Их наядаар яригдхуйц чанаргүй зээл олноор нь гаргаж улстөрчдийн бизнесийг тэтгэсэн Хөгжлийн банкны араас Төрийн банк орж болзошгүй нөхцөл үүсжээ. Учир юу гэвэл Төрийн банкаар дамжиж хэрэгжсэн эдийн засгийг сэргээх 10 их наядын хөтөлбөрийн ихэнх мөнгө л гэхэд улстөрд хамаарал бүхий хүмүүсийн хармаа хотоор дамжаад алга болсон сурагтай байна.
Юун ковидийн үеийн эдийн засгийг сэргээх, чоно борооноор гэгчээр хэдэн улстөрчид, тэдгээрийн хамаарал бүхий цүнх баригчдын компаниуд л 10 их наядын хөтөлбөрөөс ахиухан шиг хүртэж хямралыг өнтэй давсан бололтой. Энэ мэтээр эдийн засгийг сэргээх 10 их наядын хөтөлбөртэй холбоотой асуудлыг ултайхан шалгавал Хөгжлийн банкны чанаргүй зээлүүд хажууд нь жулдахаар том асуудал гарч ирж болзошгүй байна.
Нөгөөтээгүүр улстөрчдийн халаасаа зузаатгадаг хоёр дахь “Хөгжлийн банк” төрийн мэдлийн “Төрийн банк” болжээ гэж хэлэхэд буруудах юм бас алга. Учир нь тус банкнаас зарладаг тендерүүдийг зах зухаас шалгаж үзвэл улстөрчдийн хамаарал бүхий компаниудтай холбоотой овоо урт жагсаалт гарч ирж байх юм.
Жишээ дурдахад өнгөрсөн 2021 онд МАН-ын генсек Д.Амарбаясгалан, Гадаад харилцааны сайд Б.Батцэцэг нарын компаниуд Төрийн банкнаас зарласан тендерт өрсөлдөгчгүй шалгарч овоо хэдэн төгрөгийн үнийн дүнтэй гэрээ байгуулжээ.
Тухайлбал, Гадаад харилцааны сайд Б.Батцэцэгийн хамаарал бүхий “Аз хур” ХХК 2021 оны 09 дүгээр сард Төрийн банкнаас зарласан бичиг хэргийн материал нийлүүлэх тендерт ганцаараа материал өгөн шалгарч 729 сая төгрөгийн үнэ бүхий бараа материал нийлүүлсэн тухай баримт Төрийн худалдан авах ажиллагааны сайтад мэдээлэгджээ.
Мөн төрд шахаа хийдгээрээ алдартай МАН-ын Ерөнхий нарийн бичгийн дарга Д.Амарбаясгалангийн “Соёмбо принтинг” ХХК ч бас 2021 онд 09 дүгээр сард Төрийн банкнаас зарласан тендерт мөн л өрсөлдөгчгүй шалгарч 350 гаруй сая төгрөгийн маягт нийлүүлжээ.
Төрийн банкны ганцхан сарын тендерийн түүхийг авч үзэхэд улстөрд нөлөө бүхий Б.Батцэцэг, Д.Амарбаясгалан гэдэг хоёр хүнтэй холбоотой сэжим гарч ирж байх бөгөөд энэ хоёр хүний компани нийтдээ тэрбум гаруй төгрөгийг тендер нэрийн дор Төрийн банкнаас авчихсан болох нь тодорхой байна.
Ямартай ч энэ мэтээс харахад Төрийн банкны гүйцэтгэх захирал Ө.Гантөрийн үед тус банк улстөрчдийн компанийг угжиж тэтгэдэг саалийн үнээ болон хувирсан болох нь тодорхой байна. Энэ ташрамд, улсын мөнгийг улстөрчдийн бизнесийг дэмжихэд ашиглах нь зохимжгүйгээс гадна хууль зөрчсөн үйлдэл шүү гэдгийг Ө.Гантөрд сануулж хэлэх нь зөв болов уу.
ЭХ СУРВАЛЖ: NEWSTV.MN