Трамп, Путин нар ирэх сард Германд уулзалт хийх төлөвтэй байна

161223-trump-putin-love-feature.jpg Трамп, Путин нар ирэх сард Германд уулзалт хийх төлөвтэй байна

ОХУ болон АНУ-ын төрийн тэргүүнүүд ирэх сард Германд уулзалдахаар болсныг өчигдөр /6-р сарын 21/ Кремлийн хэвлэлийн төлөөлөгч Дмитрий Песков мэдэгдлээ. Түүний хэлснээр хоёр улсын төрийн тэргүүнүүд ирэх сарын 7-8-ний өдрүүдэд Германы Гамбург хотноо болох “Их 20”-ийн уулзалтад оролцох аж. Гэхдээ тус арга хэмжээний үеэр болох энэхүү уулзалтыг албан ёсоор товлоогүй гэдгийг тэр онцолжээ.

Тэрбээр хэвлэлийн бага хурлын үеэр “Хэрэв шаардлагатай гэж үзвэл бид уулзалтыг урьдчилан товлоход оройтоогүй байна. Үүнд аливаа хориг саад байхгүй гэдэгт итгэж болно” хэмээн хэлэхийн ялдамд АНУ ОХУ-ын эсрэг хориг арга хэмжээг үргэлжлүүлэхээр болсонд харамсаж байгаагаа илэрхийлжээ. Түүний хэлснээр ОХУ-ын мэргэжилтнүүд үүний эсрэг боломжтой арга хэмжээ авахаар ажиллаж байгаа гэнэ.

АНУ-ын Сангийн яам энэ мягмар гаригт /6-р сарын 20/ Украйны асуудлаар ОХУ-ын эсрэг нэмэлт хориг арга хэмжээ авч нийт 38 хувь хүн, аж ахуй эрхлэгчийг хар жагсаалтад оруулсан юм. Ийнхүү Балтийн тэнгисээр зорчих хоёр улсын байлдааны усан онгоц харилцан сөргөлдөх болсон төдийгүй Сирийн иргэний дайны гал даамжирсан цаг үетэй зэрэгцэн гарч ирсэн эдгээр хориг арга хэмжээ Трамп болон Путин нарын уулзалтад харшилж мэдэхээр байна.

Орчуулсан: С.Нарангарав

Эх сурвалж: Синьхуа агентлаг

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ