“Хөдөө гэр” төсөл нь монгол ахуй соёл, байгалиа унаган төрхөөр нь хамгаална

huduu_ger1.jpg  “Хөдөө гэр” төсөл нь монгол ахуй соёл, байгалиа унаган төрхөөр нь хамгаална

“Хөдөө гэр” төслийн танилцуулгын талаар Нийслэлийн Аялал жуулчлалын газартай хамтарсан хэвлэлийн хурал НҮБ-ын байранд наймдугаар сарын 3-ны өдөр боллоо.

Технож Бизнес Инкубатор төв ТББ-ын захирал Г.Галаарийдий  энэ үеэр ярихдаа “Энэхүү төсөл нь тогтвортой, өсөх ирээдүйтэй аялал жуулчлалын үйл ажиллагаанд ойн нөхөрлөлүүд-малчдын оролцоог нэмэгдүүлэх, сурган чадавхижуулах, тэднийг хамарсан аялал жуулчлалын бүтээгдэхүүн бий болгон зах зээлд амжилттай нэвтрүүлэх зорилготой юм.” гэсэн юм. Төсөл нь энэ оны зургаадугаар сараас 2019 он хүртэл хоёр жилийн хугацаатай ажээ.

Уг төсөлд  Булган, Сэлэнгэ, Хэнтий, Дорнод, Өвөрхангай, Дундговь аймгуудын ойн нөхөрлөл, байгаль хамгаалагч малчдын бүлэг хамрагдаж байна. Төслийн санхүүжүүлэгч ЮНСЕФ-ийн төслийн зохицуулагч н.Ганбаатар, Нийслэлийн аялал жуулчлалын газрын мэдээлэл сурталчилгааны хэлтсийн дарга Д.Жавхлан, Ойн нөхөрлөлүүдийн төлөөллүүд байр сууриа илэрхийллээ.

Хэвлэлийн хурлын үеэр “Ойн нөхөрлөлийг дэмжих замаар Орон нутгийн иргэдэд түшиглэсэн аялал жуулчлалыг хөгжүүлэх арга зам” хэлэлцүүлэг болж, чөлөөт уулзалт,  ярилцлага болсон юм. Мөн Монгол ахуй соёлыг үзүүлж, цагаан идээ амталгаа болов.

Өргөн уудам нутаг дэвсгэртэй хүн ам цөөтэй манай улсын хувьд байгаль орчноо хамгаалах аргуудын нэг нь нутгийн иргэдийн оролцоонд түшиглэсэн байгалийн нөөцийн хамтын менежментийг төлөвшүүлэх, нөхөрлөлийг урт хугацаанд тогтвортой ажиллах нөхцөлийг бүрдүүлэх явдал юм. Ойн нөхөрлөлүүд нь хүний хүчин зүйлтэй холбоотой зөрчлийг багасгах, өөрийн нутаг, байгалиа хамгаалах харуулын үүргийг сайн  дураараа эрхлэн гүйцэтгэдэг.  Гэсэн хэдий ч одоогийн байдлаар ямар ч албан ёсны урамшуулал, цалин байхгүй ажилладаг.  Иймээс НҮБ, нийслэлийн Аялал жуулчлалын газар, “Технож” бизнес инкубатор төв ТББ хамтран нийт аялагчид, Монголчууддаа хандан дараах уриалгыг гаргаж байна.

БАЙГАЛЬ ОРЧИНД ЭЭЛТЭЙ, ХАРИУЦЛАГАТАЙ АЯЛЛААР ДАМЖУУЛАН ОЙН НӨХӨРЛӨЛ, НУТГИЙН ИРГЭДИЙГ ДЭМЖЬЕ. БАЙГАЛИЙН САЙХАНД БАГА ЗАРДАЛТАЙГААР АЯЛАНГАА МОНГОЛ АХУЙГААСАА СУРАЛЦЪЯ.

Нэрд гарсан цөөн газарт аяллаар явах, даац хэтрүүлэх байдал сүүлийн жилүүдэд ихээр гарах болсон. Гэтэл Монгол орон өргөн уудам, байгалийн үзэсгэлэнт болон түүхийн ховор нандин дурсгал бүхий газрууд их байдаг. Судалгаа төлөвлөлтгүй, зохион байгуулалтгүй аялал их байна. Идэвхтэй үйл ажиллагаа явуулдаг жуулчны баазууд нь цөөн хэдэн үзэсгэлэнт газрууддаа байрлан гадны жуулчдад өндөр үнээр үйлчлэх сонирхолтой байдаг. Мод, жимс, самар, эмийн ургамал, цэцгийг дураар түүж, зарж борлуулагчид олширсон.

Иймд Хариуцлагатай аяллыг Нутгийн иргэдэд түшиглэн хөгжүүлж өртөг багатайгаар аялангаа ойн нөхөрлөлүүдээ дэмжиж, тэдэндээ хөрөнгө оруулъя, байгалиа хамгаалахад хүн бүр өөрсдийн хувь нэмрээ оруулахыг уриалж байна.

Б.Баярмаа

Мэдээ таалагдсан бол лайк дарна уу:

СЭТГЭГДЭЛ (1)

by 2017-08-04

Сайхан санаа агуулсан сайхан төсөл байна ... Гол нь үнэхээр Монгол ахуйгаа наад зах нь өмссөн хувцас, хийж байгаа үйлдэл, хэлж байгаа үгнээсээ л эхлэх ёстой юм шүү ... Уламжилалт ахуй гэчихээд үнээ, гүүгээ саахдаа хятад, орос нь мэдэгдэхгүй өмд цамцтай сууж байдаг охид, эмэгтэйчүүд, ид хаваа гайхуулан адуу малаа сургаж эдэлж байхдаа бас л орос хятад нь мэдэгдэхгүй куртик өмсөөд байж байхаасаа эхлээд л бодох юм их бий шүү... Ойн сантай аль нэг уулийн амыг Малчид , иргэдийн нөхөрлөлд нь гэрээгээр эзэмшүүлэн аялал зугааллага, байгалийн ашиг шим хүртэгсэд нь тэр бүлэг , нөхөрлөлийн хяналтан дор, тодорхой төлбөрөө өгч , хариуцлагаа тооцож амарч , зугаалдаг тогтолцоонд шилжих хэрэгтэй юм шүү...

ШИНЭ МЭДЭЭ