Өмнөд Африкт ус алт болж байна

unnamed.jpg Өмнөд Африкт ус алт болж байна

Дөрвөн сая хүн амтай Өмнөд Африкийн Кейптаун хотод гурван жил үргэлжилсэн ган гачгийн улмаас усны хомсдол нүүрлэжээ. Ус хуримтлуулах далангийн нөөц шавхагдаж, эрх баригчид шинэ эх үүсвэр хайж байна.

Тус хотод ирэх дөрөвдүгээр сарын 22 гэхэд айлуудын цорго хаагдаж, усгүй болно гэдгийг мэргэжилтнүүд анхааруулж байгаа юм. Усгүй болох өдрийг “Day Zero” гэж нэрлэсэн байна. Тиймээс оршин суугчид өдөрт 50 литрээс их ус хэрэглэвэл торгох арга хэмжээ авч байгаа ажээ. Хэрвээ ийм хатуу дүрэм тогтоохгүй бол айл өрхүүдээс гадна эмнэлэг, сургууль, цэцэрлэгт ус ханган нийлүүлж чадахаа болих гэнэ.

Одоо Өмнөд Африкийн бусад хотуудаас Кейптауны иргэдэд тусламж болгож, 5 литрээр савласан ундны ус хандивлах сайн дүрийн ажиллагаа явагдаж эхэллээ. Дурбан хотод гэхэд 60 тонн цэвэр ус бэлтгээд байна.

2014 онд Давосын эдийн засгийн чуулга уулзалтын үеэр Танзаны ерөнхийлөгч Жакая Киквет “Манай оронд ядахдаа ганц удаа ч гэсэн үер болоосой” хэмээж байсан билээ. Үнэхээр Өмнөд Африкийн орнууд усны хомсдлын нөлөөгөөр хэрхэн тарчилж байгааг энэ үг гэрчилсэн юм. Жакая Киквет “Манай орны нуур, гол мөрөн хорогдсоор л байна. Виктория нуур нэг метрээр татарсан бол өөр нэг нуур бүр 7 км газар татарсан. Хөрш орнуудын асуудал улам нэмэгдэж, хүмүүс ундны тарчиг эх үүсвэрийн төлөө тэмцэлдэж байна” хэмээн анхааруулж байжээ.

Б.Мөнхтуяа

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ