Өвөл хурдан морь уралдуулдаг уламжлал байгаагүй

olloo_mn_1425179248_dvnjingaraw.jpg Өвөл хурдан морь уралдуулдаг уламжлал байгаагүй

Өчигдөр /2017.03.03/ Нийслэл дэх захиргааны хэргийн анхан шатны шүүхийн шийдвэрээр “Дүнжингарав 2017” хаврын морин уралдааныг зохион байгуулах Засгийн газрын тогтоолыг түр түдгэлзүүлсэн билээ. Гэвч өнөөдрийн байдлаар уралдааны бүртгэл Хан-Уул дүүргийн Өлзий хорооллын дунд сургууль дээр явагдсаар байна. Мөн Төв аймгийн Заамар суманд өнөөдөр уралдаан болжээ. Үүнтэй холбоотойгоор Шүүхийн шийдвэрийг гүйцэтгэхийг шаардаж Хүүхэд хамгааллын үндэсний сүлжээ, Хүүхдийн хөдөлмөрийн тэвчишгүй хэлбэрийн эсрэг үндэсний сүлжээ, “Бүх нийтийн боловсролын төлөө” иргэний нийгмийн үндэсний эвсэл хэвлэлийн бага хурал хийлээ.

Хөх өвс ургаж, хөхөө шувуу донгодохоос өмнө монголчууд морь уралдуулах, дээлээ сугалдрагалахыг цээрлэдэг хэлц үг бий.

ӨВЛИЙН МОРИН УРАЛДААН ХУУЛЬ, ТОГТООМЖ ЗӨРЧИЖ БАЙНА

Монгол Улсын хөдөлмөрийн сайдын 2016 оны хоёрдугаар сарын 8-ны өдрийн тушаалаар жил бүрийн 11-р сарын 1-ээс тавдугаар сарын 1-ийг хүртэлх хугацаанд уралдаан, сунгаа, үсэргээнд хүүхдээр хурдан морь унуулахыг хориглосон. Гэтэл Засгийн газрын 2017 оны хоёрдугаар сарын 22-ны өдрийн тогтоолоор Дүнжингарав болон бусад хаврын морин уралдааныг зохион байгуулахаар шийдвэрлэжээ. Энэ нь Монгол Улсын Үндсэн хууль, холбогдох бусад хууль, олон улсын гэрээний дагуу хүүхдийн ашиг сонирхлыг эн тэргүүнд харгалзаж, аюулгүй байдлыг хангах үүргээ үл хайхарсан шийдвэр гэж иргэний нийгмийн байгууллагууд хурлын үеэр хэллээ. Энэ талаар “Бүх нийтийн боловсролын төлөө” ИНБ-ын дэд зохицуулагч Б.Болорсайхан “Бага насны хүүхдийн эрүүл мэнд, хууль ёсны ашиг сонирхлыг хамгаалах үүднээс маргааш /2017.03.05/ болох “Дүнжингарав” уралдааныг зохион байгуулахгүй байх ёстой. Хурдан морины уралдааныг бид хориглоод байгаа юм биш харин унаач хүүхдүүд маань осгож бээрснээс болж мориноос унаж бэртэх тохиолдол маш их гардаг учраас хүйтний улиралд уралдааныг битгий зохион байгуулаач гэсэн шаардлагыг тавьж байгаа. НҮБ-ын Хүний эрхийн зөвлөлийн гишүүн болсон Монгол Улс өөрийн нутаг дэвсгэр дээр хүний эрх, эрх чөлөөг баталгаатай эдлүүлнэ гэсэн амлалтаа биелүүлж чадахгүй хүүхдийн эрүүл мэнд амь насыг ийнхүү хүнд нөхцөлд оруулж хүйтний улиралд уралдаан зохион байгуулж байгаа нь төр иргэнийхээ аюулгүй байдлыг хангах ёстой гэсэн үүргээ биелүүлж чадахгүй байгаагийн тод жишээ” гэв.

ӨВӨЛ ХУРДАН МОРЬ УРАЛДУУЛАХ УЛАМЖЛАЛ БАЙГААГҮЙ

Хүйтний улиралд морин уралдаан зохион байгуулахыг хориглож байгааг иргэдийн зүгээс “Ёс уламжлалаа дагасангүй” гэх зэргээр эсэргүүцэж байгааг ч тэд дурдсан юм. Хүүхдийн хөдөлмөрийн эсрэг үндэсний сүлжээний зохицуулагч Ц.Баттуяа “Өвлийн морин уралдааныг олон хүмүүс уламжлал гэж үздэг. Монгол Улсын 1803-1920 оны хооронд дахь 380 гаруй архивийн материалыг шүүж үзэхэд өвлийн морин уралдааныг огт зохион байгуулж байгаагүй. Харин даншиг наадмаа 5-8-р сарын хооронд явуулж байсан судалгаа архивын материалаар нотлогдсон байгаа. Тэгэхээр үүнийг бид уламжлал гэж үзэх ёсгүй. Ер нь насанд хүрээгүй бага, балчир хүүхдүүдийг өвлийн энэ хүйтэнд хурдан морь унуулах нь өндөр аюул эрсдэлтэй гэдгийг бид судалгаатай, судалгаагүй мэднэ шүү дээ” гэлээ. Иймээс Нийслэл дэх захиргааны хэргийн анхан шатны шүүхийн захирамж болон Монгол Улсын Хөдөлмөрийн сайдын 2016 оны хоёрдугаар сарын 8-ны өдрийн тушаалаар баталсан “Насанд хүрээгүй хүнийг ажиллуулахыг хориглосон ажлын байрны жагсаалт”-ыг хэрэгжүүлж хаврын улирлын хурдан морины уралдаанд хүүхэд оролцохыг улсын хэмжээнд хатуу хориглохыг иргэний нийгмийн байгууллагууд шаардлаа.

ТОО БАРИМТ

/НҮБ-ын Хүүхдийн сан, Хурдан морины хаврын уралдаан ба хүүхдийн эрх судалгааны тайлан 2016/

-2013-2015 оны хурдан морины уралдааны үеэр 2002 хүүхэд мориноос унаж гэмтэл авж, 6 хүүхэд эндсэн. Энэ нь зөвхөн Гэмтэл согог судлалын үндэсний төвийн тоо.

-Хүүхдүүдийн ердөө 22.6 хувь нь бэртсэн даруй эмнэлгийн тусламж авч байсан.

-Гадаа -15 хэм, салхины хурд 10 км/цаг байх үед агаарын хэм -21 хэмийн хүйтэнтэй тэнцэх нөлөөллийг үүсгэдэг бөгөөд хөлдөлт 30 минутад үүсэх боломжтой.

-Хурдан морины хаврын уралдаанд оролцсоноор толгой болон мөчний гэмтэл, ясны хугаралт, хөлдөлт, осголт, амьсгалын замын өвчин, дотор эрхтний доргилт, нүдний эвэрлэг бүрхэвч хөлдөх зэрэг өвчин хүүхдэд учирдаг.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ