Засаг унах бус Улс дампуурах АЮУЛ

1470884521_olloo_mn_1408413790_ur.jpg Засаг унах бус Улс дампуурах АЮУЛ

Засгийн газрыг огцоруулахаар МАН-ын гишүүд гарын үсэг зурж, түүнийгээ УИХ-ын дэд дарга Я.Санжмятавт өргөн барьсан. Чухам яагаад АН-ын гишүүн Я.Санжмятавт өргөн барив гэдэг бас л нэг бодох ёстой асуудал. Учир нь МАН-ын ГОМДОГСОД 30 гаруй болтлоо өргөжөөд гарын үсэг зурчихсан учир “Одоо та нарын хийх ажил үлдлээ. Бид хийдгээ хийлээ” гэж АН-ын 11-н гишүүд шууд хэлж байгаа хэрэг юм.

Засаг унагахаар улайрсан ГОМДОГСОД:

Тэгвэл Засгийн газрыг огцоруулсанаар юу болох вэ, бодоцгооё. Ирэх он гарангуут бид өнөөх алдар цуут Чингис, Самурай зэрэг бондуудынхаа төлбөрийг төлж эхэлнэ. Гэвч засаг, төр тогтворгүй байснаар бид энэ төлбөрөө төлж чадахгүй. Улмаар улс орон даяараа “дефолт”/дампуурал/ зарлана гэдгийг Сангийн яамных нь Төрийн нарийн бичигийн даргаас авхуулаад монголдоо толгой цохидог эдийн засагчид сануулж байгаа.

Үүний илрэл нь Олон улсын валютын сангийнхан дараагийн санхүүжилтээ хүлээлгийн горимд шилжүүлсэн явдал мөнөөсөө мөн. Дээрээс нь Энэтхэг, Хятад зэрэг улсуудаас орж ирэх байсан тусламж, зээл дуу дуугаа авалцан хүлээж эхэллээ. Мэдээж хөрөнгө оруулагчид ч гэсэн болгоомжлол тээж улс төрийн шийдвэрийг хүлээн элгээ эвхсэн шигээ сууж байна. Энэ бүхнийг эхлүүлсэн нөхдүүд бол МАН-ын ГОМДОГСОД гэж нэрлэгдээд байгаа У.Хүрэлсүх тэргүүтэй нөхөд.

Гэвч У.Хүрэлсүх тэргүүлсэн гэхээсээ илүүтэй Л.Оюун-Эрдэнэ, Т.Аюурсайхан мэтийн өнгө мөнгөнөөс болчихсон “нусан буунууд”-ынхаа үгээр явж байна гэж харахад хүргэж байна. Тэд л “мөрдөх, чагнах” гэсэн зүйлийг сэдэж, ах дүүсээрээ хамтран хийсэн “бичлэгээ алдсан” болж жүжиглэж/Херо Баатар, Л.Оюун-Эрдэнэ 2 ах дүүс/ байх шиг. Тэгээд ч гарын үсэг зурсан нөхдүүдийн дотор МАН-ын лидер гээд хэлчих чансаатай улстөрч бараг л харагдахгүй байна. Ингэж Хүрэлсүх “өөрийн толгойгүй” ажилласны горыг татвар төлөгч жирийн иргэд, жирийн монголчууд амсахаар болж байна.   

Дампуурлаас аврах ЭВ НЭГДЭЛ:

Харин энэ бүх аюулаас мултрахын тулд хаа хаанаа ухаантай, алсын хараатай байх нь чухал болоод байна. Мэдээж ГОМДОГСОД-ын зүгээс ч ухаан суух хэрэг байгаа бөгөөд МАН-ын өнөөгийн удирдлагууд, намын лидерүүд ч энэ бүхнийг маш сайн ойлгох хэрэгтэй боллоо. Ингэж эхний ээлжинд нам дотроо ойлголцож засаг төрөө тогтвортой байлгах, эдийн засгаа сэргээх, олон улс, хөрөнгө оруулагчдад итгэл хүлээлгэх зайлшгүй шаардлага гарлаа.

С.Эрдэнэ тэргүүтэй АН-ын нөхөд ч гэсэн дуун дээр нь кноп дарж засгаа унагаад улс орноороо дампуурах, эсхүл алдаа дутагдлыг нь хүчтэйхэн шүүмжлээд, засч залруулаад нэгэн чигт бодлогоор явах гэсэн сонголтыг хийх хэрэгтэй. Тэд мэдээж юугаа сонгох нь тэдний эрх байж болох ч цаана нь тэдэнд итгэл үзүүлсэн мянга, мянган иргэдийн ажил, амьдрал, ирээдүй хойч бий гэдгийг ухаарна биз ээ.

Үүн дээр нэмэгдээд Монгол түмний ЭВ НЭГДЭЛ-ийг илэрхийлэгч Ерөнхийлөгчийн үүрэг асар чухал. Х.Баттулга гэж хүн аль намаас сонгогдсон байх нь энэ асуудалд тийм ч олигтой үзүүлэлт болохгүй бөгөөд тэрээр “нам бус” болсон байх учиртай. Тэгээд ч түүний хажууд Н.Алтанхуяг мэтийн яг ийм зовлонг хэдхэн жилийн өмнө биеэр амсаж, гарах гашуун үр дагавар нь ард түмэнд ямар хүнд тусдагийг мэдэх зөвлөгч нар бий. Тэд ч гэсэн зөвлөхийн үүргээ биелүүлсэн шиг биелүүлж улс орноо хөл дээр нь авч үлдэх хэрэгтэй байна. Эцэст нь хэлэхэд Засгийн газар унаж, дараагийнхаар солигдохдоо ч биш бөгөөд унаж дампуурсан улс маань хөл дээрээ босохгүй бол яах вэ л гэдэгт байгаа юм. Харин тэд өөрсдийгөө бодсон шийдвэр гаргах байлаа ч ГОМДОГСОД болоод ГОМДООГСОД та бүхэн хэнийгээ хуурч, хэнийгээ мөлжиж, хаанаас мөнгө босгож халаасаа дүүргэх вэ гэдгээ сайн бодоорой.  

Т.ДАЛАЙ

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ