Ирэх оны эхний өдрөөс гурван төрлийн татвар нэмэгдэхийг мартаагүй биз

136074.jpg Ирэх оны эхний өдрөөс гурван төрлийн татвар нэмэгдэхийг мартаагүй биз

-СОНГУУЛЬ, ЗАСГИЙН ГАЗАР ОГЦОРСОНТОЙ ХОЛБООТОЙГООР ЗАРИМ ТАТВАРУУД ХЭРЭГЖИХ ХУГАЦАА ХОЙШИЛЖЭЭ-

Энэ оны тавдугаар сарын 1 болон долдугаар сарын 1-ний өдрөөс дөрвөн төрлийн татвар нэмэгдсэн юм. Тухайлбал, тамхи, согтууруулах ундааны онцгой албан татварыг 2018 оноос 10 хувиар, 2019 оноос 5 хувиар, 2020 оноос эхлэн 5 хувиар тус тус нэмэгдүүлэхээр, импортын тамхины гаалын татварын хувь хэмжээг нэмэгдүүлснээр төсвийн орлого 2017 онд 20 орчим, 2018 онд 26 орчим, 2019 онд 27 орчим тэрбум төгрөгөөр тус тус нэмэгдүүлэхээр болсон.

Түүнчлэн автобензин, дизелийн түлшний онцгой албан татварыг нэмсэн. Гэхдээ эдгээр хуулиуд нь хэрэгжих хугацаандаа хэрэгжилгүй хойшилсоор байгаа. Тухайлбал Ерөнхийлөгчийн сонгууль болоод Ж.Эрдэнэбатын Засгийн газар огцорсон зэрэг асуудлаас үүдэж эдгээр хуулийн хэрэгжилт өнөөдрийг хүртэл тодорхойгүй байна. Тэгэхээр ирэх оноос хэрэгжиж магадгүй байгаа юм. Харин суудлын автомашины онцгой албан татварыг хөдөлгүүрийн багтаамжаас нь хамааруулан нэмсэн нь энэ оны долдугаар сард хэрэгжиж эхэлсэн юм. Мөн иргэдийн хадгаламжийн хүүгийн орлогод их, бага хэмжээгээр ялгалгүй 10 хувийн татвар ногдуулахаар болсон энэ онд хэрэгжиж эхэлсэн. Үндсэндээ энэ онд хэрэгжих байсан дөрвөн хуулийн хоёр нь хэрэгжиж эхлээд байгаа.

-ХҮН АМЫН ОРЛОГЫН АЛБАН ТАТВАР НЭМЭГДЭЖ ГАР ДЭЭРХ ЦАЛИН ТАНАГДАНА-

Тэгвэл ирэх оны нэгдүгээр сарын 1-ний өдрөөс гурван төрлийн татвар нэмэгдэхээр байгаа билээ.Үүнд хувь хүний орлогын албан татварыг шатлалтай нэмэгдүүлэхээр тооцсон. Энэ нь цалин хөдөлмөрийн хөлс болон түүнтэй адилтгах хөдөлмөр эрхлэлтийн орлогод 2018 оны нэгдүгээр  сарын 1-нээс эхлэн 10-25 хувиар 4 шатлал бүхий татвар ноогдуулахаар болжээ.

Ингэснээр 500 мянгаас 1.5 сая хүртэлх цалинтай иргэдийн гар дээрх цалин багадаа 8 мянгаас 35 мянган төгрөгөөр танагдах тооцоотой байна.

Харин үүнээс дээш цалинтай иргэдийн татварын ачаалал нэмэгдэх төлөвтэй байна. Тухайлбал сарын 2,5 сая төгрөгийн орлогод 11,2 хувиар, сарын 4 сая төгрөгийн орлогод 15,1 хувиар татвар ногдож байна. 

Өнөөдрийн байдлаар 900 мянга орчим татвар төлөгч бүртгэлтэй байгаа бол нийт татвар төлөгчдийн 95 орчим хувь нь 10-аас бага хувиар татвар төлөхөөр үлдсэн 5 хувь нь татварын шатлалд хамрагдаж 10 хувиас их татвар төлөхөөр болж байгаа юм.  Ингэснээр тус татвараас төсвийн орлого 2018 онд 51,5 тэрбум төгрөгөөр нэмэгдэнэ гэж үзжээ. 

Мөн дээр дурьдсан архи, тамхины онцгой албан тамхины татварыг энэ онд нэмэгдүүлэхээр тусгаж ирэх онд дахин шатлалтайгаар нэмэхээр болсон ч энэ онд хэрэгжээгүй байгаа.

Харин нийгмийн даатгалын тухай хуулийн дагуу ажил олгогчийн хөдөлмөрийн хөлсний сан, түүнтэй адилтгах орлого болон даатгуулагчийн хөдөлмөрийн хөлс, түүнтэй адилтгах орлогоос төлөх тэтгэврийн даатгалын шимтгэлийн хувь хэмжээг 2017 онд тус бүр 7 хувь, 2018 онд тус бүр 8 хувь, 2019 онд тус бүр 8,5 хувь, 2020 онд тус бүр 9,5 хувьтай байна.  Харин сайн дурын даатгуулагчийн тэтгэврийн даатгалд сард төлвөл зохих шимтгэлийн доод хэмжээ нь 2017 онд хөдөлмөрийн хөлсний доод хэмжээний 10 хувиас, 2018 онд 11 хувиас 2019 онд 11,5 хувиас 2020 онд 12,5 хувиас багагүй байх өөрчлөлт оруулахаар тусгажээ.Ингээд харахаар ирэх онд гурван төрлийн татвар хэрэгжих мэт харагдавч энэ онд гацсан хоёр төрлийн татварын хууль мөн давхар хэрэгжиж эхлэхээр харагдаж байгаа юм. 

Т.БАТСҮРЭН

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ