Сирид гэмт хэрэг үйлдсэн палестин залууг Австрийн шүүх бүх насаар нь хорих ялаар шийтгэжээ

xdf8gbd7.jpg Сирид гэмт хэрэг үйлдсэн палестин залууг Австрийн шүүх бүх насаар нь хорих ялаар шийтгэжээ
ДАМАСК. /BBC/. Орогнол хүссэн нэгэн эрийг Сирид 20 хүний амийг хөнөөсөн хэргээр Австрийн Инсбрук хотын шүүх бүх насаар нь хорих ялаар шийтгэжээ.

Хомс хотод болсон тулалдааны дараа 27 настай энэ палестин залуу зэвсэггүй шархадсан цэргүүдийг буудан хөнөөсөн байна.  Нэрийг нь нууцалж буй энэ залуу шүүхээс оноосон ялыг эсэргүүцэж байгаа юм.

Түүнийг 6 дугаар сард Австрид баривчилжээ. Энэ нь Сирийн дайнтай холбоотой гэмт хэргийг Австри улсад анх удаа шүүсэн тохиолдол болж байна.

Тус улсын хэвлэлүүдэд бичсэнийг үзвэл, палестин эр өмнө нь дүрвэгсдийн хуаранд байхдаа Сирийн чөлөөт армитай холбоотой Farouq Brigade гэдэг лалын босогчдын бүлэглэлийн эгнээнд тулалдаж байхдаа засгийн газрын цэргүүдийг буудан алсан тухайгаа бусдад сайрхан ярьж байжээ.

Түүний өмгөөлөгчид эл хэрэг явдлыг буруу ойлгуулсан учраас шүүхийн шийдвэрийг давж заалдана гэдгээ мэдэгдсэн байна. Өдөр тутмын Der Standard сонинд бичсэнийг үзвэл, шүүхээр шийтгүүлсэн залуу Хомс хот дахь дүрвэгсдийн хуаранд өссөн, ямар нэг улсын харъяалалгүй палестин хүн ажээ.

Өнгөрсөн онд түүний Сирид байхдаа үйлдсэн хэргийг холбогдох хүмүүс олж мэдсэнээр сэжигтнийг мөрдөн шалгаж эхэлжээ. Сирид иргэний дайн үргэлжилж байгаа учраас Австри улс палестин эрийг нутагт нь ял эдлүүлэхээр шилжүүлэх боломжгүй юм.  

Женевийн Конвенцид зааснаар шархадсан цэргийг хөнөөхийг хориглодог. Палестин залуугийн үйлдсэн хэрэг нь террорист гэмт хэрэгт тооцогдох бөгөөд  террорист ажиллагааны эсрэг олон улсын гэрээ хэлэлцээрийн дагуу шийтгэж болох юм гэж албаны хүмүүс үзэж байна. 

 
Эх сурвалж: МОНЦАМЭ
Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ