдээлсэн юм.

Үүнтэй холбогдуулан Цагаан ордны Хэвлэл мэдээллийн албаны ерөнхий нарийн бичгийн дарга Сара Хакаби Сандерс өчигдөр мэдэгдэл хийхдээ “Эх орноо хамгаалахын төлөө өдөр бүр амь насаараа дэнчин тавьдаг цэрэг эрсээ Ерөнхийлөгч Д.Трамп ихэд дэмждэг. Тэдэнд Америкийн бүх иргэний нэрийн өмнөөс талархал илэрхийлэн цэргийн парад зохион байгуулахыг Ерөнхийлөгч Д.Трамп БХЯ-наас хүссэн” гэжээ.

Мөн Пентагоны хэвлэлийн төлөөлөгч Чарли Саммерс мэдэгдэл хийхдээ “Цэргийн парадыг яг хэзээ зохион байгуулахыг хараахан шийдээгүй байна. Түүний хүсэлтийг холбогдох албаны хүмүүс дөнгөж авч хэлэлцэж байна” гэжээ.

Францын үндэсний тэмдэглэлт баяруудын нэг болох “Бастилийн өдөр” буюу Бастилийн шорон-цайзыг эзэлсэн өдрийг тохиолдуулан зохион байгуулсан цэргийн парадыг өнгөрсөн долдугаар сард үзсэнийхээ дараа Д.Трамп “Улсдаа үүнтэй адил томоохон цэргийн парад зохион байгуулах юмсан” гэж бодох болсон гэнэ.

Г.Доржханд

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ