Бүсчилсэн хөгжлийн бодлогыг шинэчлэхэд ахиц гаргана

shua1.jpg Бүсчилсэн хөгжлийн бодлогыг шинэчлэхэд ахиц гаргана

ШУА, Үндэсний хөгжлийн газар хамтарч “Хамтын ажиллагааны санамж бичиг”-ийг есдугаар сарын 1-ний өдөр байгууллаа.

Тус хоёр төрийн байгууллага нь хөгжлийн бодлогын баримт бичгүүд болон бүсчилсэн хөгжлийн бодлого боловсруулах ажлын хүрээнд эдийн засгийн салбаруудын орон зайн төлөвлөлтийн 90 орчим судалгааны ажлыг хийх, 60 орчим хэлэлцүүлгийг орон даяар зохион байгуулах ажлыг эхлүүлжээ. Хоёр талын санамж бичигт ШУА-ийн ерөнхийлөгч, академич Д.Рэгдэл, ҮХГ-ын дарга Б.Баярсайхан нар гарын үсэг зурав.

ШУА-ийн ерөнхийлөгч, академич Д.Рэгдэл хэлсэн үгэндээ “Юуны өмнө ҮХГ-аас санаачлан эрдэмтэн, судлаачид бидэнтэй ийнхүү хамтран ажиллахаар болсонд талархаж буйгаа илэрхийлье. ШУА-ийн хувьд шинжлэх ухаан, технологи төдийгүй улс орны хөгжлийн асуудлаар төрийн захиргааны төв байгууллага, орон нутгийн өөрөө удирдах ёсны байгууллагуудтай сүүлийн 4,5 жилийн турш идэвхтэй хамтран ажиллаж ирлээ. Бүсчилсэн хөгжлийн үзэл баримтлалыг шинэчлэх асуудал 2000 онд эхлээд 2008, 2009 оноос хойш тасарсан байдаг. Бид хамтран ажилласнаар Бүсчилсэн хөгжлийн үзэл баримтлалыг шинэчлэх ажилд томоохон ахиц гарна гэдэгт итгэлтэй байна” гэж онцлосон юм.

Санамж бичгийн хүрээнд хоёр тал олон улсын эрдэм шинжилгээний байгууллагуудтай хамтарсан судалгааны ажлуудыг зохион байгуулах ажээ. Энэхүү судалгааны үндсэн дээр “Бүсчилсэн хөгжлийн олон улсын онол практикийн бага хурал”-ыг Монголд 2018 оны эхээр зохион байгуулахаар болжээ. Түүнчлэн “Хөгжлийн бодлого төлөвлөлтийн тухай хууль”-ийн дагуу энэ онд төрийн болон төрийн бус байгууллага, мэргэжлийн холбоод, хувийн хэвшлүүдийн орон зайн төлөвлөлтийн талаарх саналыг авч нэгтгэх юм байна.Үүнд үндэслэж холбогдох судалгааны ажлуудыг боловсруулах, хэлэлцүүлэг, зөвлөгөөнийг салбар тус бүрээр үндэсний болон орон нутгийн хэмжээнд зохион байгуулахаар тохиролцсон байна.

Үндэсний хөгжлийн газрын зүгээс хөгжлийн бодлогын баримт бичиг боловсруулах ажилд ШУА-ийн эрдэмтэн судлаачдыг өргөнөөр хамруулах ажээ. Эрдэмтэн, судлаачдын хийсэн судалгааны ажилд үндэслэн шинжлэх ухааны үндэслэлтэй, иргэн бүрт хүрсэн төлөвлөлт хийхийг зорилготой байна гэж зохион байгуулагчид нь хэлэв.

Б.Баярмаа

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ