Эд, эрхтэнээрээ оролдож байж амиа алдав, “Засгийн газар” гуай!

15156490925a56f844ba0bb.jpg Эд, эрхтэнээрээ оролдож байж амиа алдав, “Засгийн газар” гуай!

Зөөллөж хэлэхэд ам дагаж ажилласангүй л гэсэн агуулга үзэгдэнэ. Уул уурхай, хүнд үйлдвэрийн сайдын тухайд хүний урманд Дэд сайдынхаа яриад байгаа асуудлыг судалж, англи хэл дээрх мэдээлэл сэлтийг судлахын оронд “Бодлого зөрвөл явуулна” гэлээ. Тэр ч байтугай Засгийн газрын хуралдаанаар оруулаад л огцруулчихна гэж байна. Хэдийгээр танхимын зарчмаар ажиллах боловч хэрэв сайд дэд сайдынхаа мэдээд байгааг мэдэхгүй өнгөрсөн бол яах вэ гэдгээ дотооддоо ярьсан л байгаасай гэж найдъя.

Төрийн нарийн бичгийн дарга нарын тухайд үнэн хэрэгтээ “цагаач” сэтгэлгээгээр тухалж байгаад морддог улстөрч, сайдуудыг “ирэх, буцах” цагт төрийн байгууллага, салбарын бодлого шийдвэр, хүний нөөц, өмч хөрөнгийг хүртэл өөриймсөн “манаж” үлддэг хоёргүй  сэтгэлээр зүтгэх  жинхэнэ төрийн хар хүн байдаг. Гэхдээ л улс төрд “А”-гүй төрийн нарийн бичгийн дарга гэж хаана байхав. Харин сүүлийн үед хоёр яамны төрийн нарийн бичгийн дарга “бууриа сэлгэх” тохиолдол мэр сэр гарах болсон. Уг нь тэднийг анх томилохдоо тухайн салбарт нь дөхүүлж сонголт хийдэг ухаантай. Тиймээс зохимжгүй л харагдах болсон.

“Оны дараа Төрийн нарийн бичгийн дарга нарыг халж солих ажил эхлэх гэнэ” гэсэн яриа газар авсаар эхнээсээ ажил хэрэг болж эхэллээ. Төрд хэрэгтэй төрийн нарийн бичгийн дарга гэж байдаг юм даа. Нэр заавал сурталчилсан болох биз. Гэвч төрийн өмнө, нийт ард иргэдийн өмнө, Засгийн газрынхаа өмнө онцгой үүрэг даалгаврыг маш сайн гүйцэтгэсэн үзүүлэлттэй төрийн нарийн бичгийн даргаас энэ “хомроголол” эхэлсэн нь харамсалтай. Хэт тогтворгүй байдлаас болж хэн нэгэн сайн ажиллаж байгаа төрийн нарийн бичгийн даргыг “Энэ яасан их удаж байна аа”, “Түүний ард тэр байдаг, том татаастай” гэхчлэн цоллох нь төрийн тогтворгүй байдалд дассаных гэлтэй.

Ямартай ч Засгийн газар өөрөө яамдын төрийн нарийн бичгийн дарга нарыг халж солих эхлэлийг тавьж, нэг сайд нь дэд сайдтайгаа толхилцож эхэлсэн нь “Уг нь нэг намынх шүү дээ. Сайд, дэд сайд нь өөр өөр намынх боловч савандаа багтдаг л байсан юмсан” гэсэн яриаг дагууллаа. Гоё сайхан болох гэж эд, эрхтнээ засч оролдож байж амиа алдсан тохиолдол цөөнгүй байдаг шиг улам сайн болох гэж томилгоогоор тоглох хэрэг байна уу. Шийдэх асуудал олон байна. Хүсээд байгаа бол цагаан сарын дараа Засгийн газрыг чинь тэр чигт нь солиод хөрвүүлээд өгөх хүч ч энд тэнд сэм хуралдсаар байгааг мэдэж байгаа гэж найдъя.

Х.Тулга

Эх сурвалж: Zaluu.com
Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ