Залуучууд уур амьсгалын өөрчлөлтийн асуудлаар чуулж байна

Уур_амьсгал.jpg   Залуучууд уур амьсгалын өөрчлөлтийн асуудлаар чуулж байна

“Уур амьсгалын өөрчлөлтөд залуучуудын анхаарлыг хандуулах нь” үндэсний хоёрдугаар чуулган тавдугаар сарын 20-ны өдөр эхэллээ. Хоёр өдөр үргэлжлэх чуулган нь залуучуудын байгалийн болон уур  амьсгалтай  холбоотой  гамшигтай  тэмцэх, дасан зохицох чадавхийг бэхжүүлэх, мөн үндэсний бодлого, стратеги, төлөвлөлтөд уур амьсгалын өөрчлөлттэй холбоотой асуудлыг тусгахад залуучуудын дуу хоолойг хүргэх зорилготой аж.  

Нээлтэнд БОАЖЯамны хүрээлэн буй орчин, байгалийн нөөцийн удирдлагын газрын дарга, доктор, профессор Г.Нямдаваа, ЮНЕСКО-ийн Монголын Үндэсний Комиссын төсөл хариуцсан мэргэжилтэн У.Мөнхдэлгэр, НҮБ-ын Залуучуудын Зөвлөх Хорооны Зохицуулагч Г.Учралнар оролцож, үг хэллээ.

Энэхүү чуулганаар уур амьсгалын өөрчлөлт, түүний сөрөг нөлөөллийг багасгах амьдралын хэв маяг, газрын доройтол, цөлжилт, мал аж ахуй бэлчээрийн асуудал, болон ойжуулах, ойг нөхөн сэргээх, ногоон байгууламж, усны бохирдол зэрэг  чиглэлээр илтгэл тавьж, хэлэлцэж эхлээд байна.

 Чуулганд их дээд сургуулийн оюутан залуучууд, холбогдох яамны бодлого боловсруулагчид, судлаачид,иргэний нийгэм болон олон улсын байгууллагын нийт 100 оролцогч оролцож байна. Тус чуулганыг Байгаль Орчин Аялал Жуулчлалын Яам, ЮНЕСКО-ийн Монгол дахь Үндэсний Комисс, Нэгдсэн Үндэстний Байгууллагын Залуучуудын Зөвлөх Хорооноос хамтран зохион байгуулж байна. Энэхүү үндэсний чуулган нь гурван сэдвийн хүрээнд бүлгийн хэлэлцүүлэг өрнүүлэх юм байна. Хэлэлцүүлгээс гарсан үр дүнг “Уур амьсгалын өөрчлөлтийн эсрэг залуучуудын оролцоог хангах нь” тунхаг бичиг баталж, БОАЖЯам, ЮНЕСКО Үндэсний Коммист хүргүүлнэ гэж зохион байгуулагч нь хэлж байна.

 2015 оны есдүгээр сард НҮБ-ын Ерөнхий Ассамблейн 70 дахь чуулганы хуралдаанаар“Эх дэлхийгээ шинэчилье: 2030 он хүртэлх Тогтвортой Хөгжлийн   Хөтөлбөр”-ийг баталсан. Уг хөтөлбөр нь 2030 он хүртэлх хөгжлийн тэргүүлэх чиглэлийн 17 зорилтуудтай болно. Эдгээр ТХБ-ын 17 зорилтуудыг улс орнуудад амжилттай хэрэгжүүлэх, үр дүнд хүрэх талаарх дэлхийн болон бүс нутгийн санал санаачлагуудыг НҮБ-ын Боловсрол, соёл, шинжлэх ухааны байгууллага (ЮНЕСКО) дэмжин ажиллаж байна.

 Уур амьсгалын өөрчлөлт нь энэ цаг үеийн хамгийн ноцтой сорилтуудын нэг болжээ. Түүний  сөрөг  нөлөөлөл  нь  бүх  улс  орнуудын  тогтвортой  хөгжлийг  хэрэгжүүлэх  боломжийг хөсөрдүүлж байгааг тэмдэглэжээ. Байгалийн  нөөцийн  хомсдол, цөлжилт, ган,  хөрсны  доройтол,  цэвэр  усны  хомсдол,  биологийн  олон  янз  байдлын  мөхөл  зэрэг  байгаль  орчны  доройтлын  сөрөг  нөлөөлөл  нь  хүн  төрөлхтөнд  тулгарч  байгаа  зорилтууд,  сөрөг  үр  дагаврыг  нэмэгдүүлж байна.

Дэлхий нийтийн тулгамдсан асуудал болоод байгаа уур амьсгалын өөрчлөлтийн гол шалтгаан нь хүний үйл ажиллагааны улмаас агаар мандалд хуримтлагдаж байгаа хүлэмжийн хий юм. Тиймээс уур амьсгалын өөрчлөлттэй тэмцэхэд дэлхийн улс орнуудын төдийгүй хүн бүрийн хүчин чармайлт ихээхэн чухал байдаг. Уур амьсгалын өөрчлөлтийг сааруулах, дасан зохицоход иргэн бүрийн оруулах хувь нэмрийг ойлгуулах, тэдний оролцоог идэвхижүүлэхэд шинжлэх ухаанч, цэгцтэй мэдлэг олгох нь хамгийн оновчтой арга зам гэдгийг ЮНЕСКО тодорхойлжээ. Монгол орон нь газар зүйн байршил, эмзэг экосистем, байгаль цаг агаараас хараат эдийн засгийн тогтолцоо зэргээсээ шалтгаалан уур амьсгалын өөрчлөлтөд нэн өртөмтгий болжээ.

Үүний илрэл нь сүүлийн дөчөөд жилийн дотор дэлхийн уур амьсгалын өөрчлөлт болон хүний үйл ажиллагааны улмаас монгол орны экосистемд мэдэгдэхүйц өөрчлөлт орсон байна. Энэ нь цөлжилт, ган, зудын давтагдал ихсэх, усны нөөц, биологийн олон янз байдал хомсдох зэргээр илэрч, улмаар улс орны эдийн засаг, ард түмний амьдралын түвшинд таагүй нөлөө үзүүлэх хэмжээнд хүрээд байгааг судалгаагаар дүгнэжээ.

 Б.Баярмаа

 

 

 

 

 

 

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ