“Эхийн сүүгээр хооллолтыг хамтдаа дэмжцгээе” сэдэвт сургалт боллоо

ehin_suu3.jpg “Эхийн сүүгээр хооллолтыг хамтдаа дэмжцгээе” сэдэвт сургалт боллоо

“Эхийн сүүгээр хооллолтыг хамтдаа дэмжцгээе” сэдэвт сургалт наймдугаар сарын 3-ны өдөр Нийгмийн эрүүл мэндийн үндэсний төвд боллоо.

Сургалтыг нээж, ЭМЯ-ны Нийгмийн эрүүл мэндийн газрын дарга Д.Ганцэцэг, НҮБ-ын Хүүхдийн сангийн мэргэжилтэн Л.Мөнхжаргал, ЭМЯ-ны мэргэжилтэн, АУ-ны доктор Д.Ганзориг нар үг хэлэв.  Энэ үеэр Д.Ганцэцэг хэлэхдээ “Эхийн сүүгээр хооллолтыг дэмжих бодлого нь хүүхдийг төрсний дараа амлуулах, зургаан сар хүртэл эхийн сүүгээр дагнан хооллох, зургаан сартайгаас хоёр нас хүртэл болон цаашид үргэлжлүүлэн хөхүүлэхийг дэмжих үйл ажиллагаа юм. ДЭМБ-ын чуулганаар 2025 он гэхэд хүүхдийг зургаан сар хүртэл эхийн сүүгээр дагнан хооллолтыг 50 хувьд хүргэх зорилт тавьсан.” гэв.

НҮБ-ын Хүүхдийн сан, “Эхийн сүүгээр хоололтыг дэмжих дэлхийн холбоо”-ны санаачлагаар 1992 оноос эхлэн “Эхийн сүүгээр хооллолтыг дэмжих” дэлхийн долоо хоногийг жил бүрийн наймдугаар сарын эхний долоо хоногт дэлхийн нийтээр тэмдэглэн өнгөрүүлдэг уламжлалтай юм байна. Энэ жил “Эхийн сүүгээр хооллолтыг хамтдаа дэмжицгээе” уриан доор болж байгаа ажээ. Эхийн сүүгээр хооллолтыг дэмжиж ажиллах түншлэл, урт хугацааны хамтын ажиллагааны үндэс суурийг бий болгох, бэхжүүлэх зориолготой энэ сарын 1-8-ны өдрүүдэд тэмдэглэж байна.

Өнөөдрийн сургалтын зорилго нь “Нялх, балчир хүүхдийн хүнсний тухай” хууль болон хүүхдийг эхийн сүүгээр хооллохын ач холбогдлын талаарх эмч, эмнэлгийн ажилтнуудын мэдлэг, хандлагыг дээшлүүлж, мэдээлэл арга зүйгээр хангах юм байна.  Сургалтанд нийслэлийн есөн дүүргийн эрх барих, эмэгтэйчүүд, жирэмсний хяналтын 30 гаран эмч оролцож байгаа юм. Уг сургалтыг НЭМҮТ-ийн Хоол судлалын албаны ЭША, докторант Б.Энхтунгалаг удирдан явуулсан юм.

Сургалтанд ЭМЯ-ны мэргэжилтэн, АУ-ын доктор Д.Ганзориг “Нялх, балчир хүүхдийн хүнсний тухай хууль”, ЭНЭМҮТ-ийн зөвлөх, Монголын хүүхдийн анагаах нийгэмлэгийн тэргүүн, АУ-ны магистр Г.Соёлгэрэл “Эхийн сүүгээр хооллолт ба хүүхдийн өвчлөл, эндэгдэл”, “Амьдрах ухаан” төвийн захирал, АУ-ны доктор М.Оюунбилэг “Эхийн сүүгээр хооллолтыг дэмжих бодлого”, НЭМГ-ын мэргэжилтэн, АУ-ны магистр Б.Бадамханд “Эхийн сүүгээр хооллолтын ач холбогдол: Хүүхэд,эхэд” , “Эхийн сүүгээр хооллолтын зөвлөмж” зэрэг сэдвээр танилцуулга, мэдээлэл хйиж, санал солилцов.

Д.Ганзориг сургалтын үеэр “Эхийн сүү бол хүүхдийн анхны дархлаажуулалт, цор ганц төгс зохицол бүхий хоол тэжээл байдаг. Эхийн сүүгээр хооллох нь хүүхдийн оюун ухааны хөгжлийг дэмждэг.” гэж тодотгон хэлсэн юм.

Б.Баярмаа

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ