"Бат-Оршил" хэмээх Даншиг наадам эхэллээ

danshig.jpg "Бат-Оршил" хэмээх Даншиг наадам эхэллээ
"Даншиг наадам- Хүрээ цам-2017” шашин соёлын үйл ажиллагааны албаг ёсны нээлт наймдугаар сарын 5-ны өдөр 11.00 цагт Төв цэнгэлдэх хүрээлэнд болно.

Нээлтийн өмнө Гандантэгчэнлин хийдэд 09.00 цагт Хүрээ жахар цамын хурал, Төв цэнгэлдэх хүрээлэнгийн гадна талбайд дотоодод үйлдвэрлэсэн бараа бүтээгдэхүүнийг сурталчлан таниулах зорилго бүхий “Аялал жуулчлалын үзэсгэлэн” нээлт боллоо. Харин дараа нь 10 цагт Төв цэнгэлдэх хүрээлэнд сүсэгтэн олонд Итгэл, Ганданлхавжаа, Ногоон дарь эх, Цагаан дарь эх ном айлдаж байна. Үүнийн дараа албан ёсны нээлт болох юм.

Нээлтийн үеэр Соёмбот туг залах ёслол болж Мандал өргөх бол Өндөр Гэгээний “Цагийг тохинуулагч залбирал”-ыг бүх нийтээр уншиж, Очирваани шүтээний тахилга хийх юм байна. Тахилгын дараа хүчит 256 бөхийн барилдаан эхэлж, 1-4-ийн даваа явагдах ажээ.
 


Даншиг наадмын үеэр Унзад, голч нарын тэмцээн, Ном хаях, мэтгэлцэх болон Балин болон тосон урлалын тэмцээн, мөн Нийслэлийн “Улаанбаатар” чуулга ”Colors of Mongolia” тоглолтоо толилуулахаар хөтөлбөрт тусгажээ.

Хөтөлбөрт Төв цэнгэлдэх хүрээлэнгийн гадна талбайд нийслэлийн есөн дүүргийн ардын авъяастнуудын “Монголын гайхамшигт урлаг” тоглолт, ЮНЕСКО-гийн дэлхийн өвд бүртгэгдсэн соёлын өвийн “Дэлхийн өв-Монгол соёл” үзэсгэлэн 11 цагаас эхэлж, оройн 19 цаг хүртэл үргэлжлэх юм.
 

Гурав дахь жилдээ болж буй Даншиг наадам нь Монголын шашны тэргүүн Өндөр гэгээн Занабазарыг залах үеэс эхэлсэн байна. Энэхүү баярыг анх 1639 онд Цагаан нуур хэмээх газарт Түшээт хан, Сэцэн хан тэргүүтэй Халхын хаад, ноёд, энгийн ард олон цугларч, Түшээт хан Гомбодоржийн таван настай хөвгүүн Занабазарыг Халхын шашны тэргүүн анхдугаар Богд Жавзандамба хутагтын ширээнд өргөмжилж, их баяр ёслол үйлдэж хийсэн түүхтэй ажээ. Даншиг гэдэг нь монголоор “Бат-Оршил” хэмээх утгатай гэнэ. Энэхүү наадмын ёслолд Гандантэгчинлэн хийдийн 120 гаруй лам хуврага оролцож байгаа юм.

 

Б.Баярмаа

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ