Цагаан гуниг төрүүлж, “Аялгуут солир” шиг онгодтой бүтээлүүд

Аялгуут_солир.jpg Цагаан гуниг төрүүлж, “Аялгуут солир” шиг онгодтой бүтээлүүд

УЭ-ийн шагналт Л.Гантөмөр, МУЭ-ийн шагналт, СТА Ө.Дарамбазар, шавь, МҮХАҮТ-ын Удирдах зөвлөлийн дарга бөгөөд Ерөнхийлөгч Б.Лхагважав нарын хамтарсан "Аялгуут солир III" уран зургийн үзэсгэлэн МУЭ-ийн Арт галлерейд зургаадугаар сарын 29-ны өдөр нээгдсэн юм.

Таван өдөр үргэлжилж байгаа "Аялгуут солир III" уран зургийн үзэсгэлэн их онцлогтой болжээ. “Аялгуут солир” гэх нэрнээсээ эхлээд уран бүтээлийн утга агуулга гүн санааг илэрхийлж байв.

ДУДС,СУИС-ийг төгссөн, ахмад уран бүтээлч УЭ-ийн шагналт Л.Гантөмөр зураач үзэсгэлэн болон бүтээлийнхээ онцлогын талаар тодруулж хэлэхдээ “Энэхүү үзэсгэлэнд дүрслэх урлагийн нэгэн төрөл болох уран баримал, уран зураг хоёрын хамтарсан бүтээл тавигдлаа. Урлаг дотор олон изм урсгал байдаг.

Тэдгээрийн нэг нь болсон сэтгэлгээний абстракт чиглэлийг баримтласан бүтээлээ дэлгэн үзүүлж байна гэж хэлээд "Аялгуут солир" гэдэг нэрийг өгсөн учир нь хүнээс гэнэт онгод төрдөг. Түүнтэй адил солир хааяа гэнэт унадаг тул хүний сэтгэхүйн онгодыг солиртой зүйрлэж нэрлэсэн. Би 30 гаруй жил уран бүтээлээ туурвиж байна.” гэсэн юм.

МУЭ-ийн шагналт, СТА Ө.Дарамбазар гуайн “Цагаан гуниг” зураг их содон харагдаж байсан юм. Түүнээс “Цагаан гуниг” зургаараа юуг харуулахыг зорьсон бэ гэж асуухад “Энэ бүтээлээ би нэрт хөгжмийн зохиолч Н.Жанцанноров гуайн хөгжмийг сонсож байгаад, зурж дууссан. Тэгээд би бодлоо. Тэр хөгжим гуниг илэрхийлээд байгаа ч юм шиг, баяр баясгалан хэлээд ч байгаа юм шиг, хүнийг бүүр их дотроос нь хөөрүүлж байгаа юм шиг мэдрэмж, ойлголт төрж байсан. 

Хүн яагаад хөгжим сонсоод гунигладаг юм бэ, яруу найраг уншаад уйлдаг юм бэ гэж бодсон. Гэтэл уран зураг хараад уйлдаг хүнийг би сайн мэддэггүй. Байдаг л даа. Гэхдээ ховор. Тэгэхээр зарим хүмүүст Жанцанноров гуайн хөгжмийг сонсоод уйлахаар юм шиг сэтгэгдэл төрж байдаг. Тиймээс би энэ зургаа ”цагаан гуниг” гэж нэрлээд, цаад санаа нь юуг хэлээд байна вэ гэвэл “цагаан сэтгэлтэй гуниг надад оршвой” гэж бодож илэрхийлсэн юм. Ер нь цагаан гунигт бүх зүйл багтана” гэж тодотгон тайлбарласан.

Мөн  “Аялгуут солир III” үзэсгэлэнд Төрийн хошой шагналт, ардын жүжигчин Н.Жанцанноров Польшийн алдарт хөгжмийн зохиолч Ф.Шопены уран бүтээлд зориулан хаягласан зурагнуудыг дэлгэсэн байлаа.  

Тус үзэсгэлэнд МҮХАҮТ-ын ерөнхийлөгч Б.Лхагважав хөгжмийн зохиолч Н.Жанцанноров гуайтай хамтарч “Үдшийн бяцхан аялгуунууд” бүтээлээс санаа авч “Долоо хоног”гэх бүтээлд хүний сэтгэл хөдлөлүүдийг илэрхийлж  дүрсэлсэн уран зургуудаа толилуулжээ. 

Энэ үеэр МУБИС-ийн ахмад багш, зураач, олон шавь нар төрүүлсэн МУСТА, МУЭ-ийн шагналт зураач Х.Содномцэрэн хэлэхдээ уран бүтээлч хүн бүтээлээ өөр өөрийн өнцгөөс харж, илэрхийлж зурдаг учир хөндлөнгөөс тайлбарлахад хэцүү. Тухайн бүтээлийн илэрхийлэл, цаад утга санааг зурж, бүтээсэн зураач, уран бүтээлч илүү сайн тайлбар өгнө гэж хэлж байв.

 

Үзэсгэлэнгийн сонирхол татсан зохиомж нь хүрэл баримлуудыг уран зурагтай хослуулж харуулсан нь бас нэг онцлог болсон байв.Уран барималч Л.Гантөмөрийн “Сүүн сэтгэл”, “Талын гүнж”, “Зүрхний гүнж”, Хээр хоносон сар, Чонон тууль, Л.Дарамбазарын Прагмет, Хээр хоносон сар, Цагаан гуниг, Бөртө чонын удам, Эх,  Чонын улиан зэрэг монгол ахуйг илэрхийлсэн 20 гаруй баримал, зургууд  үзэсгэлэнд тавьжээ.

Б.Баярмаа

 

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ